កង់បេរ៉ា៖ អូស្ត្រាលីនៅថ្ងៃព្រហស្បតិ៍ទី១០មេសានេះ បានបដិសេធសំណើរបស់មហាយក្សចិន ដើម្បីធ្វើការរួមគ្នាទប់ទល់នឹងពន្ធរបស់សហរដ្ឋអាម៉េរិក។ រដ្ឋធានីកង់បេរ៉ាអះអាងថា ខ្លួននឹងមិនចូលដៃជាមួយចិនឡើយ ផ្ទុយទៅវិញខ្លួននឹងបន្តធ្វើពិពិធកម្មពាណិជ្ជកម្ម និងកាត់បន្ថយការពឹងផ្អែកលើប្រទេសចិនដែលជាដៃគូពាណិជ្ជកម្មធំបំផុតរបស់ខ្លួន។
ឧបនាយករដ្ឋមន្ត្រី លោក រីឆាត ម៉ាឡេស បានប្រាប់ទូរទស្សន៍ Sky News ថាយើងនឹងមិនចាប់ដៃជាមួយប្រទេសចិន ទាក់ទងនឹងការប្រកួតប្រជែងណាមួយដែលកំពុងកើតឡើងនៅក្នុងពិភពលោកនោះទេ។ លោកសំដៅលើសំណើរបស់ឯកអគ្គរដ្ឋទូតចិនសម្រាប់ប្រទេសទាំង២ ឱ្យចាប់ដៃគ្នាលើពាណិជ្ជកម្ម។ លោកបន្តថា៖«យើងមិនធ្វើដូច្នេះទេ។ អ្វីដែលយើងកំពុងធ្វើ គឺការស្វែងរកផលប្រយោជន៍ជាតិរបស់អូស្ត្រាលី និងធ្វើពិពិធកម្មពាណិជ្ជកម្មរបស់យើងជុំវិញពិភពលោក។
ឧបនាយករដ្ឋមន្ត្រីរូបនេះសង្កត់ធ្ងន់ថា អូស្ត្រាលីនឹងកសាងភាពធន់នឹងសេដ្ឋកិច្ចរបស់ខ្លួនតាមរយៈការពង្រឹងទំនាក់ទំនងពាណិជ្ជកម្មជាមួយសហភាពអឺរ៉ុប ឥណ្ឌូណេស៊ី ឥណ្ឌា អង់គ្លេស និងមជ្ឈិមបូព៌ា។
ការលើកឡើងរបស់លោក ម៉ាឡេស ធ្វើឡើងបន្ទាប់ពីឯកអគ្គរដ្ឋទូតចិនប្រចាំនៅអូស្ត្រាលី លោក ស៊ាវ ឈៀន ជំរុញឱ្យរដ្ឋធានីកង់បេរ៉ាសហការជាមួយរដ្ឋធានីប៉េកាំង ដើម្បីការពារប្រព័ន្ធពាណិជ្ជកម្មសកលពហុភាគី។
លោក ស៊ាវ បានរៀបរាប់ថា នៅក្រោមកាលៈទេសៈថ្មី ចិនបានត្រៀមខ្លួនរួចជាស្រេចដើម្បីចូលរួមជាមួយប្រទេសអូស្ត្រាលី និងសហគមន៍អន្តរជាតិ ដើម្បីរួមគ្នាឆ្លើយតបទៅនឹងការផ្លាស់ប្ដូររបស់ពិភពលោក។
ប្រធានាធិបតីសហរដ្ឋអាម៉េរិក ដូណាល់ ត្រាំ បានប្រកាសផ្អាករយៈពេល៣ខែពេញលើការយកពន្ធគយបដិការ (ទៅវិញទៅមក) ដែលបានចូលជាធរមាននៅពាក់កណ្តាលអធ្រាត្រ លើកលែងតែគូប្រជែងស៊ីសាច់ហុតឈាមចិន។ លោកបានបង្កើនអត្រាពន្ធលើការនាំចូលរបស់ចិនរហូតដល់១២៥ភាគរយ ដែលប្រៀបដូចជាយកសាំងចាក់បន្ថែមលើភ្លើងសង្គ្រាមពាណិជ្ជកម្ម។ នោះអាចបង្កហានិភ័យដល់អូស្ត្រាលី ដែលដឹកជញ្ជូនទំនិញជិតមួយភាគបីទៅកាន់ប្រទេសចិន។ ចំណែក ការនាំចេញទៅកាន់សហរដ្ឋអាម៉េរិកមានតិចជាង៥ ភាគរយនៃការនាំចេញទំនិញសរុបរបស់ប្រទេសអូស្ត្រាលី។
ធនាគារកណ្តាលរបស់ប្រទេសអូស្ត្រាលី បានព្រមានពីភាពមិនច្បាស់លាស់ដែលកំពុងបន្តលើពន្ធគយ និងការរឹតបន្តឹងពាណិជ្ជកម្មផ្សេងទៀតរវាងសហរដ្ឋអាម៉េរិក និងប្រទេសដែលមានសេដ្ឋកិច្ចសំខាន់ៗផ្សេងទៀតអាចជះឥទ្ធិពលយ៉ាងខ្លាំងដល់ការវិនិយោគអាជីវកម្ម និងការសម្រេចចិត្តលើការចំណាយគ្រួសារនៅក្នុងប្រទេស។ បុរសសេដ្ឋកិច្ច ត្រាំ បានដាក់ពន្ធឯកតោភាគី១០ភាគរយលើប្រទេសអូស្ត្រាលី ជាកម្រិតទាបនៃពន្ធទៅវិញទៅមកសម្រាប់ការនាំចូលទាំងអស់ទៅកាន់សហរដ្ឋអាម៉េរិក។
