ខែធ្នូ ឆ្នាំ២០២៤ អ្នកជំងឺ ១៩៦៧នាក់ ទទួលបានការពិគ្រោះ ព្យាបាល ដោយមិនគិតថ្លៃពីគ្រូពេទ្យស្ម័គ្រចិត្តជាជនជាតិជប៉ុន
ភ្នំពេញ៖ គ្រូពេទ្យ នៃមជ្ឈមណ្ឌលព្យាបាលកុមារបេះដូងជប៉ុន កាលពីថ្ងៃទី១៩មករា ឆ្នាំ២០២៥ បានចេញរបាយការណ៍ឱ្យដឹងថា ក្នុងខែធ្នូ ឆ្នាំ២០២៤ អ្នកជំងឺចំនួន១៩៦៧នាក់ ក្នុងនោះមានកុមារ៣០នាក់ទទួលបានការពិគ្រោះ ព្យាបាល ដោយមិនគិតថ្លៃពីគ្រូពេទ្យស្ម័គ្រចិត្តជាជនជាតិជប៉ុន។
គ្រូពេទ្យនៃមជ្ឈមណ្ឌលព្យាបាលកុមារបេះដូងជប៉ុន បានឱ្យដឹងថា នៅឆ្នាំ២០០៩ អង្គការបេះដូងជប៉ុន មានធ្វើគ្លីនិកចល័តនៅតាមតំបន់ជនបទក្នុងខេត្តកណ្តាល ខេត្តព្រៃវែង និង ខេត្តកំពង់ចាម ដោយក្រុមគ្រូពេទ្យស្ម័គ្រចិត្តជនជាតិជប៉ុន។ ក្នុងឆ្នាំ២០១៦ ក៏បានដំណើរការជា «មជ្ឈមណ្ឌលព្យាបាលកុមារ បេះដូងជប៉ុន» មានទីតាំងក្នុងបរិវេណមន្ទីរពេទ្យបង្អែកពញាឭ ខេត្តកណ្តាល សហការជាមួយក្រុមគ្រូពេទ្យបង្អែកក្នុងមូលដ្ឋាន ដើម្បីផ្តល់សេវាសុខាភិបាលដល់អ្នកជំងឺទូទៅសម្រាប់មនុស្សពេញវ័យ និងកុមារ។
គ្រូពេទ្យបន្ថែមថា នៅឆ្នាំ២០១៨ មានទទួលព្យាបាលជំងឺមហារីកកុមារ និងបន្ថែមលើការព្យាបាលផ្នែកវេជ្ជសាស្ត្រមន្ទីរពេទ្យ បានផ្គត់ផ្គង់របបអាហារូបត្ថម្ភដល់អ្នកជំងឺកុមារមហារីក ដែលសម្រាកព្យាបាលថែមទៀតផង។ ជាលទ្ធផលមជ្ឈមណ្ឌលព្យាបាលកុមារបេះដូងជប៉ុន បានផ្តល់ការព្យាបាលដល់អ្នកជំងឺក្រៅប្រមាណ២ពីរមុឺននាក់ និងអ្នកជំងឺវះកាត់៣ពាន់ករណីជារៀងរាល់ឆ្នាំ។
