ប្រជាជនឥណ្ឌាជិត ៣០០នាក់ ត្រូវបានបញ្ជូនត្រឡប់ទៅប្រទេសកំណើតវិញ បន្ទាប់ពីដោះលែងពីមជ្ឈមណ្ឌលឆបោក នៅមីយ៉ាន់ម៉ា
បាងកក៖ ប្រជាជនឥណ្ឌាជិត៣០០នាក់ ត្រូវបានធ្វើមាតុភូមិនិវត្តន៍ត្រឡប់ទៅប្រទេសកំណើតវិញតាមរយៈប្រទេសថៃ បន្ទាប់ពីត្រូវបានដោះលែងពីមជ្ឈមណ្ឌលឆបោកក្នុងប្រទេសមីយ៉ាន់ម៉ា។
អាជ្ញាធរមីយ៉ាន់ម៉ា ក្រោមសម្ពាធពីសម្ព័ន្ធមិត្តចិន បានបើកប្រតិបត្តិការបង្រ្កាបយ៉ាងខ្លាំងក្នុងប៉ុន្មានសប្តាហ៍ថ្មីៗ លើមជ្ឈមណ្ឌលឆបោកដែលបានរីកដុះដាលនៅតំបន់ព្រំដែនគ្មានច្បាប់របស់ប្រទេស។ មនុស្សប្រហែល៧000នាក់មកពីប្រទេសជាង២០ ត្រូវបានដោះលែង ក្នុងនោះភាគច្រើនជាជនជាតិចិន។ យ៉ាងណា មនុស្សជាច្រើនបាននិងកំពុងធ្លាក់ខ្លួនក្នុងស្ថានភាពលំបាក នៅក្នុងជំរំបណ្តោះអាសន្ននៅព្រំដែនភូមា-ថៃ។
មន្ត្រីឥណ្ឌាមួយក្រុម បានឆ្លងចូលទៅក្នុងប្រទេសមីយ៉ាន់ម៉ា ដើម្បីរួមដំណើរជាមួយរថយន្តក្រុងចំនួន៧គ្រឿង ដឹកជនជាតិឥណ្ឌាដែលត្រូវបានដោះលែង ទៅកាន់អាកាសយានដ្ឋានម៉ែសុត ភាគពាយព្យនៃប្រទេសថៃ។ រដ្ឋាភិបាលឥណ្ឌា បានបញ្ជូនយន្តហោះដឹកជញ្ជូន C-17 ដើម្បីដឹកបុរស២៦៦នាក់ និងស្ត្រី១៧នាក់ត្រឡប់ទៅស្រុកកំណើតវិញ ដោយជើរហោះហើរទីពីរ នឹងត្រូវហោះហើរនៅថ្ងៃអង្គារ ដែលមានមនុស្ស២៥៧នាក់។
ចិនបានធ្វើមាតុភូមិនិវត្តន៍ជនជាតិរបស់ខ្លួនជាង២000នាក់ ដែលត្រូវបានដោះលែងពីមជ្ឈមណ្ឌលឆបោកមីយ៉ាន់ម៉ាតាមរយៈប្រទេសថៃ ចាប់តាំងពីប្រទេសទាំងបីចាប់ផ្តើមការបង្ក្រាបកាលពីចុងខែមុន។ មជ្ឈមណ្ឌលឆបោក បានរីកដុះដាលដូចផ្សិតនៅតាមតំបន់ព្រំដែនរបស់មីយ៉ាន់ម៉ា ក្នុងរយៈពេលប៉ុន្មានឆ្នាំចុងក្រោយនេះ។ ពលករបរទេសរាប់ពាន់នាក់ផុងខ្លួនធ្វើការនៅមជ្ឈមណ្ឌលឆបោកនេះ។ កម្មករជាច្រើននិយាយថា ពួកគេត្រូវបានគេបោកបញ្ឆោតឱ្យចូលធ្វើការ ហើយរងការវាយដំ និងការបំពាន៕
