ខេត្តបន្ទាយមានជ័យកម្ពុជា និងខេត្តស្រះកែវថៃ ប្រារព្ធពិធីបុណ្យវិសាខបូជាឆ្នាំ២០២៥ នៅវត្តគិរីចំការខ្នុរ

បន្ទាយមានជ័យ៖ យោងតាមផែនការណែនាំរបស់គណៈកម្មាធិការជាតិរៀបចំបុណ្យជាតិ អន្តរជាតិ ស្ដីពីការរៀបចំបុណ្យវិសាខបូជាឆ្នាំ២០២៥ ដែលនិងត្រូវប្រព្រឹត្តទៅរយៈពេល ២ថ្ងៃ គឺថ្ងៃ ១៥កើត និងថ្ងៃ ១រោច ខែពិសាខ ជារៀងរាល់ឆ្នាំ ដោយឡែកសម្រាប់ខេត្តបន្ទាយមានជ័យ ក៏បានរៀបចំពិធីបុណ្យវិសាខបូជា និងប្រារព្ធធ្វើនៅវត្តគិរីជុំចំការខ្នុរ សង្កាត់អូរអំបិល ក្រុងសិរីសោភ័ណ ក្រោមអធិបតីភាព លោក លី សុវណ្ណារិទ្ធ អភិបាលខេត្តស្ដីទី តំណាងឯកឧត្តម អ៊ុំ រាត្រី អភិបាល នៃគណៈអភិបាលខេត្ត ក្នុងនោះផងដែរក៏មានការនិមន្តអញ្ជើញចូលរួមពីគណៈប្រតិភូខេត្តស្រះកែវ ប្រទេសថៃ ចំនួន ១៦អង្គ/នាក់។

កម្មវិធីបុណ្យវិសាខបូជា ក៏បានធ្វើការរៀបចំទៅតាមបែបប្រពៃណីព្រះពុទ្ធសាសនាក្នុងថ្ងៃ ១៥កើត ត្រូវនឹងថ្ងៃទី ១១ ខែឧសភា នេះផងដែរ ពេលរសៀលបានរៀបចំក្បួនដង្ហែរបុណ្យវិសាខបូជា ជុំវិញក្រវ៉ាត់ក្រុងសិរីសោភ័ណ តាមលំដាប់ក្បួនរថយន្ត និងក្បួនដង្ហែរួមមានរថយន្តសមត្ថកិច្ច រថយន្តបុស្បុក ព្រះបរមសារីរិកធាតុ រថយន្តបុស្បុក ព្រះអង្គទ្រង់ប្រសូត្រ រថយន្តបុស្បុក ព្រះអង្គទ្រង់ត្រាស់ដឹង រថយន្តបុស្បុក ព្រះអង្គទ្រង់បរិនិព្វាន បន្តបន្ទាប់ក៏មានរថយន្តព្រះសង្ឃ រថយន្តថ្នាក់ដឹកនាំខេត្ត ប្រតិភូខេត្តស្រះកែវ និងមន្ត្រីរាជការ សិស្សានុសិស្ស និងពុទ្ធបរិស័ទ។

លោក បៀវ ថាន ប្រធានមន្ទីរធម្មការ និងសាសនាខេត្ត បានឱ្យដឹងថា បុណ្យវិសាខបូជានេះ គឺជាបុណ្យមួយដ៏សំខាន់ក្នុងព្រះពុទ្ធសាសនា ត្រូវបានប្រជាពុទ្ធបរិស័ទនៅក្នុងសាកលលោក ដែលជាអ្នកគោរពប្រតិបត្តិ រាប់អានព្រះពុទ្ធសាសនា បានប្រារព្ធធ្វើជារៀងរាល់ឆ្នាំដោយកំណត់យកប្រតិការណ៍សំខាន់ៗ របស់ព្រះសម្មាសម្ពុទ្ធនៃយើង ដែលបានកំពុងប្រព្រឹត្តទៅនាថ្ងៃ ១៥កើត និងថ្ងៃ ១រោច ខែពិសាខ នាឆ្នាំ២០២៥នេះ ស្ថិតក្នុងបរិវេណវត្តគិរីជុំចំការខ្នុរ ជាពិសេសរំលឹកព្រឹត្តិការណ៍សំខាន់ៗ ដែលមានថ្ងៃខែកើតឡើងតំណាលគ្នាចំនួន ៣គឺ ទ្រង់ប្រសូត្រ ទ្រង់ត្រាស់ដឹង និងទ្រង់បរិ  និព្វាន។

លោក លី សុវណ្ណារិទ្ធ អភិបាលខេត្តស្ដីទី បានមានប្រសាសន៍ថា ថ្ងៃនេះពុទ្ធសាសនិកនៅគ្រប់ទិសទី ដែលជាអ្នកជឿជាក់លើព្រះពុទ្ធសាសនា បានប្រារព្ធធ្វើពិធីបុណ្យវិសាខបូជា តាមគន្លងប្រពៃណី គឺជាបុណ្យមួយយ៉ាងធំក្នុងព្រះពុទ្ធសាសនា អាចរាប់ថា ជាពុទ្ធានុស្សរណកិច្ចដ៏សំខាន់សម្រាប់រំលឹក ដល់ព្រះពុទ្ធសមណគោតម បរមគ្រូជាម្ចាស់ នាថ្ងៃពេញបូណ៌មី គឺថ្ងៃ ១៥កើតខែពិសាខ ដែលពុទ្ធសាសនិកទាំងគ្រហស្ថ និងបព្វជិត តែធ្វើសក្ការៈបូជាប្រកបដោយជំនឿថាជាមហាកុសលដ៏ប្រសើរ។ ពីព្រោះពិធីបុណ្យនេះ បានបង្ហាញនូវការគោរពរំលឹកនឹកដល់ព្រឹត្តិការណ៍ធំៗ បីនៃសម័យកាលរបស់ព្រះសម្មាសម្ពុទ្ធសមណគោតម គឺថ្ងៃដែលព្រះអង្គទ្រង់ប្រសូត្រ ទ្រង់បានត្រាស់ដឹង និងទ្រង់បរិនិព្វាន។ ព្រះពុទ្ធសាសនា បានដើរតួនាទីយ៉ាងសំខាន់ក្នុងការអប់រំសីលធម៌ គុណធម៌ ណែនាំឲ្យធ្វើបុណ្យ ចៀសវាងការប្រព្រឹត្តអំពើបាប ពិសេសសម្អាតចិត្តឱ្យបរិសុទ្ធ ដែលនាំមកនូវសេចក្ដីសុខ និងសន្តិភាពទាំងផ្លូវកាយ និងផ្លូវចិត្ត។ ក្នុងន័យនេះ ព្រះពុទ្ធសាសនា បានដើរតួនាទីយ៉ាងសំខាន់ក្នុងសង្គមកម្ពុជា ដោយបានសាបព្រោះ និងបណ្ដុះនូវតម្លៃរួមនៃប្រជាជាតិខ្មែរ គឺសាមគ្គីធម៌ និងធម៌អហិង្សា ដែលសុទ្ធសឹងជាមូលដ្ឋានគ្រឹះនៃសន្តិភាព និងភាពសុខដុមរមនានៃសង្គមជាតិ។

ជាចុងក្រោយព្រះសមណៈញ្ញាណ ណាប់ ម៉ឺន ព្រះបាឡាត់គណខេត្ត បាននិមន្តឡើងប្រកាសវិសាខបូជា ឆ្នាំម្សាញ់ សប្តស័ក ព.ស ២៥៦៨ ឈានចូល ព.ស ២៥៦៩ ចាប់ពីថ្ងៃនេះតទៅ និងព្រះមន្ត្រីសង្ឃខេត្ត ក្រុង-ស្រុក គណៈអធិបតី បានបូជាប្រទីព ថ្វាយផ្កា គ្រឿងសក្ការៈ និងថ្ងៃបន្ទាប់បានរៀបចំពិធីរាប់បាត្រដល់ព្រះសង្ឃ ២៦៩អង្គ និងបញ្ចប់ពិធីបុណ្យវិសាខបូជា នាឆ្នាំ២០២៥នេះ៕