សម្តេចធិបតី ស្នើក្រសួងរ៉ែ និងថាមពល ពិនិត្យមើលលើសំណើរកំណត់អាជ្ញាប័ណ្ណ លើអាជីវកម្មក្រុមហ៊ុនស៊ីម៉ង់ត៍
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ស្នើឲ្យក្រសួងរ៉ែ និងថាមពល ពិនិត្យមើលលើសំណើរកំណត់អាជ្ញាប័ណ្ណ លើអាជីវកម្មក្រុមហ៊ុនស៊ីម៉ង់ត៍ ដើម្បីឲ្យរក្សាលំនឹងទីផ្សារប្រកួតប្រជែង និងដើម្បីជៀសវាងការដួលរលំក្រុមហ៊ុន។
ក្នុងឳកាសអញ្ជើញសម្ពោធដាក់ឱ្យដំណើរការ រោងចក្រផលិតស៊ីម៉ងតិ៍ របស់ក្រុមហ៊ុន ខនស៍ ខេធី ស៊ីមេន (ភ្នំពេញ) ឯ.ក ស្ថិតនៅតំបន់ហោងសំណំ ក្នុងភូមិមនោរម្យ ឃុំហោងសំណំ ស្រុកឱរ៉ាល់ ខេត្តកំពង់ស្ពឺ នៅព្រឹកថ្ងៃទី២០ ខែឧសភានេះសម្តេចធិបតី ហ៊ុន ម៉ាណែត បានថ្លែងថា ការទាញយករ៉ែនៅក្នុងស្រុក ដើម្បីអភិវឌ្ឍន៍ប្រទេសគឺជារឿងត្រឹមត្រូវ កាត់បន្ថយតម្លៃជាងការនាំចូល។
សម្តេចធិបតីបន្តថា ការយករ៉ែនៅក្នុងស្រុក ជួយសួយសាអាករដល់រដ្ឋ ប្រមាណជិត១០០លានដុល្លារក្នុងឆ្នាំ២០២៤ក្រៅពីនោះក៏បង្កើនការងារដល់បងប្អូនបន្ថែមទៀតផង។
សម្តេចធិបតីនាយករដ្ឋមន្ត្រីបន្ថែមថា ការយកសួយសាអាករពីក្រុមហ៊ុនយករ៉ែផ្សេងៗ គឺថវិការដ្ឋបានជួយអភិវឌ្ឍន៍ដល់សហគមន៍ផ្សេងៗ នៅទូទាំងប្រទេស ដូច្នេះការយករ៉ែក្នុងស្រុកគឺជារឿងត្រឹមត្រូវ៕
