ព័ត៌មានលម្អិត ជុំវិញហេតុការណ៍គ្រោះថ្នាក់យន្តហោះដ៏រន្ធត់មួយ ក្នុងប្រទេសកូរ៉េខាងត្បូង ដែលឆក់យកជីវិតមនុស្សជិត១៨០នាក់

សេអ៊ូល៖ កាលពីថ្ងៃអាទិត្យនេះ ហេតុការណ៍គ្រោះថ្នាក់យន្តហោះដ៏រន្ធត់មួយ បានកើតមានឡើងនៅព្រលានយន្តហោះមួយកន្លែង ក្នុងប្រទេសកូរ៉េខាងត្បូង ដែលបានឆក់យកជីវិតមនុស្សជិត១៨០នាក់។

ខាងក្រោម គឺជាព័ត៌មានលម្អិត ជុំវិញហេតុការណ៍នោះ ដែលជាករណីគ្រោះថ្នាក់យន្តហោះដ៏អាក្រក់បំផុត ក្នុងឆ្នាំ២០២៤នេះ៖

-ពេលវេលា ទីតាំង និងហេតុការណ៍គ្រោះថ្នាក់
យន្តហោះរងគ្រោះ បានជួបគ្រោះថ្នាក់ នៅអាកាសយានដ្ឋានអន្តរជាតិ Muan ស្ថិតនៅភាគនិរតីនៃប្រទេសកូរ៉េខាងត្បូង កាលពី វេលាម៉ោងខ្ទង់៩ព្រឹក (ម៉ោងក្នុងតំបន់) ថ្ងៃអាទិត្យ ទី២៩ ខែធ្នូ ក្នុងគោលដៅធ្វើដំណើរហោះចេញពី ទីក្រុងបាងកកនៃប្រទេសថៃ ឆ្ពោះមកកាន់ស្រុក Muan នៃខេត្ត South Jeolla ប្រទេសកូរ៉េខាងត្បូង។ បើតាមឃ្លីបវីដេអូបង្ហាញពីហេតុការណ៍ផ្ទាល់ គេមើលឃើញ អំឡុងពេលចុះចត យន្តហោះដែលជួបគ្រោះថ្នាក់ បានអូសខ្លួននៅជាប់នឹង ផ្លូវចុះចតផ្ទាល់តែម្តង ដោយមិនមានកង់បើកចេញមកឡើយ ហើយមិនអាចបង្អង់ល្បឿន ក៏បានបោះពួយយ៉ាងលឿន ហួសផុតចេញពីផ្លូវ រហូតទីបំផុតទៅបុកពេញទំហឹង ជាមួយជញ្ជាំងការពារ ជាហេតុបណ្តាលឱ្យ យន្តហោះនោះ ផ្ទុះឆេះឡើងយ៉ាងសន្ធោសន្ធៅ ពោលគឺយន្តហោះសឹងទាំងស្រុង ត្រូវបានបំផ្លាញដោយសារការផ្ទុះ សល់តែផ្នែកកន្ទុយបន្តិចប៉ុណ្ណោះ។

-ប្រភេទយន្តហោះ និងចំនួនជនរងគ្រោះ
យន្តហោះខាងលើជាប្រភេទ Boeing 737-800 ផលិតឆ្នាំ២០០៩ មានជើងហោះហើរ 7C2216 ធ្វើប្រតិបត្តិការដោយ ក្រុមហ៊ុនអាកាសចរណ៍ Jeju Air។ នៅលើនោះ មានផ្ទុកអ្នកដំណើរសរុប១៧៥នាក់ ក្នុងនោះ២នាក់ជាជនជាតិថៃ និង១៧៣នាក់ផ្សេងទៀត ជាជនជាតិកូរ៉េ។ ចំណែក៦នាក់ គឺជាអ្នកបម្រើការងារលើយន្តហោះ និងអាកាសយានិក។ គិតត្រឹមម៉ោង៨យប់ (ម៉ោងក្នុងតំបន់) មនុស្សស្ទើរទាំងអស់ គឺ១៧៧នាក់ បានស្លាប់ ខណៈ២នាក់នៅបន្តចាត់ទុកបាត់ខ្លួននៅឡើយ ហើយនិង២ទៀតនាក់ ដែលជាអ្នកបម្រើការងារលើយន្តហោះ (ប្រុសម្នាក់ ស្រីម្នាក់) ត្រូវបានជួយសង្រ្គោះភ្លាមៗ។ អ្នកទាំងពីរ ត្រូវគេរាយការណ៍ថា អង្គុយនៅផ្នែកចុងកន្ទុយនៃយន្តហោះ។

-មូលហេតុដែលបង្កឱ្យមានគ្រោះថ្នាក់
មូលហេតុច្បាស់លាស់ពិតប្រាកដ នៅពីក្រោយគ្រោះថ្នាក់ខាងលើ កំពុងស្ថិតក្រោមការស៉ើបអង្កេតរបស់អាជ្ញាធរកូរ៉េខាងត្បូង និងភាគីពាក់ព័ន្ធ។ យ៉ាងណាក្តី ក្រុមអ្នកស៉ើបអង្កេត បានដាក់ការសង្ស័យជាបឋមទៅលើ កត្តាប៉ះទង្គិចជាមួយហ្វូងសត្វបក្សី និងលក្ខខណ្ឌអាកាសធាតុ ជាមូលហេតុចម្បងជាងគេ ដែលបានបណ្តាលឱ្យកង់របស់យន្តហោះរងគ្រោះ មានបញ្ហាគាំងមិនអាចបញ្ចេញមកក្រៅ ហើយបង្ខំឱ្យយន្តហោះត្រូវចុះចត ទាំងគ្មានកង់បែបនេះ។

-ប្រវត្តិនៃគ្រោះថ្នាក់យន្តហោះ
សោកនាដកម្មខាងលើ គឺជាករណីអាក្រក់ជាងគេបង្អស់ ដែលពាក់ព័ន្ធជាមួយអាកាសចរណ៍កូរ៉េខាងត្បូង គឺគិតចាប់តាំងពី ករណីធ្លាក់យន្តហោះ Korean Air ឆ្នាំ១៩៩៧ នៅកោះហ្កាំ ដែលបានសម្លាប់មនុស្សជាង២០០នាក់ និងជាករណីមានមនុស្សស្លាប់ច្រើនបំផុត ដែលកើតមានឡើង នៅក្នុងប្រទេសអាស៉ីបូព៌ាមួយនេះ គិតចាប់តាំងពីករណីធ្លាក់យន្តហោះ China Air ឆ្នាំ១៩៩៧ ដែលបានផ្តាច់ជីវិតមនុស្ស១២៩នាក់ ក្នុងចំណោម១៦៦នាក់៕