ថៃជាប្រទេសដំបូងគេក្នុងតំបន់អាស៊ីអាគ្នេយ៍ ដែលអនុញ្ញាតឱ្យមានអាពាហ៍ពិពាហ៍ភេទដូចគ្នាស្របច្បាប់

បាងកក៖ ថៃ ជាប្រទេសដំបូង គេ ក្នុង តំបន់ អាស៊ីអាគ្នេយ៍ ដែល អនុញ្ញាតឱ្យមានអាពាហ៍ពិពាហ៍ ភេទ ដូចគ្នា ស្របច្បាប់ ខណៈអ្នកស្រឡាញ់ភេទដូចគ្នាមានបំណងប្រារព្ធពិធីនេះ ជាមួយនឹងការចុះឈ្មោះអាពាហ៍ពិពាហ៍ជាង១០០០គូ ក្នុងរយៈពេលតែមួយថ្ងៃដំបូងនេះ។

បន្ទាប់ពីយុទ្ធនាការតស៊ូមតិជាច្រើនទសវត្សរ៍បានដោយជោគជ័យ ថៃគឺជាទឹកដីទី៣ នៅអាស៊ី ក្នុងការធ្វើឱ្យស្របច្បាប់អាពាហ៍ពិពាហ៍ភេទដូចគ្នា បន្ទាប់ពីតៃវ៉ាន់ និងនេប៉ាល់ ខណៈច្បាប់សមភាពអាពាហ៍ពិពាហ៍ថ្មីចូលជាធរមាននៅថ្ងៃព្រហស្បតិ៍ទី២៣ ខែមករា ទន្ទឹមនឹងនៅតាមអគារផ្សារទំនើបគ្រោងនឹងរៀបចំព្រឹត្តិការណ៍ដ៏មានមោទនភាព ដើម្បីអបអរសាទរការអនុវត្តច្បាប់ថ្មីនេះ។

ថ្លែងនៅក្នុងពិធីមង្គលការដ៏ធំមួយនៅឯផ្សារទំនើបដ៏ប្រណិតមួយក្នុងរាជធានីបាងកក គូស្វាមីភរិយាជាង២០០គូ បានតម្រង់ជួរដើម្បីសច្ចាប្រណិធានរបស់ពួកគេ ដោយខ្លះស្លៀកពាក់ពណ៌ស ខ្លះទៀតស្លៀកពាក់បែបប្រពៃណីថៃ ឈុតបស្ចិមប្រទេស និងឯកសណ្ឋានប៉ូលិស។

ក្រុមអ្នកស្រឡាញ់ភេទដូចគ្នាសង្ឃឹមថា នឹងឈានដល់ការចុះឈ្មោះអាពាហ៍ពិពាហ៍ចំនួន១៤៤៨គូ នៅថ្ងៃទីមួយនៃការចូលជាធរមាននៃច្បាប់ថ្មី។ អ្នករៀបចំ រួមជាមួយនឹងភ្នាក់ងារពាក់ព័ន្ធ គ្រោងនឹងចងក្រងតួលេខពីពិធីនេះនៅទូទាំងប្រទេស ហើយដាក់សំណើទៅកាន់ Guinness World Records ដើម្បីទទួលស្គាល់ប្រទេសថៃ ជាប្រទេសមានអ្នកចុះឈ្មោះអាពាហ៍ពិពាហ៍ភេទដូចគ្នាច្រើនជាងគេក្នុងពិភពលោកក្នុងរយៈពេលតែមួយថ្ងៃគត់។

គួរបញ្ជាក់ថា ការិយាល័យស្រុកទូទាំងប្រទេស និងស្ថានទូតថៃនៅបរទេស ក៏ត្រូវបានបើកសម្រាប់ការចុះឈ្មោះអាពាហ៍ពិពាហ៍ផងដែរ។ នេះបើយោងតាមរាជរដ្ឋាភិបាលថៃ៕