អភិបាលខេត្តបន្ទាយមានជ័យ ជំរុញសមាជិកាក្រុមប្រឹក្សា ត្រូវខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋ ដោយស្មើភាព និងតម្លាភាព

ភ្នំពេញ៖ នៅថ្ងៃទី១២ ខែវិច្ឆិកា ឆ្នាំ ២០២៤ ឯកឧត្តមបណ្ឌិត ប៉ាន់ខែម ប៊ុនថន នាយករងខុទ្ទកាល័យ សម្ដេចមហាបវរធិបតី និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងឯកឧត្ដម យុត ស្វិនី សមាជិកក្រុមប្រឹក្សាខេត្ត តំណាង ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត បានអញ្ជើញជាអធិបតីប្រកាសទទួលស្គាល់ លោក ឈាន ចំរើន ចូលកាន់តំណែង ជាប្រធានក្រុមប្រឹក្សា ក្រុងប៉ោយប៉ែត អាណត្តិទី៤ ជំនួស លោក ឈឹម គន្ធា និងប្រកាសទទួលស្គាល់សមាសភាព ក្រុមប្រឹក្សាក្រុង ដែលពិធីនេះប្រារព្ធធ្វើឡើង នៅបរិវេណសាលាក្រុងប៉ោយប៉ែត។

ដើម្បីឆ្លើយសេចក្តីទុកចិត្តរបស់ថ្នាក់ដឹកនាំ លោក ឈាន ចំរើន ប្រធានក្រុមប្រឹក្សាក្រុងប៉ោយប៉ែត ដែលទើបនិងកាន់មុខដំណែងថ្មី បានប្តេជ្ញាគោរពតាមបទបញ្ជាផ្ទៃក្នុងរបស់ក្រុមប្រឹក្សា ដើម្បីរួមគ្នាសម្រេចបាននូវកិច្ចជូនប្រជាពលរដ្ឋ ពង្រឹងស្មារតីសាមគ្គីភាព ឯកភាពផ្ទៃក្នុងឱ្យបានល្អនៅក្នុងក្រុមប្រឹក្សា គណៈអភិបាល មន្រ្តីរាជការ និងកងកម្លាំងមានសមត្ថកិច្ចគ្រប់លំដាប់ថ្នាក់ ដោយឈរលើមូលដ្ឋាន នៃការលើកកម្ពស់ប្រសិទ្ធភាពការងារ ការគោរពតាមច្បាប់ គោរពគោលការណ៍នានារបស់រដ្ឋ និងពង្រឹងរបៀបរបបធ្វើការ ដើម្បីលើកកម្ពស់ការទទួលខុសត្រូវ និងភាពជាម្ចាស់របស់មន្រ្តីនៅក្នុងការបំពេញតួនាទី សំដៅអភិវឌ្ឍមូលដ្ឋាន និងឆ្លើយតបចំពោះតម្រូវការរបស់ប្រជាពលរដ្ឋ។

ថ្លែងនាឱកាសនោះ ឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានបញ្ជាក់ថា ក្រុមប្រឹក្សា គឺជាតំណាងឱ្យប្រជាពលរដ្ឋក្នុងមូលដ្ឋានរបស់ខ្លួនទាំងមូល។ ក្រុមប្រឹក្សា នៃរដ្ឋបាលថ្នាក់ក្រោមជាតិ គឺជាផ្នែកមួយនៃអំណាចនីតិប្រតិបត្តិ និងមានស្វ័យភាព ក្នុងក្របខ័ណ្ឌដែលកំណត់ដោយច្បាប់លិខិតបទដ្ឋានគតិយុត្តជាធរមាន ក្នុងការគ្រប់គ្រងចាត់ចែងកិច្ចការមូលដ្ឋានរបស់ខ្លួន ដើម្បីឆ្លើយតបទៅនឹងតម្រូវការប្រជាពលរដ្ឋក្នុងដែនសមត្ថកិច្ចរបស់ខ្លួន។

ហេតុនេះ ក្នុងការអនុវត្តការងារ ឯកឧត្ដម ជំរុញ លោក-លោកស្រី ជាសមាជិកាក្រុមប្រឹក្សា ត្រូវខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព តម្លាភាព គណនេយ្យភាព សមធម៌ និងបរិយាបន្ន ជាពិសេសមិនត្រូវប្រកាន់និន្នាការនយោបាយណាមួយនោះឡើយ។

សូមបញ្ជាក់ថា លោក ឈឹម គន្ធា ជាប្រធានក្រុមប្រឹក្សា បានសុំលាឈប់ពីតំណែង។ ក្នុងនោះ ដើម្បីបំពេញបន្ថែម លោក ឈាន ចំរើន ត្រូវបានក្រសួងមហាផ្ទៃ ចេញប្រកាសទទួលស្គាល់ជាប្រធានក្រុមប្រឹក្សាក្រុងប៉ោយប៉ែត ស្របតាមខ្លឹមសារប្រកាសលេខ ៥៥២៨ ប្រក របស់ក្រសួងមហាផ្ទៃ៕