មេបញ្ជាការរង នាយសេនាធិការ កងពលតូចថ្មើរជើងលេខ៥២ ចុះត្រួតពិនិត្យលំហាត់យុទ្ធដំណើរទ័ព របស់អង្គភាពចំណុះ
ភ្នំពេញ៖ វរសេនីយ៍ឯក អ៊ួម សុធារ៉ា មេបញ្ជាការរង នាយសេនាធិការ លោកវរសេនីយ៍ឯក ម៉ី សឹង្ហវាសនា មេបញ្ជាការរងកងពលតូចថ្មើរជើងលេខ៥២ នាថ្ងៃទី៥ ខែធ្នូ ឆ្នាំ២០២៤ បានអញ្ជើញចុះត្រួតពិនិត្យ
សកម្មភាពធ្វើលំហាត់យុទ្ធដំណើរទ័ព របស់វរសេនាតូចលេខ៥២១ ដឹកនាំដោយលោកវរសេនីយ៍ទោ សោម សាយ៉ុម មេបញ្ជាការវរសេនាតូចលេខ៥២១ រយៈពេល ១ថ្ងៃ ១យប់ ភូមិសាស្ដ្រភូមិអូរតាទៀក ឃុំតាតោក ស្រុកសំឡូត ខេត្តបាត់ដំបង។
ក្នុងការធ្វើយុទ្ធដំណើរទ័ពនេះដែរ វរសេនីយ៍ឯក មេបញ្ជាការរង នាយសេនាធិការ បានលើកឡើងថា ស្ថិតក្នុងស្ថានភាពដែលប្រទេសជាតិមានសុខសន្តិភាព ស្ថិរភាពនយោបាយ គឺជាឱកាសសម្រាប់កងទ័ពត្រូវអនុវត្តលំហាត់យុទ្ធដំណើរទ័ពពង្រឹងកាយសម្បទារឹងមាំ និងរំលឹកឡើងវិញនូវជំនាញបច្ចេកទេស ពិសេសលើផ្នែកយុទ្ធវិធី ដើម្បីធានាបាននូវការអនុវត្តន៍តួនាទី ភារកិច្ចទទួលបានជោគជ័យតាមបទបញ្ជារបស់ថ្នាក់ដឹកនាំប្រគល់ជូន។
លោកមេបញ្ជាការ បន្តទៀតថា ការធ្វើលំហាត់យុទ្ធដំណើរនាពេលនេះ គឺដើម្បីឲ្យសិក្ខាកាមទាំងអស់ក្នុងវគ្គបំប៉នពង្រឹង តំបន់ប្រតិបត្តិការសឹករងបន្ទាយមានជ័យ ទទួលបាននូវចំណេះដឹង និងមានសមត្ថភាពគ្រប់គ្រាន់ក្នុងការដឹកនាំបញ្ជា ការងារលើផ្នែកយុទ្ធវិធី ត្រៀមប្រយុទ្ធបានស្ទាត់ជំនាញដើម្បីធានាបាននូវភារកិច្ចការពារជាតិមាតុភូមិ និងប្រជាជន៕
