សម្តេចធិបតី បង្ហាញផលប្រយោជន៍ចំនួន២ ដែលប្រទេសជាតិទទួលបានក្រោយពលរដ្ឋផ្លាស់ប្ដូរពីការប្រើប្រាស់យានយន្ដប្រើប្រេងឥន្ធនៈ ទៅប្រើយានយន្ដអគ្គិសនី
ភ្នំពេញ៖ ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងរ៉ែ និងថាមពល នៅរសៀលថ្ងៃទី២១ ខែវិច្ឆិកា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា បានបង្ហាញនូវផលប្រយោជន៍សំខាន់ៗ ចំនួន២ ដែលប្រទេសជាតិទទួលបានក្រោយប្រជាពលរដ្ឋផ្លាស់ប្ដូរពីការប្រើប្រាស់យានយន្ដប្រើប្រេងឥន្ធនៈ ទៅប្រើយានយន្ដអគ្គិសនី។
ផលប្រយោជន៍ចំនួន២ ដែលត្រូវបានសម្ដេចមហាបវរធិបតី ហ៊ុន ម៉ាណែត លើកមកបង្ហាញ រួមមាន៖ ទី១. បង្កើនប្រសិទ្ធភាព នៃការប្រើប្រាស់ថាមពលសម្រាប់ការដឹកជញ្ជូន ដោយការប្រើប្រាស់យានយន្តអគ្គិសនីប្រើថាមពលតិចជាង ការប្រើយានយន្តប្រើប្រេងឥន្ធនៈប្រហែល៥ដង និងទី២. បន្ថយការបញ្ចេញឧស្ម័នកាបូនក្នុងវិស័យដឹកជញ្ជូន ដោយងាកមកប្រើថាមពលអគ្គិសនី ដែលផលិតពីថាមពលស្អាតកាន់តែច្រើនវិញ។
សម្ដេចធិបតី នាយករដ្ឋមន្ត្រី បានអះអាងថា រាជរដ្ឋាភិបាលបានដាក់ចេញនូវគោលនយោបាយជាតិស្ដីពីការអភិវឌ្ឍយានយន្ដអគ្គិសនី ឆ្នាំ២០២៤-២០៣០ ដែលមានគោលបំណងជំរុញការប្រើប្រាស់ និងការអភិវឌ្ឍប្រព័ន្ធអេកូឡូស៉ី នៃវិស័យយានយន្តអគ្គិសនីទាំងមូល។
ជាមួយគ្នានេះ សម្ដេចធិបតី ហ៊ុន ម៉ាណែត បានបង្ហើបថា រាជរដ្ឋាភិបាលកម្ពុជា កំពុងចរចាជាមួយក្រុមហ៊ុនរថយន្ដ BYD ដែលជាក្រុមហ៊ុនរថយន្ដអគ្គិសនី ដើម្បីដំឡើងរោងចក្រផលិតរថយន្ដអគ្គិសនីនៅប្រទេសកម្ពុជាតែម្ដង។ ខណៈនៅពេលបច្ចុប្បន្ននេះ មានក្រុមហ៊ុនជាច្រើនបាននាំចូលរថយន្ដអគ្គិសនី ឬអគ្គិសនីលាយសាំង ចូលមកប្រទេសកម្ពុជា។
សម្ដេចធិបតី បានណែនាំដល់ក្រសួងរ៉ែ និងថាមពល ដែលមានតួនាទីភារកិច្ចដឹកនាំជំរុញការអភិវឌ្ឍស្ថានីយ៍បញ្ចូលថាមពលយានយន្ដអគ្គិសនីនៅកម្ពុជា ត្រូវរៀបចំដាក់ចេញនូវចំណាត់ការនានា ជុំវិញការអភិវឌ្ឍស្ថានីយ៍បញ្ចូលថាមពលយានយន្ដអគ្គិសនីឲ្យបានត្រឹមត្រូវតាមស្ដង់ដារបច្ចេកទេស។
សម្ដេចធិបតី នាយករដ្ឋមន្ត្រី បានបន្ដថា មានតែការអភិវឌ្ឍស្ថានីយ៍បញ្ចូលថាមពលយានយន្ដអគ្គិសនីឲ្យបានកាន់តែប្រសើរច្រើនទេ ទើបអាចដាក់ចេញទាក់ទាញការបង្កើត ការផ្លាស់ប្ដូរយានយន្ដពីប្រើប្រេងឥន្ធនៈ ទៅប្រើប្រាស់យានយន្ដអគ្គិសនីវិញជាបណ្ដើរៗ ដើម្បីផ្ដល់ជម្រើសសម្រាប់ប្រជាពលរដ្ឋ ៕
