ភ្នំពេញ៖ បើតាមការបញ្ជាក់របស់ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី២៧កុម្ភៈ ឆ្នាំ២០២៥ បានឱ្យដឹងថា នាយករដ្ឋមន្រ្តីថៃ លោកស្រី ផេថងថាន ស៊ីណាវ៉ាត្រា ត្រៀមមកបំពេញទស្សនកិច្ចផ្លូវការនៅប្រទេសកម្ពុជា ក្នុងពេលឆាប់ៗខាងមុខនេះ។
ដំណើរនៃគម្រោងអញ្ជើញមកបំពេញទស្សនកិច្ចនៅកម្ពុជា ពីសំណាក់នាយករដ្ឋមន្រ្តីថៃ ត្រូវបានបង្ហើបឱ្យដឹងនៅក្នុងជំនួបពិភាក្សាការងាររវាង ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេសកម្ពុជា និងលោក ម៉ារីត សាង៉ាមពង្ស រដ្ឋមន្ត្រីការបរទេសថៃ ក្នុងឱកាសអញ្ជើញចូលរួមវេទិកាអនាគតអាស៊ាន លើកទី២ នៅរដ្ឋធានីហាណូយ ប្រទេសវៀតណាម។
ក្នុងជំនួបនោះ ប្រមុខការទូតទាំងពីរ បានពិភាក្សាគ្នាផ្ដោតលើកិច្ចសហប្រតិបត្តិការដែលមានសក្ដានុពល ចំពោះការពង្រឹង និងពង្រីកទំនាក់ទំនងទ្វេភាគី ក៏ដូចជាកិច្ចពិភាក្សាសំខាន់ៗមួយចំនួនទៀត ពិសេសការត្រៀមដំណើរទស្សនកិច្ចផ្លូវការរបស់លោកស្រី ផែថងថាន នាយករដ្ឋមន្ត្រីថៃ។
ថ្នាក់ដឹកនាំទាំងពីរក៏បានពិភាក្សាបន្ថែមពីសារសំខាន់នៃសកម្មភាព ដើម្បីអបអរសាទរខួបអនុស្សាវរីយ៍នៃការបង្កើតទំនាក់ទំនងការទូតកម្ពុជា និងថៃ លើកទី៧៥ ក្នុងឆ្នាំ២០២៥នេះ ព្រមទាំងបានផ្លាស់ប្ដូរទស្សនគ្នាទៅលើបញ្ហាតំបន់ និងអន្តរជាតិ ដែលជាប្រយោជន៍ និងកង្វល់រួមផងដែរ។
សូមជម្រាបថា នេះជាលើកទី១ សម្រាប់ដំណើរទស្សនកិច្ចផ្លូវការរបស់ លោកស្រី ផែថងថាន មកកាន់កម្ពុជា ក្រោយលោកស្រីឡើងកាន់តំណែងជានាយករដ្ឋមន្រ្តី ខណៈលោកស្រី ផេថងថាន ក៏ធ្លាប់ធ្វើទស្សនកិច្ចនៅកម្ពុជា កាលពីដើមឆ្នាំ២០២៤ម្ដងរួចមកហើយដែរ ប៉ុន្តែក្នុងដំណែងជាអនុប្រធានគណៈកម្មការជាតិទទួលបន្ទុកជំរុញ Soft Power នៃព្រះរាជាណាចក្រថៃ និងជាប្រធានគណបក្សភឿថៃ។
កាលនោះ នាយករដ្ឋមន្រ្តីថៃ បានជួបពិភាក្សាជាមួយ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ថែមទាំងបានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរកម្ពុជា-ថៃ ដែលបានផ្តល់ផលប្រយោជន៍ទៅវិញទៅមកចំពោះប្រជាជន និងប្រទេសទាំងពីរ។ លោកស្រី ក៏បានបង្ហាញនូវក្ដីសង្ឃឹមថា ទំនាក់ទំនង និងកិច្ចសហប្រតិបត្តិការនៃប្រទេសទាំងពីរ នឹងកាន់តែរឹងមាំបន្ថែមទៀត និងត្រូវបានពង្រីកលើវិស័យ៕ 
