ការបំពុលបរិយាកាសដែលបង្កគ្រោះថ្នាក់កម្រិតធ្ងន់ដល់សុខភាព រកឃើញនៅក្នុង ខេត្តចំនួន៥៨ ក្នុងប្រទេសថៃ

បាងកក៖ ការ បំពុលបរិយាកាស ដែល បង្ក គ្រោះថ្នាក់កម្រិតធ្ងន់ ឬ មធ្យម ដល់ សុខភាព ត្រូវ បាន រក ឃើញ នៅ ក្នុង ខេត្ត ចំនួន៥៨ ក្នុង ចំណោមខេត្តទាំង ៧៧ របស់ ប្រទេស ថៃ នៅ ព្រឹក ថ្ងៃទី៩ ខែមករា។

ទីភ្នាក់ងារអភិវឌ្ឍន៍បច្ចេកវិទ្យាអវកាស និងព័ត៌មានវិទ្យា (Gistda) បានរាយការណ៍នៅលើគេហទំព័ររបស់ខ្លួននៅម៉ោង ៩ព្រឹកថា ការបំពុលខ្យល់ឈានដល់កម្រិតពណ៌ក្រហម (គ្រោះថ្នាក់) នៅក្នុងខេត្តចំនួន២០ និងកម្រិតពណ៌ទឹកក្រូច (ចាប់ផ្តើមប៉ះពាល់ដល់សុខភាព) ក្នុង៣៨ខេត្ត។

កំហាប់ភាគល្អិត PM2.5 កម្រិតគ្រោះថ្នាក់ ត្រូវបានរាយការណ៍នៅក្នុងខេត្តចំនួន២០ ដែលភាគច្រើននៅតំបន់ទំនាបកណ្តាល។ ពួកវាមានចាប់ពី៧៣,៥ ដល់១១៧,១មីក្រូក្រាមក្នុងមួយម៉ែត្រគូបនៃខ្យល់ ក្នុងរយៈពេល២៤ ម៉ោងកន្លងមក។ កម្រិតសុវត្ថិភាពគឺ៣៧,៥ មីក្រូក្រាមក្នុងមួយម៉ែត្រគូប។ កម្រិតក្រហមខ្ពស់បំផុតគឺ១១៧,១ មីក្រូក្រាមក្នុងមួយម៉ែត្រគូប នៅខេត្តសាមុតសាខុន។

ខេត្តចំនួន១៧ ផ្សេងទៀតប្រឈមមុខនឹងកម្រិតពណ៌ក្រហម ចាប់ពី ៧៥,៣ ដល់ ៩៩,3៤មីក្រូក្រាមក្នុងមួយម៉ែត្រគូប។ ខេត្តចំនួន៣៨ មានការបំពុលដោយកម្រិតពណ៌ទឹកក្រូច ចាប់ពី៣៧,៨ ដល់៧៤,២មីក្រូក្រាមក្នុងមួយម៉ែត្រគូប។

ខេត្តចំនួន១៩ មានPM2.5 ក្នុងកម្រិតល្អ និងមធ្យម មានន័យថាមានសុវត្ថិភាព ដោយស្ថិតក្នុងកម្រិត១៨,៨ ដល់៣៧,៤ មីក្រូក្រាមក្នុងមួយម៉ែត្រគូប។ ខេត្តចំនួន១៥ រងការបំពុលក្នុងកម្រិតមធ្យម។ ខេត្តចំនួនបួនមានកម្រិតល្អ (បៃតង) ដែលមានដូចជា៖ ក្រាប៊ី ភូកេត ម៉ែហុងសុន (Mae Hong Son) និងសាទូន (Satun)៕