រថយន្ត Cybertruck របស់ Tesla ផ្ទុះឆេះបង្កជាអណ្តាតភ្លើង នៅក្រៅសណ្ឋាគារត្រាំឡាសវេហ្គាស បណ្ដាលឲ្យស្លាប់ម្នាក់ និងរបួស ៧នាក់
វ៉ាស៊ីតោន៖ រថយន្តម៉ាក Cybertruck របស់ក្រុមហ៊ុន Tesla បានផ្ទុះឆេះ បង្កជាអណ្តាតភ្លើងនៅខាងក្រៅសណ្ឋាគារត្រាំឡាសវេហ្គាស (Trump Hotel Las Vegas) កាលពីថ្ងៃពុធទី១ ខែមករាឆ្នាំ២០២៥ ដោយបានសម្លាប់មនុស្សម្នាក់ និងរបួសយ៉ាងតិច ៧ នាក់ផ្សេងទៀត ហើយការិយាល័យស៊ើបអង្កេតសហព័ន្ធ (FBI) កំពុងស៊ើបអង្កេតករណីនេះ។
វីដេអូដែលថតដោយសាក្សីនៅខាងក្នុង និងខាងក្រៅសណ្ឋាគារបានបង្ហាញពីរថយន្តកំពុងផ្ទុះ និងអណ្តាតភ្លើងឆាបឆេះចេញពីវា។ ឧបទ្ទវហេតុនេះបានកើតឡើងតែប៉ុន្មានម៉ោងបន្ទាប់ពីបុរសម្នាក់បានបើកឡាន បំបុកចូលទៅក្នុងក្រុមមនុស្សដែលកំពុងប្រារព្ធពិធីបុណ្យឆ្លងឆ្នាំថ្មីនៅទីក្រុងញូវអ័រលៀន (New Orleans) ដោយបានសម្លាប់មនុស្ស១៥ នាក់ និង៣០ នាក់រងរបួស។ លោក ខេវិន ម៉ាកម៉ាហ៊ីល (Kevin McMahill) នាយកដ្ឋានប៉ូលិសក្រុងឡាសវេហ្គាស បាននិយាយនៅក្នុងសន្និសីទសារព័ត៌មានថា៖«ជាការពិតណាស់រថយន្តនោះគឺ Cybertruck ហើយនៅមុខសណ្ឋាគាររបស់លោក ត្រាំ។ មានសំណួរជាច្រើនដែលយើងត្រូវឆ្លើយ»។ លោក ម៉ាកម៉ាហ៊ីល បាននិយាយថា មនុស្សម្នាក់ត្រូវបានគេប្រទះឃើញស្លាប់នៅក្នុងរថយន្ត Cybertruck ម៉ូដែលឆ្នាំ២០២៤ ហើយមនុស្ស៧ នាក់បានរងរបួសស្រាលពីការផ្ទុះនេះ។ ករណីនេះកំពុងត្រូវបានស៊ើបអង្កេតថាជាអំពើភេរវកម្មឬយ៉ាងណា។ អ្នករងរបួសពីរនាក់ត្រូវបានគេបញ្ជូនទៅមន្ទីរពេទ្យដោយរបួសស្រាល។ ភ្ញៀវនៅក្នុងសណ្ឋាគារត្រូវបានជម្លៀសចេញបន្ទាប់ពីឧបទ្ទវហេតុនេះ ហើយភ្ញៀវភាគច្រើនត្រូវបានផ្លាស់ទៅសណ្ឋាគារផ្សេងទៀត។
លោក អេឡុន ម៉ាស (Elon Musk) នាយកប្រតិបត្តិក្រុមហ៊ុន Tesla និងជាទីប្រឹក្សារបស់លោកប្រធានាធិបតីជាប់ឆ្នោត ដូណាល់ ត្រាំ បាននិយាយថា ការផ្ទុះនេះគឺមិនមែនកើតឡើងដោយសាររថយន្ត Cybertruck ផ្ទាល់នោះទេ។ លោក ម៉ាស បាននិយាយនៅក្នុងសារបង្ហោះនៅលើបណ្តាញសង្គម X ថា៖«ឥឡូវនេះយើងបានបញ្ជាក់ថាការផ្ទុះនេះគឺបណ្តាលមកពីកាំជ្រួចដ៏ធំបំផុត និង/ឬគ្រាប់បែកដែលដាក់នៅលើ Cybertruck ហើយមិនការផ្ទុះមិនមែនបង្កឡើងដោយរថយន្តផ្ទាល់នោះទេ»។
ភ្នាក់ងារពិសេសរបស់ FBI លោក ជេរ៉េមី ឆ្វាត (Jeremy Schwartz) បានប្រាប់អ្នកយកព័ត៌មានថា វាមិនទាន់ច្បាស់ថាតើការបំផ្ទុះនេះជាអំពើភេរវកម្មឬយ៉ាងណានោះទេ។ លោកបានបន្ថែមថា FBI បានកំណត់អត្តសញ្ញាណបុគ្គលដែលបើករថយន្តដែលបានជួលនៅក្នុងរដ្ឋខូឡូរ៉ាដូ ប៉ុន្តែមិនទាន់អាចបង្ហាញអត្តសញ្ញាណអ្នកបើកបរជាសាធារណៈនោះទេ។ ប្រធានាធិបតីអាម៉េរិកលោក ចូ បៃឌិន បាននិយាយកាលពីថ្ងៃពុធថា ក្រុមមន្ត្រីអនុវត្តច្បាប់កំពុងស៊ើបអង្កេតថាតើការវាយប្រហារនៅទីក្រុងញូវអ័រលៀន និងការផ្ទុះនៃរថយន្ត Cybertruck មានទំនាក់ទំនងគ្នាដែរឬទេ?
សណ្ឋាគារត្រាំអន្តរជាតិនៅក្រុងឡាសវេហ្គាសគឺជាផ្នែកមួយនៃអង្គការត្រាំដែលជាក្រុមហ៊ុនរបស់ប្រធានាធិបតីជាប់ឆ្នោត ដែលនឹងត្រលប់ទៅសេតវិមាននៅថ្ងៃទី ២០ ខែមករា។
