សម្តេចពញាចក្រី ហេង សំរិន រៀបចំប្រារព្ធពិធីសូត្រមន្តបង្សុកូលឧទ្ទិសកុសលផលបុណ្យ ជូនវិញ្ញាណក្ខន្ធញាតិសន្តាន នៅវត្តគីរីសុវណ្ណរាមហៅវត្តថ្កូវ ឃុំកក់ ស្រុកពញាក្រែក

ភ្នំពេញ៖ នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរដែលនឹងឈានចូលមកដល់ចាប់ពីថ្ងៃទី១៤ ដល់ថ្ងៃទី១៦ ខែមេសាឆ្នាំ២០២៥ខាងមុខនេះ សម្តេចអគ្គមហាពញាចក្រី ហេង សំរិន ប្រធានកិត្តិយស នៃក្រុមឧត្តមប្រឹក្សាផ្ទាល់ព្រះមហាក្សត្រ និងសម្តេចធម្មវិសុទ្ធវង្សា សៅ ទី ហេង សំរិន ព្រមទាំងឯកឧត្តម វង សូត អនុប្រធានទី២រដ្ឋសភា និងលោកជំទាវ ហេង ពៅ ព្រមទាំងបុត្រា បុត្រី ចៅប្រុស ចៅស្រី និងក្រុមគ្រួសារ បាននិមន្តព្រះសង្ឃ ដើម្បីប្រារព្ធពិធីសូត្រមន្តបង្សុកូល រាប់បាត្រប្រគេនព្រះសង្ឃ នៅវត្តគីរីសុវណ្ណរាមហៅវត្តថ្កូវ ស្ថិតនៅភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃ្មុំ នាព្រឹកថ្ងៃទី៩ ខែមេសា ឆ្នាំ២០២៥។

សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា សៅ ទី ហេង សំរិន តែងបានរៀបចំពិធីនេះទៅតាមទំនៀមទំលាប់ប្រពៃណីព្រះពុទ្ធសាសនា ដើម្បីឧទ្ទិសកុសលផលបុណ្យជូនទៅដល់បុព្វការីជន មាន មាតា បិតា ជីដូន ជីតា ញាតិកាទាំង៧សន្ដានដែលបានចែកឋានទៅកាន់លោកខាងមុខ និងសូមឱ្យដួងវិញ្ញាណក្ខន្ធបុព្វការីជនទាំងឡាយ បានសោយសុខក្នុងឋានបរមសុខកុំបីអាក់ខានឡើយ។

សម្តេចអគ្គមហាពញាចក្រី ក៏សូមបួងសួងដល់គុណបុណ្យព្រះរតនត្រ័យកែវទាំងបីវត្ថុសក្តិសិទ្ធទាំងឡាយក្នុងលោក និងទេវតាថែរក្សាទឹកដីព្រះរាជាណាចក្រកម្ពុជានិងសូមទេវតាឆ្នាំថ្មីឆ្នាំម្សាញ់ ព្រះនាម «គោរាគៈទេវី» សូមតាមជួយអភិបាលប្រោសព្រំសាធុការពរជ័យគ្រប់ប្រការ ជូនចំពោះបងប្អូនជនរួមជាតិ កូនប្រុស កូនស្រី ចៅប្រុសចៅស្រីជាទីស្រឡាញ់ បានសមប្រកបដោយព្រះពុទ្ធពរទាំងបួនប្រការគឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។

ឆ្លៀតនៅក្នុងឱកាសនោះដែរ ឯកឧត្តម វង សូត អនុប្រធានទី២រដ្ឋសភា ក៏បានផ្តាំផ្ញើដល់អាជ្ញាធរមូលដ្ឋាន ពិសេសលោកអភិបាលស្រុកពញាក្រែកត្រូវសហការជាមួយមន្ទីរសាធារណការខេត្តពិនិត្យមើលផ្លូវជាតិលេខ៨ត្រង់ភូមិអន្លង់ជ្រៃ ដែលមានសភាពខូចខាតខ្លាំង និងត្រូវសហការជាមួយក្រុមហ៊ុនចិនដែលកំពុងអភិវឌ្ឍន៍នៅតំបន់នេះ ដើម្បីជួសជុលផ្លូវខូចខាតទ្បើងវិញ ព្រោះរដូវវស្សាជិតមកដល់ហើយ។ ម្យ៉ាងទៀតផ្លូវជាតិលេខ៨នេះ គឺជាផ្លូវមានសកម្មភាពចរាចរណ៍មមាញឹក ដោយសារមានប្រជាពលរដ្ឋធ្វើដំណើរឆ្លងកាត់ច្រើន ចេញចូលទៅតំបន់ទេសចរណ៍នៅភូមិភាគឥសានផងដែរ ៕