ឯកឧត្តម សួស យ៉ារ៉ា អញ្ជើញចែករំលែកបទពិសោធន៍ជូនដល់និស្សិតសាកលវិទ្យាល័យប៊ែលធី អំពីវិស័យការទូតសភា
ភ្នំពេញ៖ ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា និងជាប្រធានក្រុមរដ្ឋសភាកម្ពុជានៃសភាវ័យក្មេង នាព្រឹកថ្ងៃទី២៣ ខែមេសា ឆ្នាំ២០២៥ បានអញ្ជើញចែករំលែកបទពិសោធន៍ លើប្រធានបទ “កិច្ចការបរទេស និងសហប្រតិបត្តិការអន្តរជាតិ នៃរដ្ឋសភា” ជូនដល់ ថ្នាក់ដឹកនាំ បុគ្គលិក សាស្ត្រាចារ្យ និងនិស្សិតសាកលវិទ្យាល័យប៊ែលធី សរុបចំនួន២,២៦៥នាក់ នៅសាកលវិទ្យាល័យ ប៊ែលធី អន្តរជាតិ ទីតាំងទី២ (ស្ពានអាកាស ចោមចៅ)ដែលមានអ្នកចូលរួមផ្ទាល់ចំនួន ១,១៣១នាក់ និងចូលរួមតាមប្រព័ន្ធនិម្មិត (Zoom) នៅទីតាំងទី១ (ទួលស្លែង) ចំនួន ១,១៣៤នាក់។
ក្នុងឱកាសនោះ ឯកឧត្តមបណ្ឌិត លី ឆេង តំណាងរាស្ត្រមណ្ឌលរាជធានីភ្នំពេញ ស្ថាបនិក និងជាអគ្គនាយក ប៊ែលធី គ្រុប បានគោរពថ្លែងអំណរគុណយ៉ាងជ្រាលជ្រៅចំពោះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ដែលបានអនុញ្ញាតជូន ឯកឧត្តម សួស យ៉ារ៉ា ផ្តល់កិត្តិយសអញ្ជើញមកចែករំលែកបទពិសោធន៍ការងារការដឹកនាំ និងចំណេះដឹងពាក់ព័ន្ធនឹងកិច្ចការបរទេស និងសហប្រតិបត្តិការអន្តរជាតិរបស់រដ្ឋសភា ជូនដល់ថ្នាក់ដឹកនាំ បុគ្គលិក សាស្ត្រាចារ្យ និងនិស្សិតប៊ែលធីនាពេលនេះ។ ឯកឧត្តមបណ្ឌិតក៏បានផ្តាំផ្ញើ សិក្ខាកាមទាំងអស់ត្រូវត្រងត្រាប់ស្តាប់ដោយយកចិត្តទុកដាក់ និងកត់ត្រានូវបទពិសោធន៍ និងចំណេះដឹងល្អៗសម្រាប់ទុកប្រើប្រាស់ជាទុនដើម្បីអភិវឌ្ឍសមត្ថភាពតទៅអនាគត។
ក្នុងឱកាសដ៏ឧត្តុង្គឧត្តមនោះ ឯកឧត្តម សួស យ៉ារ៉ា បានអញ្ជើញចែករំលែកបទពិសោធន៍ ជូនដល់ថ្នាក់ដឹកនាំបុគ្គលិកសាស្ត្រាចារ្យ និងនិស្សិតទាំងអស់ ដោយផ្តោតសំខាន់លើតួនាទីភារកិច្ចរបស់រដ្ឋសភាគឺមានមុខងារនីតិកម្ម ឬការតាក់តែងច្បាប់ មុខងារតាមដានត្រួតពិនិត្យការអនុវត្តច្បាប់ និងមុខងារភាពជាតំណាងរបស់ប្រជាពលរដ្ឋ ជាពិសេសរដ្ឋសភាក៏មានតួនាទីអាចធ្វើសេចក្តីស្នើច្បាប់បានផងដែរ។
ឯកឧត្តមបានមានប្រសាសន៍បន្តថា នាពេលបច្ចុប្បន្ននេះគឺជាសម័យកាលឌីជីថល ដែលធ្វើឱ្យសង្គមមានភាពជឿនលឿន ជាពិសេសធ្វើឱ្យមានការប្រកួតប្រជែងលើបច្ចេកវិទ្យា។ ឯកឧត្ដមក៏បានជម្រាបជូនអង្គសិក្ខាសាលាបានជ្រាបអំពីគោលនយោបាយការបរទេសរបស់កម្ពុជា ដែលមានចែងរដ្ឋធម្មនុញ្ញនៃព្រះរាជាណាចក្រកម្ពុជា ក៏ដូចជាយុទ្ធសាស្ត្រត្រីកោណ (១៩៩៨-២០០៣) យុទ្ធសាស្ត្រចតុកោណទាំង ៤ដំណាក់កាល (២០០៣-២០២៣) យុទ្ធសាស្ត្របញ្ចកោណដំណាក់កាលទី១ (២០២៣-២០២៨)ផងដែរ។
ឯកឧត្ដមបានបន្ថែមថា កម្ពុជាមានបទពិសោធន៍ក្នុងការកសាងសន្តិភាពជាក់ស្តែងរបស់ខ្លួន និងអាចផ្លាស់ប្តូរ បទពិសោធន៍ជាមួយនឹងបណ្តាសភានៅលើសកលលោកដោយផ្អែកលើគោលការណ៍៥យ៉ាងគឺ៖
១-សាមគ្គីភាពគ្នាក្នុងភាពចម្រុះ
២-ការគោរពគ្នាទៅវិញទៅមក ការយោគយល់គ្នាទៅវិញទៅមក ការទុកចិត្តគ្នាទៅវិញទៅមក និងការផ្តល់ផលប្រយោជន៍ទៅមកដើម្បីសន្តិភាព និងវិបុលភាព (M4P2)
៣-ភាពអត់ឱន យុត្តិធម៌ និងសមភាព
៤-ការរួមរស់ជាមួយគ្នាដោយសន្តិភាព និងការទប់ស្កាត់ជម្លោះ
៥-វប្បធម៌នៃសន្តិភាព។
ឯកឧត្តម សួស យ៉ារ៉ា បានគូសបញ្ចាក់ថា កន្លងមកគោលនយោបាយការទូតសភាគឺជាការទូតប្រជាជន ជាទូទៅកិច្ចការងារការទូតត្រូវគេយល់ឃើញថា ជាការងាររបស់ស្ថាប័ននីតិប្រតិបត្តិ ដែលអនុវត្តដោយក្រសួងការបរទេស ប៉ុន្តែនៅក្នុងទសវត្សន៍ចុងក្រោយនេះស្ថាប័ននីតិប្បញ្ញត្តិមានតួនាទីយ៉ាងសំខាន់ក្នុងភាពជាតំណាងរបស់ប្រជាជនដើម្បីពង្រីកចំណងមិត្តភាពជាមួយសភា នៃបណ្តាប្រទេសជាមិត្តទាំងក្នុងក្របខ័ណ្ឌទ្វេភាគី និងពហុភាគី។ វិស័យការទូតសភា (រដ្ឋសភា និងព្រឹទ្ធសភា) គឺជាការងារការទូតច្រកទី២ (Track ២) ហើយត្រូវបានអនុវត្តយ៉ាងទៀតទាត់តាមនីតិកាលនីមួយៗស្របទៅតាមគោលនយោបាយរបស់គណបក្សដឹកនាំ និងកម្មវិធីនយោបាយការទូតរបស់រាជរដ្ឋាភិបាលក្នុងគោលបំណងការពារផលប្រយោជន៍ជាតិ ឯករាជ្យ អធិបតេយភាព បូរណភាពទឹកដី និងការអភិវឌ្ឍសេដ្ឋកិច្ច ៕
