ចិន រក្សាគោលដៅកំណើនសេដ្ឋកិច្ចរបស់ខ្លួនសម្រាប់ឆ្នាំនេះមិនផ្លាស់ប្ដូរ នៅប្រហែល ៥ភាគរយ

ប៉េកាំង៖ ចិនបានរក្សាគោលដៅកំណើនសេដ្ឋកិច្ចរបស់ខ្លួនសម្រាប់ឆ្នាំនេះមិនផ្លាស់ប្ដូរនៅប្រហែល៥ ភាគរយ ដោយប្តេជ្ញានូវធនធានសារពើពន្ធច្រើនជាងឆ្នាំមុន ដើម្បីទប់ទល់នឹងសម្ពាធបរិត្តផរណា និងកាត់បន្ថយផលប៉ះពាល់នៃការដំឡើងពន្ធពាណិជ្ជកម្មរបស់សហរដ្ឋអាម៉េរិក។

គោលដៅនេះត្រូវបានបង្ហាញដោយនាយករដ្ឋមន្ត្រីចិន លោក លី ឈាង នៅឯការបើកកិច្ចប្រជុំប្រចាំឆ្នាំនៃសភាប្រជាជនជាតិ (NPC) ។ លោក លី បានលើកឡើងថា៖«បរិយាកាសនយោបាយខាងក្រៅកាន់តែស្មុគស្មាញ និងធ្ងន់ធ្ងរអាចជះឥទ្ធិពលកាន់តែខ្លាំងលើប្រទេសចិនក្នុងវិស័យដូចជា ពាណិជ្ជកម្ម វិទ្យាសាស្រ្ត និងបច្ចេកវិទ្យា»។ សង្គ្រាមពាណិជ្ជកម្មដែលបង្កឡើងដោយរដ្ឋបាលរបស់ប្រធានាធិបតីអាម៉េរិក លោក ដូណាល់ ត្រាំ កំពុងគម្រាមកំហែងបំផ្លាញសេដ្ឋកិច្ចរបស់ប្រទេសចិន។

មន្ត្រីចិនកំពុងស្ថិតក្រោមសម្ពាធដើម្បីដាក់ចេញនូវគោលនយោបាយបង្កើនប្រាក់ចំណូលសម្រាប់អ្នកប្រើប្រាស់ និងកាត់បន្ថយការពឹងផ្អែករបស់សេដ្ឋកិច្ចធំទីពីររបស់ពិភពលោកលើការនាំចេញ និងការវិនិយោគសម្រាប់កំណើន។ ប្រទេសមានសេដ្ឋកិច្ចធំជាងគេទី២ លើពិភពលោក ចិនក៏មានគោលដៅសម្រាប់ឱនភាពថវិកាចំនួន៤ភាគរយ នៃផលិតផលក្នុងស្រុកសរុប (GDP) នៅឆ្នាំ២០២៥ កើនឡើងពី៣ ភាគរយ ក្នុងឆ្នាំ២០២៤ ដោយសន្យាថា នឹងបង្កើតផែនការសកម្មភាពពិសេស ដើម្បីជំរុញការប្រើប្រាស់។ ទន្ទឹមគ្នានោះ រដ្ឋធានីប៉េកាំងគ្រោងនឹងចេញមូលបត្របំណុលពិសេសចំនួន១,៣ពាន់ពាន់លានយ័ននៅក្នុងឆ្នាំនេះ កើនឡើងពី១ពាន់ពាន់លានយ័ននៅឆ្នាំ២០២៤។ រដ្ឋបាលក្នុងតំបន់នឹងត្រូវបានអនុញ្ញាតឱ្យចេញមូលបត្របំណុលពិសេសចំនួន៤,៤ពាន់ពាន់លានយ័ន កើនឡើងពី៣,៩ ពាន់ពាន់លានយ័ន។

អ្នកសេដ្ឋកិច្ចបាននឹងកំពុងជំរុញឱ្យរដ្ឋធានីប៉េកាំងរៀបចំរចនាសម្ព័ន្ធឡើងវិញសម្រាប់រយៈពេលវែងនៃការបែងចែកធនធាននៅក្នុងសេដ្ឋកិច្ច ជាមួយនឹងវិធានការដ៏ស៊ីជម្រៅបន្ថែមទៀត ដែលគិតគូរឡើងវិញនូវប្រព័ន្ធពន្ធ ដីធ្លី និងហិរញ្ញវត្ថុរបស់ខ្លួន ដើម្បីត្បាញសំណាញ់សុវត្ថិភាពសង្គមកាន់តែរឹងមាំ។ រដ្ឋធានីប៉េកាំងក៏មានគម្រោងប្រើប្រាស់មូលនិធិបំណុលពិសេសចំនួន៥០០ពាន់លានយ័ន ដើម្បីដាក់ទុនវិនិយោគឡើងវិញនូវធនាគាររដ្ឋសំខាន់ៗ និង ២០០ពាន់លានយ័នលើការគាំទ្រការធ្វើឱ្យប្រសើរឡើងនូវឧបករណ៍ផលិតកម្ម។

គួរជម្រាបថា បុរសសេដ្ឋកិច្ច ត្រាំ ​បាន​ដំឡើង​ពន្ធ​ទ្វេ​ដង​ដែល​លោក​បាន​ដាក់​កាលពី​ខែ​មុន​លើ​ផលិតផល​ចិន​ដល់​ទៅ២០ភាគរយ។ ជាការឆ្លើយតប មហាអំណាចសេដ្ឋកិច្ចលំដាប់ទី២លើសកលលោកចិនបានសងសឹកជាមួយនឹងការយកពន្ធរហូតដល់១៥ភាគរយលើការនាំចេញកសិផលរបស់សហរដ្ឋអាម៉េរិក។ រដ្ឋធានីប៉េកាំងក៏បានបន្ថែមចំនួនក្រុមហ៊ុនអាម៉េរិកដែលស្ថិតនៅក្រោមការគ្រប់គ្រងការនាំចេញ និងការរឹតបន្តឹងផ្សេងទៀតប្រហែល២៤ក្រុមហ៊ុន៕