នៅថ្ងៃទី៧ ខែមីនា ក្នុងសន្និសីទសារព័ត៌មានរបស់រដ្ឋមន្ត្រីការបរទេស ដែលបើកធ្វើក្នុងអំឡុងពេលមហាសន្និបាតប្រចាំឆ្នាំនៃសភាតំណាងប្រជាជនទូទាំងប្រទេសចិន លោក Wang Yi សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិននិងជារដ្ឋមន្ត្រីការបរទេសចិន បានធ្វើការអធិប្បាយយ៉ាងស្មោះសនិងស៊ីជម្រៅអំពីបញ្ហាចំណុចក្តៅចំនួនជាង២០ ដែលពាក់ព័ន្ធដល់គ្រប់វិស័យ ដូចជាទំនាក់ទំនងរវាងប្រទេសធំ បញ្ហាចំណុចក្តៅក្នុងតំបន់ និងអភិបាលកិច្ចសកលជាដើម ។ អ្នកវិភាគបានវាយតម្លៃដោយប្រើការបង្ហាញឥរិយាបថក្នុងសន្និសីទលើកនេះថា ក្នុងពិភពលោកដែលមានភាពរង្គោះរង្គើនិងពោពេញទៅដោយភាពមិនប្រាកដប្រាជា ប្រទេសចិនជាកម្លាំងឋិតថេរដ៏កម្រ ដែលអាចធ្វើឱ្យពិភពលោកស្ងប់ចិត្ត។
ហេតុអ្វីបានជាប្រទេសចិនអាចទទួលបានទំនុកចិត្តពីពិភពលោក ? តើកម្លាំងដ៏ឋិតថេរនេះ មានភាពឋិតថេរនៅត្រង់ណា ?
“យើងមិនដែលបង្ករឿងឡើយ ហើយក៏មិនខ្លាចការបង្ករឿងដែរ ” កម្លាំងដ៏ឋិតថេរនេះ គឺនៅត្រង់ការគាំពារសិទ្ធិនិងផលប្រយោជន៍របស់ប្រទេសជាតិយ៉ាងមុតមាំ ។ ក្នុងសន្និសីទសារព័ត៌មាន ទាក់ទិននឹងបញ្ហាអាមេរិកដំឡើងពន្ធគយជុំថ្មីមកលើប្រទេសចិន រដ្ឋមន្ត្រីការបរទេសចិនបានចោទសួរ៥សំណួរជាប់ៗគ្នា ហើយនិយាយត្រង់ៗថា អាមេរិកបានធ្លាក់ក្នុង “អន្ទាក់ពន្ធគយ”ដែលបង្កើតដោយខ្លួនឯង ។ ខណៈពេលឆ្លើយតបនឹងការគាបសង្កត់ដោយគ្មានហេតុផលលើវិស័យបច្ចេកវិទ្យា ប្រទេសចិនបានយក “រឿងយុទ្ធសិល្ប៍ទេវបុត្រណាចា”ដើម្បីពិពណ៌នាអំពីឆន្ទៈវាយទម្លុះការបិទខ្ទប់ ។ ប្រឈមនឹងការបំពានគោលការណ៍ចិនតែមួយ ប្រទេសចិនបញ្ជាក់យ៉ាងជាក់លាក់ថា “ប្រទេសចិនប្រាកដជានឹងសម្រេចបាននូវការបង្រួបបង្រួមជាតិជាក់ជាមិនខាន” ។ល។ អាកប្បកិរិយាយ៉ាងស្មោះត្រង់បានបញ្ចេញសញ្ញាយ៉ាងច្បាស់លាស់ថា ទោះជាដាក់សម្ពាធខ្លាំងប៉ុនណា គំរាមកំហែងនិងឆបោកយ៉ាងណាក៏ដោយ ក៏មិនអាចរារាំងជំហានឆ្ពោះទៅមុខរបស់ប្រទេសចិនបានឡើយ ។
ការអភិវឌ្ឍជាកូនសោមេសម្រាប់ដោះស្រាយបញ្ហាទាំងអស់ “កម្លាំងដ៏ឋិតថេរ”របស់ប្រទេសចិនក៏បានដើរតួនាទីដូចគ្នាផងដែរ ។ នៅឆ្នាំ២០២៤ សេដ្ឋកិច្ចចិនសម្រេចបាននូវកំណើន៥ភាគរយ អត្រារួមចំណែកដល់កំណើនសេដ្ឋកិច្ចសកលបានរក្សានៅប្រហែល៣០ភាគរយ ។ លើវិស័យបញ្ញាសិប្បនិម្មិតដែលកំពុងមានភាពសន្ទុះយ៉ាងខ្លាំងនាពេលបច្ចុប្បន្ននេះ ប្រទេសចិនបានលើកឡើងនូវ «គំនិតផ្តួចផ្តើមស្តីពីអភិបាលកិច្ចសកលលើវិស័យបញ្ញាសិប្បនិម្មិត» ក្នុងន័យជៀសវាងកុំឱ្យការច្នៃប្រឌិតថ្មីខាងបច្ចេកវិទ្យាក្លាយទៅជា “ល្បែងរបស់ប្រទេសជឿនលឿននិងអ្នកមាន” ។ ប្រឈមនឹងការងើបឡើងវិញនៃការពារនិយម ប្រទេសចិនបានប្រកាន់ខ្ជាប់ការបើកទូលាយ ធ្វើឱ្យ “ការធ្វើទេសចរណ៍នៅចិន” ក្លាយជាភាពទាន់សម័យលើឆាកអន្តរជាតិ ។
បច្ចុប្បន្ននេះ ឯកតោភាគីនិយមបានងើបឡើងវិញ អំណាចផ្តាច់ការខាងនយោបាយកាន់តែខ្លាំងឡើងៗ កិត្យានុភាពរបស់អង្គការសហប្រជាជាតិរងការចោទជាមន្ទិលសង្ស័យនិងការសាកល្បង ។ ក្នុងពេលវេលាដ៏គន្លឹះ ប្រទេសចិនបានបង្ហាញអាកប្បកិរិយាយ៉ាងច្បាស់លាស់ជាថ្មីម្តងទៀតថា នឹងឈរនៅម្ខាងសច្ចធម៌អន្តរជាតិយ៉ាងមុតមាំ ប្រឆាំងអំណាចផ្តាច់ការនិងអនុត្តរភាពយ៉ាងដាច់ខាត គាំពារយ៉ាងមុតមាំនូវតួនាទីជាស្នូលរបស់អង្គការសហប្រជាជាតិ ធ្វើជាសសរទ្រទ្រង់នៃប្រព័ន្ធពហុភាគី ក៏ដូចជាធ្វើជាអ្នកបញ្ចេញសំឡេងដ៏យុត្តិធម៌របស់ប្រទេសសកលខាងត្បូង ។
បើនិយាយចំពោះចិននិងពិភពលោក ឆ្នាំ២០២៥ជាឆ្នាំមិនធម្មតា។ ក្នុងពិភពលោកដែលមានភាពរង្គោះរង្គើ ភាពប្រាកដប្រជាធំបំផុត គឺភាពមិនប្រាកដប្រជា ។ ប្រទេសចិននឹងទប់ទល់ “កម្លាំងអថេរ”ក្នុងពិភពលោកដែលមានភាពច្របូលច្របល់តាមរយៈកម្លាំងដ៏ឋិតថេរ”នៃការអភិវឌ្ឍដោយសន្តិភាព ធ្វើឱ្យអនាគតក្លាយទៅជាអនាគតរបស់មនុស្សគ្រប់គ្នា ៕
