សម្តេចធិបតី៖ កម្ពុជាផ្តល់អាទិភាព ក្នុងការអនុវត្តជំនាញ គួបផ្សំនឹងតម្រូវការអប់រំ ប្រកបដោយគុណភាព

ភ្នំពេញ៖ តាមរយៈសុន្ទរកថាគន្លឹះពិសេសក្នុង «វេទិកាធុរកិច្ចកម្ពុជា-ហ្វីលីពីន» នៅរសៀលថ្ងៃទី១០ ខែកុម្ភៈ ឆ្នាំ២០២៥នេះ ដម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកឡើងថា កម្ពុជាផ្តល់អាទិភាព ក្នុងការអនុវត្តជំនាញ គួបផ្សំនឹងតម្រូវការអប់រំ ប្រកបដោយគុណភាព ដែលបង្កើតជាកាលានុភាពដ៏សំខាន់សម្រាប់លើស្ថាប័នអប់រំ ការបណ្តុះបណ្តាលវិជ្ជាជីវៈ និងក្រុមហ៊ុនបច្ចេកវិទ្យាអប់រំរបស់ហ្វីលីពីន។

ជាមួយគ្នានេះដែរ សម្តេចមហាបវរធិបតី ហ៊ុន ម៉ាណែត ថាដោយមើលឃើញពីសក្តានុពលដ៏រឹងមាំរបស់ហ្វីលីពីន លើការផ្តល់នូវកម្មវិធីបណ្តុះបណ្តាលអប់រំ ភាសាអង់គ្លេស ការបណ្តុះបណ្តាលវិជ្ជាជីវៈផ្នែកហិរញ្ញវត្ថុ គណនេយ្យ និងវិស័យសុខាភិបាលជាដើម។

សម្តេចធិបតី ហ៊ុន ម៉ាណែត បានបន្ថែមថា ហ្វីលីពីនក៏ជាមជ្ឈមណ្ឌលអភិវឌ្ឍន៍ផ្នែកបច្ចេកទេស ដោយផ្តោតសំខាន់ទៅលើវិស័យបច្ចេកវិទ្យា (IT) កសិកម្ម ហិរញ្ញវត្ថុ ព្រមទាំងលើវិស័យហេដ្ឋារចនាសម្ព័ន្ធ។

សម្តេចមហាបវរធិបតី ហ៊ុន ម៉ាណែត បានលើកឡើងថា សម្រាប់ការចុះអនុស្សារណៈយោគយល់គ្នារវាងប្រទេសកម្ពុជា និងហ្វីលីពីន លើការបណ្តុះបណ្តាលវិជ្ជាជីវៈ គឺជាការពង្រឹងបន្ថែមទៀតនូវសក្តានុពលជំនាញវិជ្ជាជីវៈផងដែរ៕