បាងកក៖ តារាចម្រៀងថៃម្នាក់បានស្លាប់បាត់បង់ជីវិតកាលពីថ្ងៃទី៨ ខែធ្នូ បន្ទាប់ពីទទួលសេវាកម្មម៉ាស្សាបីដង ដោយក្នុងនោះពីរដងជាការម៉ាស្សាកញ្ចឹងក ពីហាងម៉ាស្សាបែបថៃមួយកន្លែងក្នុងខេត្ត Udon Thani។
តារាចម្រៀងឈ្មោះ ឆៃដា ប្រាហូម (Chayada Prao-hom) បានស្លាប់នៅមន្ទីរពេទ្យក្នុងខេត្ត Udon Thani។ មិត្តប្រុសរបស់នាងបានឱ្យដឹងថា បន្ទាប់ពីការសម្ដែងកាលពីថ្ងៃទី៥ខែតុលា នាងប្រាប់គាត់ថានាងឈឺខ្នង ហើយបានសុំឱ្យគាត់នាំនាងទៅហាងម៉ាស្សានៅ Udon Thani។
មិត្តប្រុសបន្ថែមថា បន្ទាប់ពីម៉ាស្សា នាងចាប់ផ្ដើមមានអារម្មណ៍ស្ពឹកពាក់កណ្ដាលខ្លួន ហើយមិនអាចលើកដៃឆ្វេងបានឡើយ។ ក្រោយមក នាងមិនអាចកម្រើករាងកាយទាំងមូលតែម្ដង។
កាលពីថ្ងៃទី៦ ខែវិច្ឆិកា ឆៃដា បានប្រាប់អ្នកគាំទ្ររបស់នាងដែលព្រួយបារម្ភពីស្ថានភាពជំងឺរបស់នាងនៅលើទំព័រហ្វេសប៊ុករបស់នាងថា នាងបានទៅហាងម៉ាស្សាដូចគ្នាបីដងក្នុងរយៈពេលប្រហែលមួយខែ។
យោងតាមការបង្ហោះរបស់នាង នាងគ្រាន់តែឈឺស្មា មុនពេលនាងទៅហាងម៉ាស្សា។ ពីរថ្ងៃបន្ទាប់ពីការម៉ាស្សាលើកដំបូង នាងចាប់ផ្តើមមានការឈឺចាប់នៅខាងក្រោយក្បាលរបស់នាង ហើយបានលេបថ្នាំបំបាត់ការឈឺចាប់។ មួយសប្តាហ៍ក្រោយមក នាងចាប់ផ្តើមស្ពឹកដៃ។
ពីរសប្តាហ៍បន្ទាប់ពីការម៉ាស្សាលើកទី២ នាងចាប់ផ្តើមមានការឈឺចាប់និងរឹងពេញរាងកាយរបស់នាងដែលនាងមិនអាចដេកលើគ្រែបានទេ។ ក្នុងការម៉ាស្សាលើកទីបី នាងបានជួបជាមួយអ្នកម៉ាស្សាម្នាក់ដែលមានដៃធ្ងន់ ដែលធ្វើឱ្យមានស្នាមជាំពេញដងខ្លួនអស់រយៈពេលមួយសប្តាហ៍។ អាការរបស់នាងកាន់តែអាក្រក់ទៅៗ។
មិត្តប្រុសរបស់នាងបានអះអាងចង់ចាត់វិធានការផ្លូវច្បាប់លើហាងម៉ាស្សានេះ ប៉ុន្តែបានសារភាពថាគាត់មិនប្រាកដថាមានភស្តុតាងគ្រប់គ្រាន់ដើម្បីដាក់ពាក្យបណ្តឹងនោះទេ។ ជុំវិញបញ្ហានេះ នាយកដ្ឋានជំនួយសេវាសុខភាព (HSS) នឹងពិនិត្យមើលថាតើហាងម៉ាស្សាដែលតារាចម្រៀងខាងលើបានទៅនោះ មានការទទួលស្គាល់ និងមានអាជ្ញាបណ្ណក្នុងការផ្ដល់សេវាដែរឬយ៉ាងណា។
