ប៉េកាំង៖ ចិនបានបង្ហាញគំរូនៃរថភ្លើងល្បឿនលឿនដូចគ្រាប់កាំភ្លើងជំនាន់ក្រោយរបស់ខ្លួន ជាមួយនឹងល្បឿនសាកល្បង៤៥០គីឡូម៉ែត្រក្នុងមួយម៉ោង ដោយវ៉ាដាច់រថភ្លើងល្បឿនលឿនរបស់ខ្លួនបច្ចុប្បន្ន ដែលស្ថិតក្នុងចំណោមរថភ្លើងលឿនបំផុតនៅលើពិភពលោក។
នៅក្នុងសេចក្តីថ្លែងការណ៍មួយដែលបានចែករំលែកនៅលើគណនី WeChat ផ្លូវការរបស់ខ្លួន ក្រុមហ៊ុន China State Railway Group បានណែនាំរថភ្លើងល្បឿនលឿន CR450 មានល្បឿនប្រតិបត្តិការពាណិជ្ជកម្មអតិបរមា៤០០គីឡូម៉ែត្រក្នុងមួយម៉ោង។
China Railway បានលើកឡើងថា៖«ការបង្ហាញខ្លួនជាផ្លូវការនៃរថភ្លើងល្បឿនលឿនបំផុតរបស់ពិភពលោក គឺជារបកគំហើញដ៏សំខាន់នៅក្នុងគម្រោង CR450 ដែលបានចាប់ផ្តើមនៅក្នុងឆ្នាំ២០១៨ ហើយនឹងពង្រឹង និងពង្រីកបន្ថែមទៀតនូវមហិច្ឆតាផ្លូវរថភ្លើងល្បឿនលឿនជាសកលរបស់ប្រទេសចិន»។
មហាយក្សចិន មាន រថភ្លើង ល្បឿន លឿន ពាណិជ្ជកម្ម មួយ ចំនួន រួច ទៅ ហើយ នៅ ក្នុង ពិភពលោក ដូចជា Shanghai maglev តភ្ជាប់អាកាសយានដ្ឋានអន្តរជាតិ Pudong ទីក្រុងសៀងហៃ ទៅកាន់ទីក្រុងសៀងហៃ ដំណើរការក្នុងល្បឿនអតិបរមា៤៣០គីឡូម៉ែត្រក្នុងមួយម៉ោង ធ្វើឱ្យវាក្លាយជាសេវាកម្មរថភ្លើងពាណិជ្ជកម្មលឿនបំផុតក្នុងពិភពលោក។
រថភ្លើងល្បឿនលឿនផ្សេងទៀតរបស់ចិន ដែលតភ្ជាប់ទីក្រុងធំៗដូចជារថភ្លើង CR Fuxing និងរថភ្លើង CR Harmony ឈានដល់ល្បឿនប្រតិបត្តិការកំពូល ៣៥០គីឡូម៉ែត្រក្នុងមួយម៉ោង។
សូមជម្រាបថា រថភ្លើង Shinkansen ដ៏ល្បីល្បាញរបស់ប្រទេសជប៉ុន អាចធ្វើដំណើរក្នុងល្បឿនរហូតដល់៣២០គីឡូម៉ែត្រក្នុងមួយម៉ោង ខណៈរថភ្លើងល្បឿនលឿនអឺរ៉ុបដូចជារថភ្លើង ICE 3 នៅប្រទេសអាល្លឺម៉ង់មានល្បឿនអតិបរមា៣៥០គីឡូម៉ែត្រក្នុងមួយម៉ោង ស្រដៀងទៅនឹងរថភ្លើងរបស់ចិនដែរ។ប្រព័ន្ធផ្សព្វផ្សាយរដ្ឋរបស់ចិន បានសរសើរគំរូចុងក្រោយបំផុតរបស់ China Railway ថា បានឈានចូលយុគសម័យថ្មីនៃផ្លូវរថភ្លើងល្បឿនលឿន។
គេហទំព័ររដ្ឋរបស់ China Daily បានរាយរាប់ថា៖«សមិទ្ធផលនេះធ្វើឱ្យវាក្លាយជារថភ្លើងល្បឿនលឿនបំផុតក្នុងពិភពលោក នៅពេលដែលវាចូលបម្រើសេវាកម្មពាណិជ្ជកម្ម លើសពី CR400 បច្ចុប្បន្នរបស់ប្រទេសចិន ដែលដំណើរការក្នុងល្បឿន៣៥០គីឡូម៉ែត្រក្នុងមួយម៉ោង»។
របាយការណ៍របស់ China Daily បានឱ្យដឹងថា គម្រោងនេះពាក់ព័ន្ធនឹងការសាកល្បងជាង២០០ថ្ងៃ ជាមួយនឹងចម្ងាយសាកល្បងដែលលើសពី២សែនគីឡូម៉ែត្រ។ ជាមួយនឹងរថភ្លើងល្បឿនលឿន CR450 ការធ្វើដំណើរនឹងកាន់តែមានភាពងាយស្រួល និងមានប្រសិទ្ធភាពសម្រាប់អ្នកដំណើរ។ ក្រុមហ៊ុនបានបន្ថែមថា ការធ្វើឱ្យប្រសើរឡើង ក៏ត្រូវបានធ្វើឡើងលើការបើកបរ និងការគ្រប់គ្រង ក៏ដូចជាការត្រួតពិនិត្យសុវត្ថិភាព និងសេវាកម្មអ្នកដំណើរផងដែរ។
ម៉ូដែលថ្មីនេះ ក៏នឹងមានចម្ងាយហ្វ្រាំងខ្លីជាងមុន និងស្ថិរភាពប្រតិបត្តិការកាន់តែប្រសើរ ក៏ដូចជាកន្លែងដាក់អីវ៉ាន់ធំជាងមុន។ China Railway បានលើកឡើងថា គម្រោង CR450 គឺជាការបង្ហាញដ៏ទូលំទូលាយនៃការច្នៃប្រឌិតបច្ចេកវិទ្យារបស់ប្រទេសចិន និងភាពខ្លាំងនៃការផលិតឧបករណ៍កម្រិតខ្ពស់ ហើយត្រូវបានគេរំពឹងថា នឹងមានប្រសិទ្ធភាពជាង និងទម្ងន់ស្រាលជាងមុនផងដែរ។
មហិច្ឆតាផ្លូវដែកល្បឿនលឿនរបស់ចិននៅតែបន្ត ដោយមានផែនការសាងសង់បណ្តាញតាមរយៈប្រទេសជិតខាងអាស៊ីអាគ្នេយ៍ដូចជាប្រទេសថៃ និងវៀតណាម កំពុងទទួលបានសន្ទុះ។ នៅឆ្នាំ២០២១ បណ្តាញផ្លូវដែកពាក់កណ្តាលល្បឿនលឿនឡាវ-ចិនត្រូវបានដាក់ឱ្យដំណើរការដោយភ្ជាប់ទីក្រុងគុនមីងក្នុងខេត្តយូណានភាគខាងត្បូងទៅរដ្ឋធានីវៀងចន្ទន៍របស់ឡាវ។ រដ្ឋធានីប៉េកាំង បានបន្តផែនការជាយូរមកហើយក្នុងការកសាងបណ្តាញផ្លូវដែក ដែលនឹងតភ្ជាប់ទីក្រុងគុនមីងទៅកាន់ប្រទេសសិង្ហបុរី ដោយរត់កាត់ប្រទេសឡាវ ថៃ និងម៉ាឡេស៊ី ដោយមានបណ្តាញផ្លូវដែកនៅវៀតណាម និងកម្ពុជា។ យក្សសេដ្ឋកិច្ចលំដាប់ទី២លើពិភពលោកនេះ នឹងពង្រីកបណ្តាញផ្លូវដែករបស់ខ្លួនដល់២០០ ០០០គីឡូម៉ែត្រនៅឆ្នាំ២០៣៥ ក្នុងនោះ៧០០០០គីឡូម៉ែត្រនឹងមានល្បឿនលឿន៕
