អភិបាលខេត្តបន្ទាយមានជ័យ បើកកិច្ចប្រជុំបូកសរុបការងារកសិកម្ម រុក្ខាប្រមាញ់ និងនេសាទខេត្ត ឆ្នាំ២០២៤ និងលើកទិសដៅការងារឆ្នាំ២០២៥

ភ្នំពេញ៖ នៅព្រឹកថ្ងៃទី១៤ ខែមករា ឆ្នាំ២០២៥ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ អញ្ជើញជាអធិបតីបើកកិច្ចប្រជុំ បូក សរុបការងារកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ឆ្នាំ២០២៤ និងលើកទិសដៅបន្តការងារឆ្នាំ២០២៥ដោយមានការចូលរួមពីសំណាក់ នាយករងរដ្ឋបាលខេត្ត លោក ប៉ាង វណ្ណាសេដ្ឋ ប្រធានមន្ទីរកសិកម្មរុក្ខាប្រមាញ់ និងនេសាទ ខេត្ត បន្ទាយមានជ័យ ថ្នាក់ដឹកនាំមន្ទីរ មន្ត្រីរាជការចំណុះឱ្យមន្ទីរកសិកម្មរុក្ខាប្រមាញ់ និងនេសាទ រួមនិងមន្ត្រីពាក់ព័ន្ធមួយចំនួនទៀត ពិធីនេះធ្វើឡើងនៅសាល ប្រជុំ មន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ។

លោក ប៉ាង វណ្ណា សេដ្ឋ បានរាយការណ៍ពីលទ្ធផលការងារ កសិកម្មអនុវត្តបាននៅឆ្នាំ២០២៤ ក្នុងនោះ ការដាំដុះកសិកម្មរួមមាន ដំណាំស្រូវរដូវប្រាំង សម្រេចបាន សរុប ៦៧.៩៤៥ហិកតា  ផែនការដាំដុះ២២.០០០ហិកតា ស្រូវវស្សាសម្រេចបានសរុប ២៧១.៤៨៥ហិកតា ផែនការដាំដុះសរុប២៦៤.៨៥៥ហិកតា ដំណាំស្រូវប្រចាំឆ្នាំលើផ្ទៃដីដាំដុះសម្រេចបានសរុប ៣៣៩.៤២០ហិកតា ផ្ទៃដីខូច មាន១៣.០៤៩ហិកតា បរិមាណផលសរុប១.១៩៩.៨៦៨តោន គឺលើសពីផែនការហើយការប្រមូលផលដំណាលគ្នាស្របពេលដែលទីផ្សានាំចេញទៅកាន់ប្រទេសជិតខាងមិនទាន់ដែលនាំអោយមានបញ្ហាតម្លៃកសិផល ធ្លាក់ថ្លៃ។ក្រៅពីនោះបានទប់ស្កាត់បទល្មើសនេសាទខុសច្បាប់និងនាំចូលផលិផលកម្មសិកម្មដទៃទៀតជាច្រើនករណីផងដែរ។

ថ្លែងនាឱកាសនោះ ឯកឧត្តម អ៊ុំ រាត្រី បានបញ្ជាក់ថាឆ្នាំ២០២៤នេះ វិស័យកសិកម្មក្នុងខេត្តបន្ទាយមានជ័យមានការអភិវឌ្ឍន៍ជឿនលឿនឥតឈប់ឈរទៅតាមតម្រូវការក្នុងទីផ្សារជាតិ អន្តរជាតិ។ កន្លងមកកសិករក្នងខេត្តបន្ទាយមានជ័យធ្លាប់តែធ្វើស្រែដោយ ពឹងតែទឹកភ្លៀង និងប្រើឧបករណ៍បូរាណ តែសព្វថ្ងៃនេះវិញកសិករគ្រប់ ក្រុង ស្រុក ក្នុងខេត្តបន្ទាយមានជ័យ ងាកមកប្រើឧបករណ៍ទំនើបៗមានដូចជា ត្រាក់ទ័រ គោយន្ត ម៉ាស៊ីនច្រូតស្រូវ ចេះប្រើពូជដែលមានទិន្នផលខ្ពស់ និងមានប្រភពទឹកជាក់លាក់កំពង់ត្រូវបានកែលំអរតាមកម្មវិធីនយោបាយទឹករបស់រដ្ឋាភិបាល តាមរយះធ្វើស្រែ៣ដងក្នុង១ឆ្នាំ  ហើយសង្ឃឹមថាឆ្នាំ ២០២៥វិស័យកសិកម្មខេត្តបន្ទាយមានជ័យកាន់តែមានភាពល្អប្រសើរជាងនេះថែមទៀតជាមិនខានឡើយ។

ជាមួយគ្នានោះដែរ ឯកឧត្តម អភិបាលខេត្តក៏បានជំរុញដល់មន្ត្រីនៃមន្ទីរកសិកម្មទាំងអស់ត្រូវធ្វើការផ្សព្វផ្សាយដល់ប្រជាកសិករក្នុងការប្រើប្រាស់ពូជស្រូវដែលមានទីផ្សារល្អ ការប្រើប្រាស់ជីឲ្យបានត្រិមត្រូវនិងការចិញ្ចឹមសត្វ ចិញ្ចឹមត្រី ដើម្បីបង្កើនប្រាក់ចំណូលក្នុងគ្រួសារ និងផ្សព្វផ្សាយដល់ប្រជាកសិករចូលរួមក្នុងការបង្កើតសហគមន៍កសិកម្មទំនើប។មួយវិញទៀតត្រូវទប់ស្កាត់បទល្មើសនេសាទ ការលួចកាប់បំផ្លាញព្រៃឈើទន្ទ្រានយកដី និងការលួចនាំចូលសាច់សត្វពីប្រទេសជិតខាង៕