សម្ដេចធិបតី អំពាវនាវប្រជាពលរដ្ឋរួមគ្នាការពារភាពសុខសាន្តរបស់ប្រទេស កុំជឿតាមការញុះញង់ដែលនាំទៅបំផ្លាញប្រទេសជាតិ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានអំពាវនាវប្រជាពលរដ្ឋរួមគ្នាការពារភាពសុខសាន្តរបស់ប្រទេស មិនត្រូវជឿតាមការញុះញង់ណាមួយទៅបំផ្លាញប្រទេសជាតិនោះឡើយ។
ក្នុងឳកាសអញ្ជើញសំណេះសំណាលជាមួយមន្ត្រីរាជការ បុគ្គលិក កម្មករនិយោជិត ដែលកំពុងបម្រើការងារ នៅកំពង់ផែស្វយ័តក្រុងព្រះសីហនុ នាព្រឹកថ្ងៃទី០១ ខែឧសភា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត បានបញ្ជាក់ថា កម្ពុជាដាក់គោលដៅជាប្រទេសមានចំណូលខ្ពស់នៅឆ្នាំ២០៥០ តែបើដេកអេសពោះមិនអាចសម្រេចនោះឡើយ ហើយការរក្សាឱ្យបាននូវសុខសន្តិភាព គឺជាភាពចាំបាច់ក្នុងការរក្សាភាពលូតលាស់ប្រទេសជាតិ។
ជាមួយគ្នានេះ សម្តេចមធិបតីនាយករដ្ឋមន្រ្ដី ប្រកាសប្រឹងប្រែងក្នុងការកសាងប្រទេស និងលើកកម្ពស់ជីវភាពប្រជាពលរដ្ឋតាមរយៈគោលនយោបាយនានា ដោយមិនរត់ចោលប្រជាពលរដ្ឋនោះឡើយ។
សម្តេចធិបតីបន្ថែមថា បើមិនគិតពីសេចក្តីសុខរបស់អ្នកដទៃ ក៏គួរគិតពីសេចក្តីសុខរបស់ខ្លួន និងគ្រួសារ។ ដើម្បីរក្សាសេចក្តីសុខនេះ ត្រូវរក្សាឱ្យបានសុខសន្តិភាព និងការឯកភាពរបស់ជាតិ៕
