ប្រធានគណៈកម្មការអឺរ៉ុប មិនទាន់បានទទួលការអញ្ជើញ ឱ្យចូលរួមពិធីចូលកាន់តំណែងរបស់ប្រធានាធិបតីជាប់ឆ្នោតអាមេរិក

ប្រ៊ុចសែល៖ ប្រធានគណៈកម្មការអឺរ៉ុប លោកស្រី Ursula von der Leyen មិនទាន់បានទទួលការអញ្ជើញ ឱ្យចូលរួមពិធីចូលកាន់តំណែងរបស់ប្រធានាធិបតីជាប់ឆ្នោតអាមេរិកលោក ដូណាល់ ត្រាំ នាថ្ងៃទី២០ ខែមករាខាងមុខនេះទេ នេះបើយោងតាមអ្នកនាំពាក្យរបស់លោកស្រី បានបញ្ជាក់នៅថ្ងៃសុក្រនេះ។

អ្នកនាំពាក្យលោកស្រី Paula Pinho បានថ្លែងទៅកាន់អ្នកយកព័ត៌មាន ក្នុងអំឡុងពេលសន្និសីទសារព័ត៌មានប្រចាំថ្ងៃថា ប្រសិនបើលោកស្រីទទួលបានការអញ្ជើញ នោះយើងនឹងឃើញ ប៉ុន្តែមិនមានគម្រោងដើម្បីចូលរួមពិធីចូលកាន់តំណែងនៅពេលនេះទេ។

ប្រធានាធិបតីជាប់ឆ្នោតអាមេរិករូបនេះ បានអញ្ជើញមេដឹកនាំបរទេសជាច្រើននាក់ មកចូលរួមក្នុងពិធីនេះ។ ក្នុងចំណោម អ្នកដែលបានទទួលការអញ្ជើញ រួមមាន ប្រធានាធិបតីចិន លោក Xi Jinping, អតីតប្រធានាធិបតីប្រេស៊ីល លោក Jair Bolsonaro, នាយករដ្ឋមន្ត្រីអ៊ីស្រាអែល លោក Benjamin Netanyahu និងនាយករដ្ឋមន្ត្រីអ៊ីតាលី លោក Giorgia Meloni។ ទោះបីជាយ៉ាងណា យោងតាមរបាយការណ៍ លោក Xi នឹងមិនចូលរួម ដោយផ្ទាល់ទេ ប៉ុន្តែនឹងបញ្ជូនបេសកជនជាន់ខ្ពស់មកជំនួសវិញ។

គួរបញ្ជាក់ថា ការអញ្ជើញមេដឹកនាំបរទេស ឱ្យចូលរួមពិធីចូលកាន់តំណែងផ្លូវការគឺជាការបំបែកទំនៀមទម្លាប់ ដែលធ្វើឱ្យមានការចាប់អារម្មណ៍ និងការពិភាក្សាជាច្រើន។ អ្នកខ្លះយល់ថា នេះជាសញ្ញាបង្ហាញពីការផ្លាស់ប្តូរ នៅក្នុងគោលនយោបាយការបរទេស របស់សហរដ្ឋអាមេរិក។