លោក អេម៉ានុយអែល ម៉ាក្រុង៖ បារាំង និងអង់គ្លេសកំពុងស្នើឱ្យមានបទឈប់បាញ់រយៈពេលមួយខែក្នុងប្រទេសអ៊ុយក្រែន

ប៉ារីស៖ លោក អេម៉ានុយអែល ម៉ាក្រុង ប្រធានាធិបតីបារាំង បានឱ្យដឹងកាលពីថ្ងៃអាទិត្យទី២ ខែមីនាថា បារាំង និងអង់គ្លេសកំពុងស្នើឱ្យមានបទឈប់បាញ់រយៈពេលមួយខែក្នុងប្រទេសអ៊ុយក្រែនលើអាកាស សមុទ្រនិងលើហេដ្ឋារចនាសម្ព័ន្ធថាមពល។

នៅក្នុងបទសម្ភាសជាមួយកាសែត Le Figaro របស់ប្រទេសបារាំង លោក ម៉ាក្រុង បាននិយាយថា៖«ដំណាក់កាលដំបូងនៃកិច្ចព្រមព្រៀងសន្តិភាពជំនួសបារាំង – អង់គ្លេសសម្រាប់អ៊ុយក្រែននឹងពាក់ព័ន្ធនឹងបទឈប់បាញ់លើអាកាស លើសមុទ្រ និងហេដ្ឋារចនាសម្ព័ន្ធថាមពល ដែលមានរយៈពេលមួយខែ»។

លោក បន្ត ថា ដំណាក់ កាល ទី ពីរ នឹង មាន ការ ចូល រួម ពី កងទ័ព នៅ លើ ដី។ អ្នក រក្សា សន្តិភាព នឹង ត្រូវ ដាក់ ពង្រាយ នៅ ពេល ក្រោយ ដោយ លោក បាន បន្ថែម ថា នឹង មិន មាន ទាហាន អឺរ៉ុប នៅ លើ ទឹកដី អ៊ុយក្រែន ក្នុង ប៉ុន្មាន សប្តាហ៍ ខាង មុខ នេះ ទេ។

លោក ម៉ាក្រុង ក៏បានស្នើថា បណ្តាប្រទេសនៅអឺរ៉ុបគួរតែបង្កើនការចំណាយលើវិស័យការពារជាតិឱ្យនៅចន្លោះពី៣ ទៅ៣,៥ ភាគរយនៃផលិតផលក្នុងស្រុកសរុប។

លោកបានប្រាប់កាសែត Le Figaroថា៖«សម្រាប់រយៈពេលបីឆ្នាំ ជនជាតិរុស្ស៊ីបានចំណាយ១០ ភាគរយនៃផលិតផលក្នុងស្រុកសរុបរបស់ពួកគេលើការការពារជាតិ។ ដូច្នេះ យើង ត្រូវ រៀបចំ សម្រាប់ អ្វី ដែល មាន បន្ទាប់ » ។

លោក ម៉ាក្រុង បាននិយាយទៅកាន់កាសែត Le Figaro នៅពេលលោកជិះយន្តហោះទៅកាន់រដ្ឋធានីឡុងដ៍សម្រាប់កិច្ចប្រជុំជាមួយមេដឹកនាំអឺរ៉ុប ដែលកោះប្រជុំដោយនាយករដ្ឋមន្ត្រីអង់គ្លេស លោក គៀរ ស្តាមឺ (Keir Starmer) ដើម្បីជំរុញកិច្ចខិតខំប្រឹងប្រែងក្នុងការបង្កើតផែនការសន្តិភាពអ៊ុយក្រែន។

កិច្ចប្រជុំកំពូលនៅរដ្ឋធានីឡុងដ៍បានកើតឡើងពីរថ្ងៃបន្ទាប់ពីកិច្ចប្រជុំសេតវិមានរបស់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី ជាមួយប្រធានាធិបតីសហរដ្ឋអាម៉េរិកលោក ដូណាល់ ត្រាំ បានបញ្ចប់ដោយភាពចម្រូងចម្រាស។

លោក ស្តាមឺ បានបញ្ជាក់ម្ដងទៀតក្នុងអំឡុងពេលសន្និសីទសារព័ត៌មានកាលពីថ្ងៃអាទិត្យថា ប៉ុន្តែវានៅតែត្រូវការការគាំទ្រពីអាម៉េរិក។ នាយករដ្ឋមន្ត្រីអង់គ្លេសរូបនេះបានបញ្ជាក់កាលពីថ្ងៃអាទិត្យថា មេដឹកនាំអឺរ៉ុបបានយល់ព្រមរៀបចំផែនការសន្តិភាពអ៊ុយក្រែន ដើម្បីបង្ហាញដល់សហរដ្ឋអាម៉េរិក ដែលជាជំហានដ៏សំខាន់មួយសម្រាប់រដ្ឋធានីវ៉ាស៊ីនតោន ដើម្បីអាចផ្តល់ការធានាសន្តិសុខដល់រដ្ឋធានីកៀវ។

គួរជម្រាបថា អ៊ុយក្រែន និងចក្រភពអង់គ្លេស បានបង្ហាញកិច្ចព្រមព្រៀងប្រាក់កម្ចីចំនួន២,៨៤ពាន់លានដុល្លារ ដើម្បីគាំទ្រដល់សមត្ថភាពការពារជាតិរបស់អ៊ុយក្រែន ដែលត្រូវសងវិញដោយប្រើប្រាស់ទ្រព្យសម្បត្តិបង្កករបស់រុស្ស៊ី៕