សិស្សានុសិស្សឃុំភ្លុក ស្រុកសេសាន ខេត្តស្ទឹងត្រែងចំនួន២៥០នាក់ ទទួលបានសម្ភារៈសិក្សាពីគម្រោង «កាតាបខ្ញុំ អនាគតខ្ញុំ» របស់ក្រុមហ៊ុនមីជាតិ
ភ្នំពេញ៖ ក្រុមហ៊ុនមីជាតិ បាននាំយកនូវសម្ភារសិក្សា និងសម្ភារប្រើប្រាស់ចាំបាច់មួយចំនួនធំ ជូនដល់សិស្សានុសិស្ស ដែលកំពុងសិក្សានៅសាលាឋមសិក្សា និងអនុវិទ្យាល័យ ស្ថិតនៅក្នុងឃុំ ភ្លុក ស្រុកសេសាន ខេត្តស្ទឹងត្រែង នៅព្រឹកថ្ងៃទី០៦ ខែធ្នូ ឆ្នាំ២០២៤នេះ ជាមួយគម្រោង «កាតាបខ្ញុំ អនាគតខ្ញុំ» ដែលជាគំនិតផ្តួចផ្តើមរបស់មីជាតិ។
កម្មវិធីនេះ ត្រូវបានប្រព្រឹត្តឡើងក្រោមអធិបតីភាពឯកឧត្តម សរ សុពុត្រា អភិបាលខេត្តស្ទឹងត្រែង ថ្នាក់ដឹកនាំក្រុមហ៊ុនមីជាតិ មន្ត្រីរាជការ អាជ្ញាធរមូលដ្ឋាន លោកគ្រូអ្នកគ្រូ បុគ្គលិកក្រុមហ៊ុនមីជាតិ អាណាព្យាលបាល និងសិស្សានុសិស្ស ប្រមាណ៣០០នាក់។
សម្ភារៈដែលបាននាំជូនសាលា សិស្សនុសិស្ស លោកគ្រូ អ្នកគ្រូ មាតាបិតាសិស្សនាពេលនេះរួមមាន កាតាបស្ពាយ សៀវភៅ ខ្មៅដៃ សៀវភៅគំនូរ ដបទឹក ទឹកដោះគោ ទឹកពិសារវីតាល់ និងមីជាតិជាច្រើនកេះផងដែរ។
លោក ជុនហៀង ថាវសិទ្ធិ អនុប្រធានធុរកិច្ច នៃក្រុមហ៊ុន វ័ន ហ្វ្រេតធើនីធី (មីជាតិ) បានឲ្យដឹងថា អ្វីដែលក្រុមហ៊ុនមីជាតិបានរៀបចំនាពេលនេះ គឺបានផ្សារភ្ជាប់យ៉ាងពិសេសដល់កម្លាំងជំរុញទឹកចិត្តរបស់កូនៗ សិស្សានុសិស្ស ដោយប្រាកដថាកូនៗមិនអាចខ្វះទេសម្ភារៈល្អៗដើម្បីយកទៅរៀនសូត្រ និងដើម្បីក្លាយខ្លួនជាកូនល្អ មិត្តល្អ សិស្សល្អ និងពលរដ្ឋល្អសម្រាប់សង្គម។ការចូលរួមចំណែកនាថ្ងៃនេះក៏ជាផ្នែកមួយនៃការលើកទឹកចិត្ត និងជំរុញដល់ការសិក្សារបស់ក្មួយដែលជាទំពាំងស្នងឬស្សី ដើម្បីឲ្យក្លាយជាមូលធនមនុស្សមានប្រយោជន៍ដល់សង្គមជាតិនាពេលអនាគត់។
លោក ជុនហៀង ថាវសិទ្ធិ បានមានប្រសាសន៍បន្ថែមថាក្រៅពីការផ្តល់ជូនការតាបដល់កូនៗសិស្សានុសិស្ស ក្រុមហ៊ុនមីជាតិរៀបចំនាំយកនូវសម្ភារៈជាច្រើនដើម្បីជាការដូដល់កូនៗក្មួយសិស្សានុសិស្សរួមមានសម្ភារៈសិក្សា ដបទឹក អាហារ នំចំណី ដែលសង្ឃឹមថារបស់ទាំងនេះអាចជួយសម្រួលដល់តម្រូវការចាំបាច់របស់អាណាព្យាបាល និងកូនៗបានមួយគ្រាសម្រាប់ប្រើប្រាស់ក្នុងការសិក្សារៀនសូត្រក្នុងឆ្នាំសិក្សាថ្មីនេះ ។ លោកថាក្រុមការងារក្រុមហ៊ុនមីជាតិនឹងបន្តចូលរួមឧបត្ថម្ភគាំទ្រដល់ការបង្កើតគម្រោងថ្មីៗបន្ថែមទៀតដើម្បីចូលរួមដោះស្រាយនិងឆ្លើយតបតម្រូវការចាំបាច់របស់សង្គមឲ្យកាន់តែទូលំទូលាយនិងច្រើនបន្ថែមទៀត។
នាឱកាសនេះ ឯកឧត្តម សរ សុពុត្រា អភិបាលខេត្តស្ទឹងត្រែង បានសម្តែងការកោតសសើរ និងវាយតម្លៃខ្ពស់ចំពោះគំនិតផ្តួចផ្តើម របស់ក្រុមហ៊ុនមីជាតិ ដែលប្រឹងប្រែងទាំងកម្លាំងកាយចិត្ត និងធនធានក្នុងការនាំយកនូវអំណោយទាំងនេះ មកជូនដល់លោកគ្រូ អ្នកគ្រូ និងសិស្សានុសិស្ស ក្នុងឱកាសវិលត្រលប់ចូលសិក្សាឆ្នាំថ្មីនេះ។
ឯកឧត្តមអភិបាលខេត្តស្ទឹងត្រែង បានថ្លែងថាគម្រោង «កាតាបខ្ញុំ អនាគតខ្ញុំ» របស់ក្រុមហ៊ុនមីជាតិគឺពិតជាមានសារៈសំខាន់និងបានផ្តល់ស្នាមញញឹមនិងក្តីសង្ឃឹមសម្រាប់កុមារតូចៗក៏ដូចជាក្រុមគ្រួសារ។ កម្មវិធី «កាតាបខ្ញុំ អនាគតខ្ញុំ» បាននាំយកនូវ កាតាបល្អ សម្ភារៈសិក្សា ដោយប្រាកដថាកូនៗដែលនៅតំបន់ជនបទដាច់ស្រយាលយ៉ាងណាក៏ដោយ ក៏យើងនៅតែមានសម្ភារៈសិក្សាល្អ ដើម្បីបន្តរួមចំណែកក្នុងការខិតខំប្រឹងប្រែងសិក្សាដើម្បីអនាគតខ្លួនឯង។
ឯកឧត្តម សរ សុពុត្រា បានមានប្រសាសន៍បន្តថា កម្មវិធីនេះមិនត្រឹមតែផ្តល់ស្នាមញញឹមនិងក្តីសង្ឃឹមសម្រាប់កុមារតូចៗនោះទេ ប៉ុន្តែកម្មវិធីនេះបានរំលេចនូវស្មារតីជាតិនិយមយ៉ាងធំធេង គឺការតម្កល់នូវតម្លៃធនធានមនុស្សព្រោះកម្មវិធីនេះផ្តោតសំខាន់លើការពង្រឹងសាមគ្គីភាព ពង្រីកការយល់ដឹង និងការលើកទឹកចិត្តដល់កូនៗទាំងអស់ឲ្យខិតខំរៀនសូត្រ។
ទន្ទឹមនិងនេះ ឯកឧត្តអភិបាលខេត្តស្ទឹងត្រែង បានជំរុញលើកទឹកចិត្តដល់មាតាបិតាទាំងអស់ត្រូវបញ្ជូនកូនៗឲ្យទៅរៀនឲ្យបានចប់ចុងចប់ដើមទោះស្ថិតនៅក្នុងស្ថានភាពលំបាកបែបណាក៏ដោយ គឺមិនត្រូវឲ្យពួកគាត់បោះបង់ចោលការសិក្សាជាដាច់ខាត ការៀនសូត្រនិងឲ្យជីវភាពបងប្អូនកាន់តែប្រសើឡើង។
គួបញ្ជាក់ផងដែរថា គម្រោង «កាតាបខ្ញុំ អនាគតខ្ញុំ» របស់ក្រុមហ៊ុនមីជាតិគឺបានផ្តល់សម្ភារៈសិក្សាដល់សិស្សានុសិស្សចំនួន២៥០នាក់ មកពីសាលាចំនួនបីរួមមានសាលាបឋមសិក្សាភ្លុក សាលាបឋមសិក្សាបានប៊ុង និងអនុវិទ្យាល័យភ្លុក ឃុំភ្លុក ស្រុកសេសាន ខេត្តស្ទឹងត្រែង ៕
