ប្រធានាធិបតីជាប់ឆ្នោតលោក ដូណាល់ ត្រាំ ថាលោកនឹងបង្កើតទីភ្នាក់ងាររដ្ឋាភិបាលថ្មីមួយហៅថា «សេវាប្រាក់ចំណូលក្រៅប្រទេស» ដើម្បីប្រមូលពន្ធ និងប្រាក់ចំណូលទាំងអស់ពីប្រភពបរទេស

វ៉ាស៊ីនតោន៖ ប្រធានាធិបតីជាប់ឆ្នោតថ្មីសហរដ្ឋអាម៉េរិក លោក ដូណាល់ ត្រាំ បាននិយាយកាលពីថ្ងៃអង្គារទី១៤មករាថា លោកនឹងបង្កើតទីភ្នាក់ងាររដ្ឋាភិបាលថ្មីមួយហៅថា «សេវាប្រាក់ចំណូលក្រៅប្រទេស» ដើម្បីប្រមូលពន្ធ និងប្រាក់ចំណូលទាំងអស់ពីប្រភពបរទេស ដោយលោកត្រៀមដាក់ពន្ធនាំចូលថ្មី បន្ទាប់ពីឡើងកាន់តំណែងនៅសប្តាហ៍ក្រោយ។

លោក ត្រាំ បានបង្ហោះសារលើប្រព័ន្ធផ្សព្វផ្សាយសង្គមថា លោកនឹងបង្កើតនាយកដ្ឋាននេះនៅថ្ងៃទី២០ ខែមករា ជាថ្ងៃដែលលោកចូលកាន់តំណែងជាប្រធានាធិបតីសម្រាប់អាណត្តិទីពីរ ដោយបន្ថែមថា សេវាចំណូលផ្ទៃក្នុង ហៅកាត់ថា IRS បានយកពន្ធលើជនជាតិអាម៉េរិកអស់រយៈពេលជាយូរមកហើយ។

លោកបានលើកឡើងថា៖«តាមរយៈកិច្ចព្រមព្រៀងពាណិជ្ជកម្មទន់ខ្សោយ សេដ្ឋកិច្ចអាម៉េរិកបានផ្តល់នូវកំណើន និងវិបុលភាពដល់ពិភពលោក ដោយការយកពន្ធលើប្រជាជនរបស់យើង។ វាដល់ពេលផ្លាស់ប្ដូរចំណាត់ការនេះហើយ។ យើងនឹងចាប់ផ្តើមគិតប្រាក់ពីអ្នកដែលចំណេញលុយពីយើងតាមរយៈពាណិជ្ជកម្ម ហើយពួកគេនឹងចាប់ផ្តើមបង់ប្រាក់តាមចំណែករៀងៗខ្លួន»។

យ៉ាងណា លោក ត្រាំ មិនបានបញ្ជាក់ថា តើទីភ្នាក់ងារថ្មីនេះនឹងបម្រើការជំនួសសេវាចំណូលផ្ទៃក្នុងឬយ៉ាងណានោះទេ? វាក៏មិនច្បាស់ដែរថា តើការចំណាត់ការនេះនឹងបង្កើតការិយាធិបតេយ្យកាន់តែស្មុគស្មាញដល់រដ្ឋាភិបាល ឬអត់នោះទេ? ប៉ុន្តែវាអាចផ្ទុយនឹងផែនការរបស់នាយកដ្ឋានប្រសិទ្ធភាពរដ្ឋាភិបាលរបស់លោក ត្រាំ ដែលដឹកនាំដោយមហាសេដ្ឋី អេឡុន ម៉ាស និងអតីតនាយកប្រតិបត្តិជីវបច្ចេកវិទ្យា លោក វីវេក រ៉ាម៉ាស្វាមី (Vivek Ramaswamy) ដែលព្យាយាមសម្រួលប្រតិបត្តិការរបស់រដ្ឋាភិបាល ដើម្បីសន្សំប្រាក់រាប់ពាន់លានដុល្លារនៅក្នុងកញ្ចប់ថវិកា។

គួរជម្រាបជូនថា លោក ត្រាំ បានស្នើដំឡើងពន្ធ១០ភាគរយលើការនាំចូលសកល ពន្ធ២៥ភាគរយលើការនាំចូលពីប្រទេសកាណាដា និងម៉ិកស៊ិក រហូតដល់ពួកគេទប់ស្កាត់រំហូរគ្រឿងញៀន និងជនចំណាកស្រុកឆ្លងកាត់ព្រំដែនចូលសហរដ្ឋអាម៉េរិក និងពន្ធ៦០ភាគរយលើទំនិញចិន៕