ភ្នំពេញ៖ បើតាមការឱ្យដឹងពីកំពង់ផែស្វយ័តក្រុងព្រះសីហនុបានបញ្ជាក់ថា ភ្ញៀវអន្តរជាតិជាង៦០០នាក់ មកពី១៧សញ្ជាតិផ្សេងៗគ្នា ចូលមកកម្សាន្តនៅកំពង់ផែព្រះសីហនុ តាមរយៈនាវាទេសចរណ៍មួយឈ្មោះ SEVEN SEAS VOYAGER។
នាវាទេសចរណ៍ឈ្មោះ សេវិន ស៊ី វ៉យអាជើ (SEVEN SEAS VOYAGER) របស់ប្រទេសប៉ាហាម៉ា (BAHAMAS) បានចូលចតនៅស្វយ័តក្រុងព្រះសីហនុ នាព្រឹកថ្ងៃទី២៤មេសា ឆ្នាំ២០២៥ ដើម្បីឱ្យភ្ញៀវទេសចរមកទស្សនាប្រទេសកម្ពុជា។ ក្នុងនោះ នាវាទេសចរណ៍ មាននាវិកសរុបចំនួន៤៥៥នាក់ (ស្រី ៩៧នាក់) មកពី៤៤សញ្ជាតិ និងភ្ញៀវទេសចរសរុបចំនួន៦០១នាក់ (ស្រី ៣២១នាក់) មកពី១៧សញ្ជាតិ ដោយក្នុងនោះជនជាតិសហរដ្ឋអាម៉េរិក មានចំនួន៤២២នាក់ ជាចំនួនច្រើនជាងគេ។
បន្ទាប់ពីមកទស្សនាកម្ពុជារយៈពេល១ថ្ងៃ នាវានឹងឆ្ពោះទៅប្រទេសវៀតណាមបន្ត។ សូមរំឭកថា កាលពីថ្ងៃទី២០មេសា ឆ្នាំ២០២៥ នេះ កម្ពុជាក៏ទើបតែទទួលបាននាវាទេសចរណ៍សញ្ជាតិ NORWAY មួយគ្រឿងមានផ្ទុកមនុស្សជាង៨៣៩នាក់ មានពី១៩សញ្ជាតិ។
សូមរំលឹកថា ចាប់ពីដើមខែមេសា មកដល់ថ្ងៃទី២៤មេសា ឆ្នាំ២០២៥ កម្ពុជាទទួលបាននាវាចំនួន៤ ចូលមកសំចតនៅកំពង់ផែព្រះសីហនុ ផ្ទុកភ្ញៀវសរុបប្រមាណជាង២៦០០នាក់ និងនាវិកចំនួន១៧១១នាក់៕
