ឯកឧត្តមបណ្ឌិត ហ៊ឺ វីរៈ ផ្ដាំផ្ញើបងប្អូនខ្មែរឥស្លាមត្រូវសម្អាតអនាម័យខ្លួនប្រាណ សម្អាតបរិស្ថានជុំវិញផ្ទះ និងបរិភោគអាហារប្រកបដោយអនាម័យ ព្រោះវាជាផ្នែកមួយធ្វើឱ្យយើងជៀសផុតពីជំងឺផ្សេងៗបាន
ភ្នំពេញ៖ នាថ្ងៃទី៦ ខែមីនា ឆ្នំា២០២៥ ឯកឧត្តមវរជ្ជ. សុះ មុះសិន អ្នកតំណាងរាស្ត្រមណ្ឌលខេត្តកណ្ដាល និងជាប្រធានសមាគមន៍និស្សិតមូស្លីមកម្ពុជា និងឯកឧត្តមបណ្ឌិត ហ៊ឺ វីរៈ អ្នកតំណាងរាស្ត្រមណ្ឌលខេត្តកំពង់ឆ្នាំង អញ្ជើញជាអធិបតីភាព ក្នុងពិធីចែកកញ្ចប់អាហារស្រាយបួស ជូនបងប្អូនខ្មែរឥស្លាមសម្រាប់ខែរ៉ម៉ាឌន ដែលជាជំនួយរបស់សហគមន៍និស្សិតមុស្លីមកម្ពុជាចំនួន ១៥០គ្រួសារ នៅភូមិទួល ឃុំឈូកស ស្រុកកំពង់ត្រឡាច ខេត្តកំពង់ឆ្នាំង ក្នុងគ្រួសារនីមួយៗទទួលបានអង្ករ ១២គីឡូក្រាម មី ១០កញ្ចប់ ទឹកដោះគោខាប់ ២កំប៉ុង ស្ករស ១គីឡូក្រាម និងអូវ៉ាន់ទីន ១កំប៉ុង។
ពិធីនេះមានការអញ្ជើញចូលរួមពី ឯកឧត្តមវេជ្ជបណ្ឌិត សាន់ សាប់អី រដ្ឋលេខាធិការក្រសួងសុខាភិបាល ឯកឧត្តម សុះ ស៊ុបអុី អនុរដ្ឋលេខាធិការក្រសួងវប្បធម៌និងវិចិត្រសិល្បៈ ឯកឧត្តម សេន ម៉ាណូ សមាជិកក្រុមប្រឹក្សាខេត្តកំពង់ឆ្នាំង រួមនឹងលោកក្រុមប្រឹក្សាស្រុក អភិបាលរង នៃគណៈអភិបាលស្រុកកំពង់ត្រឡាច និងរដ្ឋបាលភូមិ-ឃុំ។
ក្នុងឱកាសនោះ ឯកឧត្តម សុះ មុះសិន បាននាំប្រសាសន៍ផ្ដាំផ្ញើរបស់ថ្នាក់ដឹកនាំមកសួរសុខទុក្ខបងប្អូនប្រជាពលរដ្ឋ។ បន្ថែមពីលើនោះ ឯកឧត្តមបណ្ឌិត ហ៊ឺ វីរៈ បានកោតសរសើរចំពោះបងប្អូនប្រជាពលរដ្ឋខ្មែរឥស្លាមតែងតែមានសាមគ្គីភាព ជួយយកអាសារគ្នាទៅវិញទៅមក គោរព និងប្រតិបត្តិសាសនាបានយ៉ាងល្អខ្ជាប់ខ្ជួន។
ឯកឧត្តមបណ្ឌិត បានមានប្រសាសន៍ផ្ដាំផ្ញើបងប្អូនខ្មែរឥស្លាមត្រូវសម្អាតអនាម័យខ្លួនប្រាណ សម្អាតបរិស្ថានជុំវិញផ្ទះ និងបរិភោគអាហារប្រកបដោយអនាម័យ ព្រោះវាជាផ្នែកមួយធ្វើឱ្យយើងជៀសផុតពីជំងឺផ្សេងៗបាន៕
