រុស្ស៊ីបាញ់ស្រោចមីស៊ីល និងបញ្ជូនយន្តហោះគ្មានមនុស្សបើកទៅវាយប្រហារលើរដ្ឋធានីកៀវ សម្លាប់មនុស្សយ៉ាងហោចណាស់១២នាក់
មូស្គូ៖ រុស្ស៊ីបានបាញ់ស្រោចមីស៊ីលដូចគ្រាប់ភ្លៀង និងបញ្ជូនយន្តហោះគ្មានមនុស្សបើកទៅវាយប្រហារលើរដ្ឋធានីកៀវ បានសម្លាប់មនុស្សយ៉ាងហោចណាស់១២នាក់ ដែលជាការវាយប្រហារដ៏ធំបំផុតលើអ៊ុយក្រែនក្នុងឆ្នាំនេះ និងបានទាញការស្តីបន្ទោសដ៏កម្រពីប្រធានាធិបតីអាម៉េរិក លោក ដូណាល់ ត្រាំ។
លោក ត្រាំ កាលពីថ្ងៃព្រហស្បតិ៍ទី២៤មេសា បានប្រាប់មេដឹកនាំរុស្ស៊ីថា៖«លោក វ្ល៉ាឌីមៀ សូមឈប់! (Vladimir, STOP)»។
លោក ត្រាំ បានប្រាប់អ្នកសារព័ត៌មាននៅសេតវិមានថា រដ្ឋបាលរបស់លោកកំពុងដាក់សម្ពាធយ៉ាងខ្លាំងលើប្រទេសរុស្ស៊ី ហើយបានរំលឹកឡើងវិញនូវការមិនពេញចិត្តរបស់លោកចំពោះការវាយប្រហារនេះ។ ប៉ុន្តែលោកបាននិយាយថា វឌ្ឍនភាពដ៏សំខាន់ត្រូវបានធ្វើឡើងនៅក្នុងការចរចាសន្តិភាព ហើយវិមានក្រឹមឡាំងបានធ្វើសម្បទានធំគួរសម ដោយការបើកចំហដើម្បីបញ្ឈប់សង្គ្រាម និងបញ្ឈប់ការវាយយកប្រទេសអ៊ុយក្រែនទាំងមូល។
លោក ត្រាំ បានបង្ហោះសារនៅលើប្រព័ន្ធផ្សព្វផ្សាយ Truth Social ថា៖«ខ្ញុំមិនសប្បាយចិត្តនឹងការវាយប្រហាររបស់រុស្ស៊ីលើអ៊ុយក្រែនទេ។ ការបាញ់បោះនេះមិនចាំបាច់ទាល់តែសោះ។ ឈប់ទៅ លោក វ្ល៉ាឌីមៀ! ទាហាន៥០០០នាក់បានស្លាប់ក្នុងមួយសប្តាហ៍។ ល្មមដល់ពេលឈានដល់កិច្ចព្រមព្រៀងសន្តិភាពហើយ»។
មែនទែនទៅ នេះជាប្រតិកម្មខ្លាំងដ៏កម្ររបស់លោក ត្រាំ លើមេដឹកនាំរុស្ស៊ី។ លោក ត្រាំ មិនសូវប្រើពាក្យធ្ងន់ៗនៅក្នុងសេចក្តីថ្លែងការណ៍រអំពីលោក ពូទីន ទេ បើធៀបនឹងលោក ហ្សេឡេនស្គី ដែលលោក ត្រាំ ធ្លាប់ហៅថា ជាជនផ្តាច់ការ។ សេតវិមាន បាន គំរាម ថា នឹង បោះ បង់ ការ ខិត ខំ ប្រឹង ប្រែង របស់ ខ្លួន ប្រសិន បើ មិន មាន ការ រីក ចម្រើន ក្នុង ពេល ឆាប់ៗ ។ មន្ត្រីអាម៉េរិកម្នាក់បាននិយាយថា បេសកជនពិសេសរបស់លោក ត្រាំ ត្រូវបានគេរំពឹងថា នឹងជួបជាមួយលោក ពូទីន នៅថ្ងៃសុក្រសម្រាប់ការពិភាក្សាបន្ថែមទៀត។
មន្ត្រីអ៊ុយក្រែនរាយការណ៍ថា ការវាយប្រហារពិឃាតរបស់យក្សកំណាចនុយក្លេអ៊ែររុស្ស៊ីបានធ្វើឱ្យមនុស្សចំនួន៩០នាក់រងរបួស បំផ្លាញអគារជាច្រើនខ្នង និងបង្កឱ្យមានអគ្គិភ័យឆាបឆេះយ៉ាងសន្ធោសន្ធៅថែមទៀត។ ក្រុម អ្នក ជួយ សង្គ្រោះ កំពុងស្វែង រក សាកសព ពី គំនរ បាក់បែក ។ ការវាយប្រហារចុងក្រោយបំផុត កើតឡើងនៅពេលដ៏សំខាន់មួយនៅក្នុងសង្គ្រាមរបស់រុស្ស៊ីនៅអ៊ុយក្រែន បានចាប់ផ្តើមជាមួយការលុកលុយរបស់រដ្ឋធានីមូស្គូក្នុងឆ្នាំ២០២២។ ទាំងរដ្ឋធានីកៀវ និងម៉ូស្គូ កំពុងព្យាយាមបង្ហាញលោក ត្រាំ ថា ពួកគេកំពុងខ្នះខ្នែងធ្វើការឆ្ពោះទៅរកគោលដៅនៃកិច្ចព្រមព្រៀងសន្តិភាពដ៏ឆាប់រហ័សរបស់ខ្លួន។
រដ្ឋមន្ត្រីការបរទេសរុស្ស៊ី លោក សឺហ្គី ឡាវរ៉ូវ (ឈ្មោះភាសារុស្ស៊ី៖ Сергей Лавров) បានលើកឡើងថា កិច្ចខិតខំប្រឹងប្រែងកំពុងដំណើរការក្នុងទិសដៅត្រឹមត្រូវ ប៉ុន្តែចំណុចជាក់លាក់មួយចំនួន ចាំបាច់ត្រូវកែសម្រួលឱ្យបានល្អិតល្អន់។
សហរដ្ឋអាម៉េរិកក៏កំពុងដាក់សម្ពាធលើរដ្ឋធានីកៀវ ហើយរដ្ឋមន្ត្រីការបរទេសអាម៉េរិក លោក ម៉ាកូ រូប៊ីអូ (ឈ្មោះភាសាអង់គ្លេស៖ Marco Rubio) បាននិយាយថា ការពិភាក្សាបន្ថែមទៀតត្រូវបានគ្រោងឡើងសម្រាប់ចុងសប្តាហ៍ ហើយថាសហរដ្ឋអាម៉េរិកចង់ឃើញទាំងអ៊ុយក្រែន និងរុស្ស៊ី ចូលរួមយ៉ាងសកម្មដើម្បីបញ្ចប់កិច្ចព្រមព្រៀងមួយ៕
