មន្ត្រីជាន់ខ្ពស់ក្រសួងបរិស្ថាន ជំរុញឱ្យសហគមន៍តំបន់ការពារធម្មជាតិ បង្កើននូវភាពស្រឡាញ់ព្រៃកាន់តែច្រើន

ភ្នំពេញ៖ ឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានជំរុញឱ្យសហគមន៍តំបន់ការពារធម្មជាតិ បង្កើននូវភាពស្រឡាញ់ព្រៃកាន់តែច្រើន ដោយមានការចូលរួមបណ្ដុះ និងដាំដើមឈើស្របទៅនឹងយុទ្ធនាការរបស់ក្រសួងបរិស្ថាន។

ថ្លែងប្រាប់ក្រុមអ្នកសារព័ត៌មាននៅថ្ងៃទី២១ ខែកុម្ភៈ ឆ្នាំ២០២៥នេះ ឯកឧត្តម ខ្វៃ អាទិត្យា បានលើកឡើងថា ក្រសួងបរិស្ថាន បានបង្កើត និងគាំទ្រសហគមន៍តំបន់ការពារធម្មជាតិរហូតមកដល់ពេលនេះមានចំនួន១៥៣ ហើយនៅក្នុងនោះសហគមន៍ដែលមានសក្ដានុពលធនធានធម្មជាតិ និងសក្ដានុពលដែលអាចទាញយកប្រយោជន៍សម្រាប់អភិវឌ្ឍន៍សហគមន៍មានជាងពាក់កណ្តាល។

ឯកឧត្តម ខ្វៃ អាទិត្យា បានបន្តថា សហគមន៍គឺជារនាំងសម្រាប់ការអភិរក្សធនធានធម្មជាតិ ក៏ដូចជាការចូលរួមជួយដល់គម្របបៃតង ហើយតាមរយៈសហគមន៍នេះ យើងឃើញមានការការចូលរួមគាំទ្រផ្សេងទៀតអំពីបណ្ដាដៃគូសហការ ក៏ដូចជាដៃគូអភិវឌ្ឍន៍ផ្សេងៗ។

អ្នកនាំពាក្យក្រសួងបរិស្ថានរូបនេះ បានវាយតម្លៃខ្ពស់ចំពោះគម្រោង INRM ដែលបានចូលរួមចំណែកសហការជាមួយនឹងក្រសួងបរិស្ថាន ជាពិសេសបានធ្វើការជាមួយសហគមន៍តំបន់ការពារធម្មជាតិនៅក្នុងខេត្តកំពង់ធំ, ខេត្តសៀមរាប និងខេត្តព្រះវិហារ ជាដើម ហើយយើងឃើញថាកំពុងតែទទួលបានលទ្ធផលល្អប្រសើរ។

ឯកឧត្តម ខ្វៃ អាទិត្យា ក៏បានជំរុញឲ្យសហគមន៍តំបន់ការពារធម្មជាតិ បង្កើននូវភាពស្រឡាញ់ព្រៃកាន់តែច្រើន ដោយមានការចូលរួមបណ្ដុះ និងដាំដើមឈើស្របទៅនឹងយុទ្ធនាការរបស់ក្រសួងបរិស្ថានដែលបានដាក់ចេញថាជាយុទ្ធនាការពន្លកបៃតង ហើយយុទ្ធនាការពន្លកបៃតងនេះ គឺជាសកម្មភាពមួយដែលយើងបានដាក់ចេញតាមរយៈយុទ្ធសាស្ត្រចក្រាវិស័យបរិស្ថាន របស់ក្រសួងដែលបានកំណត់ដើម្បីអនុវត្តនៅក្នុងអាណត្តិទី៧ នៃរាជរដ្ឋាភិបាល ហើយយុទ្ធសាស្ត្រនេះក៏បានដាក់ស្របទៅនឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ផងដែរ។

ឯកឧត្តមបានបញ្ជាក់ថា តាមរយៈសហគមន៍តំបន់ការពារធម្មជាតិនេះ នឹងធ្វើឲ្យតំបន់ការពាររបស់យើងកាន់តែរឹងមាំ ហើយកាលណាសហគមន៍មានជម្រើសថ្មីក្រៅពីការចូលព្រៃ និងការពឹងពាក់ទៅលើព្រៃឈើ។ មួយវិញទៀត ក្រសួងបរិស្ថាន នូវក្នុងមុំសសរស្ដម្ភបៃតងនេះ គឺយើងបន្ថែមទៅលើការបណ្ដុះដាំកូនឈើ និងជំរុញទៅលើការចូលរួមក្នុងការអភិរក្ស ក៏ដូចជាការចូលរួមទប់ស្កាត់បទល្មើសធនធានធម្មជាតិ ដែលទាំងនេះជាចំណុចមួយដ៏សំខាន់ដែលយើងត្រូវតែយកចិត្តទុកដាក់ និងការចូលរួមពីភាគីពាក់ព័ន្ធ ជាពិសេសសហគមន៍មូលដ្ឋានដោយផ្ទាល់តែម្តង៕