គណៈកម្មការសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន រៀបចំវគ្គបណ្តុះបណ្តាលស្តីពី «អាហារូបត្ថម្ភក្នុងបរិបទបរិស្ថាន» និងវគ្គបណ្តុះបណ្តាលស្តីពី «ការលើកកម្ពស់ភាពអង់អាចរបស់ស្រ្តីលើផ្នែកសេដ្ឋកិច្ចក្នុងបរិបទបរិស្ថាន»

ភ្នំពេញ៖ ចាប់ពីថ្ងៃទី៩ ដល់ថ្ងៃទី១២ ខែធ្នូ ឆ្នាំ២០២៤ នៅខេត្តកំពង់ធំ គណៈកម្មការសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន បានរៀបចំវគ្គបណ្តុះបណ្តាល ស្តីពី «អាហារូបត្ថម្ភក្នុងបរិបទបរិស្ថាន» និងវគ្គបណ្តុះបណ្តាលស្តីពី «ការលើកកម្ពស់ភាពអង់អាចរបស់ស្រ្តីលើផ្នែកសេដ្ឋកិច្ចក្នុងបរិបទបរិស្ថាន» ក្រោមអធិបតីភាពលោកជំទាវ ម៉ុម ថានី រដ្ឋលេខាធិការ និងជាប្រធានប្រតិបត្តិគណៈកម្មការសាខាសមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន លោកប្រធានមន្ទីរបរិស្ថានខេត្តកំពង់ធំ និងដោយមានការចូលរួមពីមន្រ្តីនាយកដ្ឋានពាក់ព័ន្ធចំណុះក្រសួងបរិស្ថាន មន្រ្តីសមាជិកក្រុមការងារទទួលបន្ទុករួមការងារស្រ្តី យុវជន យេនឌ័រ និងកុមារនៃមន្ទីរបរិស្ថានរាជធានី ខេត្ត ប្រមាណ ៦០នាក់។

វគ្គបណ្តុះបណ្តាលរៀបចំឡើងក្នុងគោលបំណងដើម្បីពង្រឹងសមត្ថភាពមន្រ្តីពាក់ព័ន្ធ ពិសេសមន្រ្តីនៅតាមមន្ទីរបរិស្ថានរាជធានី ខេត្ត ទៅលើចំណេះដឹងផ្នែកអាហារូបត្ថម្ភ និងការពង្រឹងផ្នែកសេដ្ឋកិច្ចរបស់ស្រ្តីក្នុង បរិបទបរិស្ថាន ដើម្បីមានលទ្ធភាពក្នុងការផ្តល់ព័ត៌មាន និងជំរុញប្រជាសហគមន៍ពីការអនុវត្តកម្មវិធីសន្តិសុខស្បៀងនិងអាហារូបត្ថម្ភ ព្រមទាំងការជំរុញតួនាទីសេដ្ឋកិច្ចរបស់ស្រ្តីឱ្យកាន់តែប្រសើរ នៅក្នុងសហគមន៍។

គូសបញ្ជាក់ផងដែរថា អាហារូបត្ថម្ភ និងការពង្រឹងសិទ្ធិអំណាចសេដ្ឋកិច្ចសម្រាប់ស្ត្រីមានទំនាក់ទំនងគ្នាយ៉ាងស៊ីជម្រៅ ព្រោះបញ្ហាទាំងពីរដើរតួនាទីយ៉ាងសំខាន់ក្នុងការធ្វើឱ្យប្រសើរឡើងនូវសុខភាព សុខុមាលភាព និងស្ថានភាពសេដ្ឋកិច្ចសង្គមរបស់ស្ត្រី គ្រួសារ និងសហគមន៍។ ការគិតគូរពីបញ្ហាសុខភាពជាការបង្កើតសហគមន៍មួយប្រកបដោយនិរន្តរភាព និងរីកចម្រើន ដែលជាការយកឈ្នះលើភាពក្រីក្រ និងអនុញ្ញាតឱ្យស្ត្រីចូលរួមដឹកនាំ រួមចំណែកសម្រេចបានភាពស្អាត ភាពបៃតង និងចីរភាព៕