កូរ៉េខាងត្បូង ហាមឃាត់អតីតនាយករដ្ឋមន្រ្តីកូរ៉េខាងត្បូង លោក Han Duck-soo និងអតីតរដ្ឋមន្រ្តីហិរញ្ញវត្ថុ Choi Sang-mok ចាកចេញពីប្រទេស ស្របពេលរងបទចោទបះបោរ ពាក់ព័ន្ធការប្រកាសប្រើច្បាប់អាជ្ញាសឹករបស់លោកយូន សុកយ៉ល
សេអ៊ួល៖ បើតាមការបញ្ជាក់របស់ប៉ូលិសកូរ៉េខាងត្បូង នៅថ្ងៃទី២៧ ខែឧសភា កូរ៉េខាងត្បូង បានហាមឃាត់អតីតនាយករដ្ឋមន្រ្តីកូរ៉េខាងត្បូង លោក Han Duck-soo និងអតីតរដ្ឋមន្រ្តីហិរញ្ញវត្ថុ Choi Sang-mok ចាកចេញពីប្រទេស ស្របពេលរងបទចោទបះបោរ ពាក់ព័ន្ធការប្រកាសប្រើច្បាប់អាជ្ញាសឹករបស់លោកយូន សុកយ៉ល អតីតប្រធានាធិបតីកូរ៉េខាងត្បូង នៅក្នុងខែធ្នូ ឆ្នាំ២០២៤។
ទោះលោក យូន សុកយ៉ល អតីតប្រធានាធិបតីកូរ៉េខាងត្បូង ត្រូវបានដកចេញពីតំណែងក៏ដោយ អតីតមន្រ្តីក្នុងរដ្ឋបាលរបស់លោក នៅតែស្ថិតនៅក្រោមការស៊ើបអង្កេត។
តាមការបញ្ជាក់របស់មន្រ្តីប៉ូលិសកូរ៉េខាងត្បូង លោក Han Duck-soo អតីតនាយករដ្ឋមន្រ្តី និងអតីតរដ្ឋមន្រ្តីហិរញ្ញវត្ថុ Choi Sang-mok ត្រូវបានហាមឃាត់ចាកចេញពីប្រទេស ក្រោមបទចោទបះបោរ ពាក់ព័ន្ធនឹងការប្រកាសប្រើច្បាប់អាជ្ញាសឹក។
បម្រាមចាកចេញពីប្រទេស ត្រូវបានអនុវត្តលើលោក Han និងលោក Choi តាំងពីពាក់កណ្តាលខែឧសភា មកម្ល៉េះ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ទន្ទឹមនេះ ក្រុមប៉ូលិសស៊ើបអង្កេតពិសេសដែលទទួលបន្ទុកលើមន្រ្តីជាន់ខ្ពស់ បានកោះហៅលោក Han, លោក Choi និងអតីតរដ្ឋមន្រ្តីមហាផ្ទៃ Lee Sang-min ដើម្បីសួរចម្លើយរយៈពេលប្រមាណ ១០ម៉ោង ពាក់ព័ន្ធនឹងការប្រកាសច្បាប់អាជ្ញាសឹក នៅដើមខែធ្នូ ឆ្នាំ២០២៤។
អតីតសមាជិករដ្ឋាភិបាលទាំង ៣នាក់ ត្រូវបានរាយការណ៍ថា បានធ្វើសេចក្តីថ្លែងការណ៍ខុស ជុំវិញដំណើរការនៃការទទួលបានឯកសារ និងបទបញ្ជាអនុវត្តច្បាប់អាជ្ញាសឹក ក្រោយពេលប៉ូលិស បានបញ្ចប់ការស៊ើបអង្កេតនៅបន្ទប់ប្រជុំគណៈរដ្ឋមន្រ្តីនាការិយាល័យប្រធានាធិបតី។
ក្រោយការដកតំណែងរបស់លោក យូន កូរ៉េខាងត្បូង នៅថ្ងៃទី៣ ខែមិថុនា នឹងរៀបចំការបោះឆ្នោតប្រធានាធិបតី។ លោក Lee Jae-myung បេក្ខជនប្រធានាធិបតីរបស់បក្សប្រជាធិបតេយ្យ (DP) ត្រូវបានមើលឃើញថា ជាអ្នកទទួលបានសំឡេងគាំទ្រលើសគេ និងមានលទ្ធភាពខ្ពស់សម្រាប់តំណែងប្រធានាធិបតី៕
