បណ្តាក្រុមហ៊ុនជាង៣០ របស់ហុងកុង ស្នើសុំធ្វើដំណើរមកស្វែងយល់ពីកម្ពុជា និងគោលដៅទេសចរណ៍ ដើម្បីរៀបចំកញ្ចប់ទស្សនកិច្ចថ្មីជូនអតិថិជនរបស់ខ្លួន នាពេលឆាប់ៗខាងមុខ

ភ្នំពេញ៖ ក្នុងអំឡុងពេលទស្សនកិច្ចការងារនៅតំបន់រដ្ឋបាលពិសេសហុងកុង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងគណៈប្រតិភូ បានអញ្ជើញជួបពិភាក្សាការងារជាមួយលោកអនុរដ្ឋមន្រ្តីទទួលបន្ទុកវប្បធម៌ កីឡា និងទេសចរណ៍ នៃតំបន់រដ្ឋបាលពិសេសហុងកុង លោកប្រធានក្រុមប្រឹក្សាភិបាលទេសចរណ៍ហុងកុង តំណាងការិយាល័យទេសចរណ៍តំបន់រដ្ឋបាលពិសេសម៉ាកាវ តំណាងក្រុមហ៊ុនអាកាសចរណ៍ China Southern Airlines និងក្រុមហ៊ុន Hong Kong Airlines, នាយកប្រតិបត្តិនៃទីភ្នាក់ងារទេសចរណ៍ធំ និងល្បីៗ ក្នុងទីផ្សារហុងកុងនិងម៉ាកាវ ព្រមទាំងក្រុមហ៊ុនប្រឹក្សាយោបល់ក្នុងគម្រោង Disneyland Hong Kong សរុបជាង៣០។

ក្នុងជំនួបនេះ ឯកឧត្តមរដ្ឋមន្រ្តី បានគូសបញ្ជាក់ពីស្ថានភាពនយោបាយ សេដ្ឋកិច្ច និងសន្តិសុខ សណ្តាប់ធ្នាប់សាធារណៈដែលមានស្ថិរភាព និងល្អប្រសើរ ជាពិសេសសក្តានុពលទេសចរណ៍កម្ពុជា ដោយបង្ហាញជូននូវវីដេអូនិងរូបថតគោលដៅទេសចរណ៍សំខាន់ៗ និងស្រស់ស្អាត។

តាមរយៈជំនួបនេះ បណ្តាក្រុមហ៊ុនបានជម្រាបជូន ឯកឧត្តមរដ្ឋមន្រ្តី ពីចំណាប់អារម្មណ៍ សំណូមពរ និងគម្រោងស្នើសុំធ្វើដំណើរមកស្វែងយល់ពីប្រទេសកម្ពុជា និងគោលដៅទេសចរណ៍ ដើម្បីរៀបចំកញ្ចប់ទស្សនកិច្ចថ្មីបន្ថែមជូនអតិថិជនរបស់ខ្លួន នាពេលឆាប់ៗខាងមុខ ៕