Apple គ្រោងបោះទុនវិនិយោគ ១ពាន់លានដុល្លារ នៅឥណ្ឌូណេស៊ី ដើម្បីអាចដាក់លក់ iPhone 16

ហ្សាការតា៖ រដ្ឋមន្ត្រីក្រសួងវិនិយោគរបស់ឥណ្ឌូណេស៊ី លោក រ៉ូសាន់ រ៉ូសឡានី (Rosan Roeslani) បានបញ្ជាក់នៅថ្ងៃអង្គារទី៣ ខែធ្នូថា ឥណ្ឌូណេស៊ីរំពឹងថានឹងទទួលបានការវិនិយោគចំនួន១ ពាន់លានដុល្លារពីក្រុមហ៊ុនបច្ចេកវិទ្យាខ្នាតយក្ស Apple ក្នុងរយៈមួយសប្តាហ៍ទៀត បន្ទាប់ពីរដ្ឋាភិបាលបានហាមឃាត់ការដាក់លក់ទូរសព្ទម៉ូដែលចុងក្រោយ iPhone 16 សម្រាប់ការខកខានមិនគោរពតាមច្បាប់មាតិកាក្នុងស្រុក។

ឥណ្ឌូណេស៊ីបានបញ្ឈប់ការលក់ស្មាតហ្វូនម៉ូដែលចុងក្រោយនេះ ព្រោះប្រទេសនេះកំណត់ថាទូរសព្ទដែលលក់ក្នុងស្រុកត្រូវមានយ៉ាងហោចណាស់៤០ ភាគរយនៃគ្រឿងផ្គុំដែលផលិតក្នុងស្រុក ហើយក្រុមហ៊ុន Apple មិនបានអនុវត្តតាម។ លោក រ៉ូសាន់បាននិយាយថា ប្រទេសឥណ្ឌូណេស៊ីគ្រោងនឹងបង្កើនតម្រូវការនេះបន្ថែមទៀត។ បន្ថែមពីនោះ រដ្ឋមន្ត្រីក្រសួងវិនិយោគរូបនេះបានប្រាប់សមាជិកសភាថា ប្រទេសឥណ្ឌូណេស៊ីរំពឹងថានឹងមានការវិនិយោគបន្ថែមទៀត ប្រសិនបើ Apple សម្រេចចិត្តធ្វើឱ្យប្រទេសនេះជាផ្នែកមួយនៃខ្សែច្រវាក់ផ្គត់ផ្គង់របស់ខ្លួន។

លោក​បន្តថា៖ «អ្នកណាទទួលបានផលប្រយោជន៍ពីការលក់ ត្រូវតែវិនិយោគ និងបង្កើតការងារនៅទីនេះ។ អ្វីដែលសំខាន់គឺរបៀបដែលខ្សែច្រវាក់តម្លៃសកលផ្លាស់ទីនៅទីនេះ ពីព្រោះនៅពេលដែលវាកើតឡើង អ្នកផ្គត់ផ្គង់នឹងធ្វើតាម»។

គួររំឭកថា ក្រុមហ៊ុន Apple ធ្លាប់បានដាក់សំណើរវិនិយោគ១០០ លានដុល្លារ ដើម្បីសាងសង់រោងចក្រផលិតគ្រឿងបន្លាស់ និងគ្រឿងផ្គុំក្នុងប្រទេសឥណ្ឌូណេស៊ី ដើម្បីអាចលក់ទូរសព្ទ iPhone 16 បាន ប៉ុន្តែរដ្ឋាភិបាលបានច្រានចោលដោយហេតុផលថា ក្រុមហ៊ុនមិនបានបំពេញតាមគោលការណ៍យុត្តិធម៌។ ក្រុមហ៊ុន Apple មិនមានកន្លែងផលិតនៅក្នុងប្រទេសឥណ្ឌូណេស៊ី ដែលជាប្រទេសមានប្រជាជនប្រមាណ២៨០លាននាក់ ប៉ុន្តែចាប់តាំងពីឆ្នាំ២០១៨ បានបង្កើតសាលាអភិវឌ្ឍន៍កម្មវិធីជាច្រើនកន្លែង៕