ឯកឧត្តម ហ៊ុន ម៉ានី អញ្ជើញជាអធិបតីក្នុងពិធីក្រុងពលី សម្រាប់ព្រឹត្តិការណ៍ “សាទរកម្ពុជា” ឬ “Celebrating Cambodia”
ភ្នំពេញ៖ នៅព្រឹកថ្ងៃទី៨ ខែធ្នូ ឆ្នាំ២០២៤ មុខព្រះបរមរាជវាំង ឯកឧត្តម ហ៊ុន ម៉ានី ឧបនាយករដ្ឋមន្ត្រី និងជាប្រធានសហភាពសហព័ន្ធយុវជនកម្ពុជា អញ្ជើញជាអធិបតីក្នុងពិធីក្រុងពលី សម្រាប់ព្រឹត្តិការណ៍ “សាទរកម្ពុជា” ឬ “Celebrating Cambodia” ។
“សាទរកម្ពុជា” ឬ “Celebrating Cambodia” ជាព្រឹត្តិការណ៍នៃការអបអរសាទរដល់សង្គមមួយ ដែលប្រកបដោយភាពរស់រវើក ជាមួយនឹងការបង្ហាញវិសេសភាពនៃ អត្តសញ្ញាណ ដោយសមានចិត្ត សោមនស្សចំពោះអ្វីៗដែលបានឆ្លងកាត់និងបានជម្នះ និងការលើកតម្កើងមោទនភាពក្នុងភាពជាប្រជា ជាតិមួយ។
«សាទរកម្ពុជា» ត្រូវបានផ្តួចផ្តើមឡើងក្នុងគោលបំណង ផ្សារភ្ជាប់ប្រជាជន ទៅសង្គមជាតិ ទាំងមូល ដែលក្នុងនោះ តាមរយៈការរៀបចំព្រឹត្តិការណ៍ និងកម្មវិធីនានា «សាទរកម្ពុជា» នឹង៖ បង្ហាញក្នុងនាមជាប្រជាជាតិមានអាយុកាលដ៏យូរលង់ នៅថ្ងៃនេះកម្ពុជាកំពុងឈរដោយមោទនភាព ពោរពេញដោយក្តីសង្ឃឹម និងមានភាពជឿជាក់ រួមគ្នាឆ្ពោះទៅកាន់អនាគតដ៏រុងរឿងរបស់ជាតិ។យើង ផ្តល់ជាវេទិកានិងឱកាសដល់គ្រប់កោសិកា គ្រប់ស្រទាប់វណ្ណៈ គ្រប់សហគមន៍ និងមជ្ឈដ្ឋានផ្សេងៗ នៃសង្គម បង្ហាញនូវមោទនភាពចំពោះអត្តសញ្ញាណរបស់ខ្លួន និងជាពិសេសចំពោះអត្តសញ្ញាណជាតិ ជារួម ដែលជាអ្វីធ្វើឱ្យខ្លួនយើងមានមោទនភាពក្នុងនាមជាខ្មែរ ក្រោម “ទង់នៃព្រះរាជាណាចក្រកម្ពុជា” ដោយការរួបរួម សាមគ្គី ឯកភាព ជាកម្លាំងជាតិតែមួយ បង្កើនមនោសញ្ចេតនារវាងប្រជាជន និងនៃប្រជាជាតិកម្ពុជា ទោះនៅក្នុងប្រទេស ឬនៅឯនាយសមុទ្រ ក្នុងការអបអរសាទរក្នុងនាមជាមហាគ្រួសារខ្មែរតែមួយ នៅក្រោមទង់ជាតិតែមួយហើយដែលមាន អនាគតតែមួយដើម្បីកម្ពុជា។
សូមជម្រាបជូនថា ព្រឹត្តិការណ៍ “សាទរកម្ពុជា” នឹងប្រារព្ធឡើងនៅវេលាអស្តង្គតនៃថ្ងៃទី៣១ ខែធ្នូ ឆ្នាំ២០២៤ ហើយ បន្តរហូតដល់វេលាឆ្លងឆ្នាំសកល២០២៥។ ព្រឹត្តិការណ៍នេះនឹងត្រូវរៀបចំឡើងដោយចាប់ផ្តើមពីការតាំងលម្អ រចនាតុបតែង និងផ្សារភ្ជាប់ គំនិតច្នៃប្រឌិតសិល្បៈបុរាណនិងសហសម័យ នៅតាមសួនច្បារប្របមាត់ទន្លេចតុមុខ រហូតមកដល់សួន ច្បារមុខប្រាសាទច័ន្ទឆាយានៃព្រះបរមរាជវាំង។ ហើយក្នុងនោះក៏មានកម្មវិធីជាច្រើនដូចជា ល្បែងកម្សាន្តប្រជាប្រិយទសវត្សរ៍ទី៩០,ការបង្ហាញម្ហូបអាហារប្រពៃណី,ការតុបតែងលម្អភ្លើងពណ៌ចម្រុះ និងបង្ហាញគំនូរច្នៃប្រឌិត និងទស្សនីយភាពចម្រុះ រួមទាំងសកម្មភាពកម្សាន្តជាច្រើនផ្សេងទៀតផងដែរ។
សូមបញ្ជាក់ថា កម្មវិធីដ៏ពិសេសមួយដែលជានិមិត្តរូបនៃ ព្រឹត្តិការណ៍សាទរកម្ពុជា គឺ ក្បួនដង្ហែទង់ជាតិកម្ពុជា ដែលជាការសម្រេចដល់គោលបំណងនៃព្រឹត្តិការណ៍ ជាការផ្តល់ឱកាសសម្រាប់បុគ្គល ក្រុម សហគមន៍ ឬជាសង្គមទាំងមូល បង្ហាញសក្តានុពលដើម្បីចូលរួម សាទរកម្ពុជា ក្រោមទង់នៃប្រជាជាតិ “ទង់នៃព្រះរាជាណាចក្រកម្ពុជា” ដោយការរួបរួម សាមគ្គី ឯកភាព ទៅជាកម្លាំងជាតិតែមួយ៕
