NESDC បង្ហាញថា កំលុងឆ្នាំ២០២៤ ប្រជាជនថៃ ១២,៣លាននាក់ បានជួបប្រទះបញ្ហាសុខភាព បណ្តាលមកពីការបំពុលបរិយាកាស

បាងកក៖ ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិរបស់ប្រទេសថៃ ហៅកាត់ថា NESDC បង្ហាញថា កំលុងឆ្នាំ២០២៤ ប្រជាជនថៃចំនួន១២,៣លាននាក់ បានជួបប្រទះបញ្ហាសុខភាពបណ្តាលមកពីការបំពុលបរិយាកាស ដោយតំបន់ភាគខាងជើងមានអត្រាខ្ពស់បំផុត បន្ទាប់មក គឺតំបន់ភាគឦសាន។

ក្រុមប្រឹក្សា បានរាយការណ៍ថា ក្នុងរយៈពេលត្រឹមតែពីរខែនៃឆ្នាំ២០២៥ ចំនួនប្រជាជនរងផលប៉ះពាល់កើនឡើងលើសពី៩សែន៨ម៉ឺននាក់។ NESDC បានធ្វើបទបង្ហាញអំពីស្ថានភាពសង្គមក្នុងត្រីមាសទី៤របស់ប្រទេសថៃ និងទិដ្ឋភាពទូទៅសម្រាប់ឆ្នាំ២០២៤ ដោយបង្ហាញពីការវិវឌ្ឍសំខាន់ៗនៅក្នុងបញ្ហាសុខភាព ទាមទារការយកចិត្តទុកដាក់នាពេលខាងមុខ។ បញ្ហាភាគល្អិតបំពុលខ្យល់ PM 2.5 ធ្លាក់ក្នុងសភាពកាន់តែអាក្រក់ទៅៗ ប៉ះពាល់យ៉ាងខ្លាំងដល់សុខភាពសាធារណៈ។ ការបំពុលខ្យល់នៅតែជាបញ្ហាចម្បង នឹងកាន់តែកើនឡើង ជាពិសេសការបំពុលដោយភាគល្អិត PM 2.5។ យោងតាមរបាយការណ៍សន្ទស្សន៍គុណភាពខ្យល់ឆ្នាំ២០២៤ ពីក្រុមហ៊ុន IQAir ប្រទេសថៃបានជាប់ចំណាត់ថ្នាក់ទី៣៣ ក្នុងចំណោមប្រទេសចំនួន១៤១ ទូទាំងពិភពលោកសម្រាប់ការបំពុលខ្យល់ ជាការធ្លាក់ចុះពីឆ្នាំ២០២៣ ដែលប្រទេសនេះជាប់ចំណាត់ថ្នាក់ទី៣៦។ ថៃ គឺជាប្រទេសទីបីក្នុងចំណោមប្រទេសអាស៊ីអាគ្នេយ៍ចំនួន៩ មានកម្រិត PM 2.5 ប្រចាំឆ្នាំជាមធ្យម២៤មីក្រូក្រាមក្នុងមួយម៉ែត្រគូបខ្យល់។

កម្រិត PM 2.5 ប្រចាំឆ្នាំជាមធ្យមសម្រាប់ឆ្នាំ២០២៤ បានកើនឡើងពី២៣មីក្រូក្រាមក្នុងមួយម៉ែត្រគូបក្នុងឆ្នាំ២០២៣ លើសពីស្ដង់ដារមធ្យមប្រចាំឆ្នាំរបស់អង្គការសុខភាពពិភពលោក។ កំណើននេះ បាននាំឱ្យមានផលប៉ះពាល់ដល់សុខភាពទាំងស្រួចស្រាវ និងរ៉ាំរ៉ៃ ដូចជាជំងឺហឺត រលាកទងសួត និងមហារីកសួត។ ការសិក្សាមួយរបស់សាកលវិទ្យាល័យជូឡាឡុងកន ក្នុងឆ្នាំ២០២៤ រកឃើញថា ភាគល្អិត PM 2.5 នៅរាជធានីបាងកក និងតំបន់ជុំវិញនោះ មានផ្ទុកនូវលោហធាតុធ្ងន់ដូចជា អាសេនិច កាដមីញ៉ូម និងក្រូមីញ៉ូម ក្នុងកម្រិតខ្ពស់ ដែលបង្កើនហានិភ័យនៃជំងឺមហារីកសួត។ យោងតាមមជ្ឈមណ្ឌលទិន្នន័យសុខភាពនៃក្រសួងសុខាភិបាលសាធារណៈក្នុងឆ្នាំ២០២៤ មនុស្ស ១២,៣លាននាក់ ត្រូវបានធ្វើរោគវិនិច្ឆ័យថា មានជំងឺទាក់ទងនឹងការបំពុលបរិយាកាស កើនឡើង១០,១ភាគរយពីឆ្នាំ២០២៣។

តំបន់ភាគខាងជើងបានកត់ត្រាចំនួនករណីខ្ពស់បំផុត បន្ទាប់មកគឺតំបន់ភាគឦសាន និងរាជធានីបាងកក។ ចាប់ពីថ្ងៃទី១ ខែមករា ដល់ថ្ងៃទី១៤ ខែកុម្ភៈ ឆ្នាំ២០២៥ មានករណីជំងឺទាក់ទងនឹងការបំពុលខ្យល់ចំនួន៩សែន៨ម៉ឺនករណី។ ការយកចិត្តទុកដាក់ជាពិសេសគឺចាំបាច់សម្រាប់ក្រុមដែលមានហានិភ័យខ្ពស់ រួមទាំងមនុស្សចាស់ កុមារតូចៗ ស្ត្រីមានផ្ទៃពោះ និងបុគ្គលដែលមានជំងឺរ៉ាំរ៉ៃ៕