អភិបាលខេត្តស្ទឹងត្រែង ណែនាំនិងសំណូមពរដល់ប្រជាពលរដ្ឋសូមមេត្តាអប់រំបងប្អូនកូនចៅ ឲ្យចៀសឆ្ងាយពីគ្រឿងញៀន និងចូលរួមរាយការណ៍ទៅសមត្ថកិច្ចពាក់ព័ន្ធដើម្បីបង្ក្រាបរាល់បទល្មើសនានា

ភ្នំពេញ៖ វេទិការផ្សព្វផ្សាយនិងពិគ្រោះយោបល់ របស់ក្រុមប្រឹក្សាខេត្តស្ទឹងត្រែងត្រូវបានបន្តធ្វើឡើងនៅក្រុងស្ទឹងត្រែង ក្រោមអធិបតីភាព ឯកឧត្តម ឈាង ឡាក់ ប្រធានក្រុមប្រឹក្សាខេត្ត និងឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង ដោយមានការចូលរួមពីសំណាក់ថ្នាក់ដឹកនាំកងកម្លាំងទាំងបីប្រភេទ ប្រធាន អនុប្រធានមន្ទីរអង្គភាពជុំវិញខេត្ត គណៈអភិបាលក្រុង ចៅសង្កាត់ និងប្រជាពលរដ្ឋចំនួន៤៥០នាក់។

ឯកឧត្តម ឈាង ឡាក់ ប្រធានក្រុមប្រឹក្សាខេត្តស្ទឹងត្រែង បានមានប្រសាសន៍ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្ទឹងត្រែង អាណត្តិទី៤ នាថ្ងៃនេះក៏មិនខុសពីវេទិការដែលធ្វើឡើងនៅតាមបណ្តាស្រុកនានាពីមុនដែរ គឺដើម្បីផ្សព្វផ្សាយពីសមិទ្ធផលនៃការអនុវត្តការងាររបស់រដ្ឋបាលខេត្ត ការផ្ដល់ព័ត៌មានដល់ក្រុមប្រឹក្សាក្រុង-ស្រុក ក្រុមប្រឹក្សាឃុំ-សង្កាត់ សហគមន៍ ប្រជាពលរដ្ឋ និងអ្នកពាក់ព័ន្ធអំពីសកម្មភាពនានារបស់ក្រុមប្រឹក្សា និងគណៈអភិបាលខេត្ត ក្នុងការឆ្លើយតបទៅនឹងសំណើទាំងឡាយរបស់ក្រុមប្រឹក្សាក្រុង-ស្រុក ក្រុមប្រឹក្សាឃុំ-សង្កាត់ នឹងសហគមន៍មូលដ្ឋាន និងប្រមូល ពិភាក្សាអំពីសំណើ និងមតិយោបល់នានា សម្រាប់សកម្មភាពឆ្នាំខាងមុខ ដែលមានការចូលរួមរបស់សមាជិកក្រុមប្រឹក្សា គណៈអភិបាលខេត្ត សមាជិកក្រុមប្រឹក្សា គណ:អភិបាលក្រុង-ស្រុក សមាជិកក្រុមប្រឹក្សាឃុំ-សង្កាត់ រួមទាំងតំណាងសហគមន៍ប្រជាពលរដ្ឋ និងអ្នកពាក់ព័ន្ធដទៃទៀត។

ឯកឧត្តម ឈាង ឡាក់ បន្តថាតាមរយៈការដំណើរការវេទិកានាពេលមួយព្រឹកនេះ បានបង្ហាញនូវ របាយការណ៍សមិទ្ធផលនៃការអភិវឌ្ឍសេដ្ឋកិច្ចសង្គម ព្រមទាំងបញ្ហាប្រឈម និងទិសដៅភារកិច្ច សំខាន់ៗមួយចំនួនធំក្នុងខេត្ត។ ទន្ទឹមនោះអង្គវេទិកាក៏បានទទួលនូវធាតុចូលជាគន្លឹះមួយចំនួនពី ដំណើរការអង្គវេទិកា ដើម្បីពិចារណាក្នុងការរៀបចំនូវផែនការសកម្មភាពជាអាទិភាពក្នុងការ រក្សាបាននូវសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ការគ្រប់គ្រងដឹកនាំអនុវត្ត តាមបណ្តាការដ្ឋានការងារតាមវិស័យ និងការអភិវឌ្ឍសេដ្ឋកិច្ច សង្គមកិច្ច រួមទាំងការផ្តល់សេវា សាធារណៈ ការលើកកម្ពស់សមត្ថភាពជំនាញឱ្យកាន់តែមានប្រសិទ្ធភាពខ្ពស់។

នាឱកាសចូលរួលឆ្លើយតបចំពោះសំណើរ សំណូមពរ របស់ប្រជាពលរដ្ឋនៅមូលដ្ឋានក្រុងស្ទឹងត្រែង ដែលបានលើកឡើងនៅក្នុងវេទិការ ឯកឧត្តម សរ សុពុត្រា អភិបាលខេត្តស្ទឹងត្រែងបានបង្ហាញពីការយកចិត្តទុកដាក់ខ្ពស់ ក្នុងនាមជាអាជ្ញាធរខេត្ត ដោះស្រាយនូវសំណើរ សំណូមពរ និងបញ្ហាប្រឈមរបស់ប្រជាពលរដ្ឋប្រកបដោយការទទួលខុសត្រូវខ្ពស់ ជាពិសេសលើបញ្ហាសន្តិសុខសណ្តាប់ធ្នាប់សាធារណៈ ការពង្រឹងការអនុវត្តគោលនយោបាយភូមិឃុំមានសុវត្តិភាពតាមរយៈការបង្ក្រាបជាបន្តបន្ទាប់នូវក្មេងទំនើង ការបង្ក្រាបចំពោះជនដែលលួចលាក់ជួញដូរនិងប្រើប្រាស់ដោយខុសច្បាប់នូវសារធាតុញៀន និងការឆ្លើយតម្រូវការមូលដ្ឋាដូចជាបញ្ហាភ្ជាប់ទឹកស្អាត ការជួសជុលផ្លូវថ្នល់ឡើងវិញ ការដោះស្រាយបញ្ហាវិវាទរបស់អាជីវករជាដើម។

ទន្ទឹមនិងនេះឯកឧត្តម សរ សុពុត្រា អភិបាលខេត្ត ក៏បានណែនាំនិងសំណូមពរដល់បងប្អូនប្រជាពលរដ្ឋសូមមេត្តាអប់រំបងប្អូនកូនចៅ ឲ្យចៀសចាក់ឆ្ងាយពីគ្រឿងញៀន និងចូលរួមរាយការណ៍ទៅសមត្ថកិច្ចពាក់ព័ន្ធដើម្បីបង្ក្រាបនូវរាល់បទល្មើសនានាដែលកើតឡើងនៅក្នុងមូលដ្ឋានរបស់ខ្លួន។

សូមបញ្ជាក់ផងដែរថា បញ្ហាប្រឈម សំណើរ និងសំនូមពរ ដែលប្រជាពលរដ្ឋលើកឡើងនៅក្នុងវេទិការផ្សព្វផ្សាយនិងពិគ្រោះយោបល់ របស់ក្រុមប្រឹក្សាខេត្តស្ទឹងត្រែង នាពេលនេះមានសរុបចំនួន៤០ ក្នុងលើកឡើងផ្ទាល់មាត់ចំនួន១៨ សំណើរចំនួន២២ និងបានធ្វើការដោះស្រាយបានភ្លាមៗនៅក្នុងវេទិការ បានទាំង៤០ផងដែរ៕