ឧទ្យានជាតិមួយនៅភាគខាងជើងប្រទេសថៃ ត្រូវបានបិទជាបណ្តោះអាសន្ន បន្ទាប់ពីដំរីព្រៃបានព្រេចសម្លាប់ស្ត្រីជនជាតិថៃម្នាក់
ថៃ៖ ការវាយប្រហារដោយសត្វដំរីដ៏សាហាវកាលពីថ្ងៃពុធ គឺជាលើកទីមួយនៅឧទ្យានជាតិ ភូក្រៈឌឹង Phu Kradueng ក្នុងខេត្តលើយ Loei ភាគឦសាន ដែលត្រូវធ្វើដំណើរប្រហែល៨ម៉ោងពីរាជធានីបាងកក។ មន្ត្រីប៉ូលិសក្នុងតំបន់បញ្ជាក់ថា៖«នេះគឺជាឧបទ្ទវហេតុដែលត្រូវបានកត់ត្រាជាលើកដំបូង នៃការវាយប្រហារដោយដំរី មកលើអ្នកទេសចរនៅក្នុងតំបន់នេះ»។
នៅក្នុងការបង្ហោះហ្វេសប៊ុក កាលពីយប់ថ្ងៃព្រហស្បតិ៍ ឧទ្យានជាតិបានប្រកាសថា ដំរីព្រៃត្រូវបានគេប្រទះឃើញនៅលើផ្លូវដែលភ្ញៀវទេសចរប្រើប្រាស់ ហើយវាត្រូវបានបិទជាបណ្តោះអាសន្ននូវរាល់កន្លែងទេសចរណ៍ និងជំរំនៅក្នុងឧទ្យានដើម្បីសុវត្ថិភាព និងដើម្បីការពារការខូចខាតដែលអាចកើតមានចំពោះទ្រព្យសម្បត្តិ។
ជនរងគ្រោះមានឈ្មោះ ជីរ៉ានុន (Jeeranun) មកពីខេត្តស្ទឹងជ្រៅ កម្ពុជាលើ (ថៃហៅឆាក់ឈៀងសៅ) ភាគខាងកើតរាជធានីបាងកក។ យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក ជីរ៉ានុន កំពុងដើរលេងជាមួយមិត្តភក្ដិនៅលើផ្លូវលំឆ្ពោះទៅទឹកជ្រោះផែនភពម៉ៃ Phen Phop Mai ពីកន្លែងបោះជំរំរបស់នាង។ សារព័ត៌មាន Pattaya Mail បានរាយការណ៍ថា ដំរីនេះបានវាយប្រហារស្ត្រីនោះពីរដង។
អ្នកទស្សនាបានជូនដំណឹងដល់មន្ត្រីអនុរក្សឧទ្យានអំពីការវាយប្រហារនៅម៉ោងប្រហែល៩:៤៧នាទីព្រឹកថ្ងៃពុធ ហើយមន្ត្រីអនុរក្សបានរកឃើញ ជីរ៉ានុន ស្លាប់នៅពេលពួកគេមកដល់។ មន្ត្រីឧទ្យានបញ្ជាក់ថា ការវាយប្រហារបានកើតឡើងនៅក្នុងតំបន់មួយដែលដំរីព្រៃតែងតែស្វែងរកអាហារ។ ពួកគេបាននិយាយថា មានសញ្ញាព្រមានជាច្រើនដែលណែនាំឱ្យប្រជាជននៅឆ្ងាយពីតំបន់នោះ។
ក្រោយកើតហេតុ នាយកដ្ឋានឧទ្យានជាតិ សត្វព្រៃ និងរុក្ខជាតិ (DNP) បានអនុវត្តពិធីសារសុវត្ថិភាពមួយចំនួន រួមទាំងការបិទផ្លូវទាំងអស់ដែលប្រទះឃើញដំរីព្រៃ និងការដាក់ពង្រាយអនុរក្សបន្ថែម។ ឧទ្យាននេះ នឹងបើកឡើងវិញនៅពេលស្ថានភាពត្រឡប់មកធម្មតាវិញ ហើយការជូនដំណឹងជាមុននឹងត្រូវបានផ្តល់ឱ្យនៅលើទំព័រហ្វេសប៊ុករបស់ខ្លួន។ នាយកដ្ឋានឧទ្យានជាតិ សត្វព្រៃ និងរុក្ខជាតិបានសម្របសម្រួលជាមួយមជ្ឈមណ្ឌលស្រាវជ្រាវ និងបសុព្យាបាលសត្វព្រៃ ដើម្បីស៊ើបអង្កេតស្ថានភាពរបស់សត្វដំរីព្រៃ (ដែលបានសម្លាប់ស្ត្រីទេសចរ) ខណៈជាធម្មតាដំរីមិនដើរនៅពេលថ្ងៃទេ។
យោងតាមកាសែតបាងកកប៉ុស្តិ៍ ភ្ញៀវទេសចរជាង៧០០នាក់ត្រូវបានប្រាប់ឱ្យចាកចេញពីភ្នំនៅថ្ងៃព្រហស្បតិ៍។ ឧទ្យានជាតិភូក្រៈឌឹង មានប្រជាប្រិយភាពពីភ្ញៀវទេសចរក្នុងស្រុក ដោយសារតំបន់ខ្ពង់រាប និងអាកាសធាតុត្រជាក់។ តំបន់ក្បែរទឹកជ្រោះ ផែនភពម៉ៃ មានភាពល្បីល្បាញដោយសារស្លឹកឈើក្រហម និងជាកន្លែងសម្រាប់ភ្ញៀវទេសចរចូលចិត្តថតរូបនៅទីនោះ។
ឧទ្យាននេះបានបើកសម្រាប់ទេសចរណ៍តាមរដូវកាលត្រឹមតែជាងពីរខែក្នុងឆ្នាំនេះប៉ុណ្ណោះ។ វាត្រូវបានបើកនៅថ្ងៃទី១ ខែតុលា ហើយដើមឡើយគ្រោងនឹងដំណើរការរហូតដល់ថ្ងៃទី៣១ ខែឧសភា ឆ្នាំក្រោយ។ ប្រព័ន្ធផ្សព្វផ្សាយក្នុងស្រុកបានរាយការណ៍ថា ផ្លូវឡើងភ្នំដែលនាំទៅដល់កំពូលភ្នំត្រូវបានបិទជារៀងរាល់ឆ្នាំក្នុងរដូវប្រាំង ដោយសារគ្រោះថ្នាក់ដែលបង្កឡើងដោយសត្វដំរីព្រៃប្រមូលផ្តុំគ្នានៅតំបន់នោះ ដើម្បីផឹកទឹក។
ដោយដកស្រង់ស្ថិតិពីនាយកដ្ឋានឧទ្យានជាតិ សត្វព្រៃ និងរុក្ខជាតិ មូលនិធិ Heinrich Boll បានរាយការណ៍កាលពីខែធ្នូឆ្នាំមុនថា យ៉ាងហោចណាស់មនុស្ស១៥០នាក់នៅក្នុងប្រទេសថៃ ត្រូវបានសម្លាប់ដោយដំរីព្រៃក្នុងរយៈពេល៦ឆ្នាំចុងក្រោយនេះ ហើយមនុស្សជាង១៣៣នាក់បានរងរបួស។ ទន្ទឹមនឹងនោះ ដំរីជាង៩២ក្បាលត្រូវបានសម្លាប់៕
