ឯកឧត្តម ខ្វៃ អាទិត្យា៖ នៅឆ្នាំនេះ ក្រសួងបរិស្ថាននៅតែបន្តយុទ្ធនាការពន្លកបៃតង គ្រោងនឹងចែកកូនឈើដល់សាធារណជនដាំប្រមាណជា៣លានដើម ក្នុងនោះកូនត្នោតជាង១លានដើម

ភ្នំពេញ៖ ឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានបញ្ជាក់ថា នៅឆ្នាំ២០២៥នេះ ក្រសួងបរិស្ថាននៅតែបន្តយុទ្ធនាការពន្លកបៃតង ហើយគ្រោងនឹងរៀបចំកម្មវិធីដ៏ធំមួយនៅឆ្នាំនេះ ដែលគ្រោងនឹងចែកកូនឈើដល់សាធារណជនដាំប្រមាណជា៣លានដើម ក្នុងនោះក៏មានកូនត្នោតជាង១លានដើមផងដែរ។

ក្នុងដំណើរទស្សនកិច្ចក្រុមអ្នកសារព័ត៌មានជាង២០ស្ថាប័នទៅកាន់សហគមន៍តំបន់ការពារធម្មជាតិព្រៃធំអន្លង់ធំ និង “មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន” នៅថ្ងៃទី២៣ ខែកុម្ភៈ ឆ្នាំ២០២៥ ឯកឧត្តម ខ្វៃ អាទិត្យា បានមានប្រសាសន៍ថា ក្រសួងបរិស្ថាន បានជំរុញឱ្យមន្ទីរទាំងអស់រៀបចំថ្នាលបណ្តុះកូនឈើរៀងៗខ្លួន ក៏ដូចជាបណ្ដុះកូនត្នោត ហើយកន្លងមកយើងឃើញថាមានការចូលរួមយ៉ាងផុសផុលផងដែរអំពីសប្បុរសជន។

អ្នកនាំពាក្យរូបនេះ បានបន្តថា ដូច្នេះយុទ្ធនាការពន្លកបៃតងរបស់យើងមិនត្រឹមតែការកៀរគរឲ្យចូលរួមពីផ្នែកក្រសួងបរិស្ថានទេ គឺយើងឃើញថាថ្នាក់ក្រោមជាតិក៏បានចូលរួមយ៉ាងសកម្មផងដែរតាមរយៈមន្ទីរបរិស្ថានរាជធានី-ខេត្ត។ ហើយសប្បុរសជនក៏បានចូលរួមតាមរយៈអង្គការដៃគូ ក៏ដូចជាផ្នែកឯកជនដែលបានបង្កើតជាថ្នាលបណ្តុះកូនឈើ។

ឯកឧត្តមសង្ឃឹមថា ប្រជាពលរដ្ឋនឹងចូលរួមបង្កើននូវគម្របបៃតង ហើយដើមឈើដែលយើងដាំនេះ គឺមានសារៈសំខាន់ណាស់សម្រាប់ការរស់នៅ ក៏ដូចជាការបង្កើនគម្របបៃតងដែលរាជរដ្ឋាភិបាលកំណត់នៅឆ្នាំ២០៥០ ជាប្រទេសអព្យាក្រឹតកាបូន ហើយស្របតាមយុទ្ធសាស្ត្រចក្រាវិស័យបរិស្ថានដែលយើងមានសសរស្ដម្ភ ស្អាត បៃតង និងចីរភាព ៕