សហភាពអឺរ៉ុប ធានាបន្តគាំទ្រដល់អ៊ុយក្រែន បន្ទាប់ពីលោក ដូណាល់ ត្រាំ ឈ្នះការបោះឆ្នោតប្រធានាធិបតី
បរទេស៖ ប្រធានគោលនយោបាយការបរទេសរបស់សហភាពអឺរ៉ុប លោក ចូសេហ្វ បូរ៉េល (Josep Borrell) បានធ្វើការធានាឡើងវិញនូវការគាំទ្រមិនងាករេចំពោះអ៊ុយក្រែន ប៉ុន្មានថ្ងៃបន្ទាប់ពីការឈ្នះការបោះឆ្នោតរបស់លោក ដូណាល់ ត្រាំ បានធ្វើឱ្យមានភាពមិនប្រាកដប្រជាចំពោះកិច្ចខិតខំប្រឹងប្រែងសង្រ្គាមរបស់ខ្លួន។
លោក បូរ៉េល ជាមន្ត្រីកំពូលរបស់សហភាពអឺរ៉ុបដំបូងគេដែលធ្វើទស្សនកិច្ចនៅទីក្រុងកៀវចាប់តាំងពីជ័យជម្នះរបស់លោក ត្រាំ បានបញ្ជាក់ថា គោលបំណងនៃដំណើរទស្សនកិច្ចរបស់លោកគឺដើម្បីសង្កត់ធ្ងន់លើការគាំទ្ររបស់សហភាពអឺរ៉ុបសម្រាប់អ៊ុយក្រែន ខណៈសង្រ្គាមរបស់ខ្លួនជាមួយរុស្ស៊ីជិតដល់១ពាន់ថ្ងៃ។
លោកបានបន្តថា សហភាពអឺរ៉ុបបានផ្តល់ជំនួយផ្នែកយោធា និងហិរញ្ញវត្ថុចំនួន១២២ពាន់លានអឺរ៉ូ ឬត្រូវនឹងប្រមាណ ១៣១ពាន់លានដុល្លារដល់អ៊ុយក្រែន និងបានបណ្តុះបណ្តាលទាហានអ៊ុយក្រែនប្រហែល ៦ម៉ឺននាក់ ដោយបន្ថែមថា ប្លុកនេះមានគោលបំណងបង្វឹកទាហានរហូតដល់ ៧៥០០០នាក់ នៅចុងបញ្ចប់នៃរដូវរងារ។
លោក បូរ៉េល បានបញ្ជាក់ក្នុងអំឡុងសន្និសីទសារព័ត៌មានរួមគ្នាជាមួយរដ្ឋមន្ត្រីការបរទេសអ៊ុយក្រែននៅទីក្រុងកៀវថា ការគាំទ្រនេះនៅតែមិនផ្លាស់ប្ដូរ។ ការគាំទ្រនេះ គឺពិតជាចាំបាច់សម្រាប់អ៊ុយក្រែនដើម្បីបន្តការពារខ្លួនប្រឆាំងនឹងការឈ្លានពានរបស់រុស្ស៊ី។ យើងត្រូវការការដឹកជញ្ជូនលឿនជាងមុន និងកាត់បន្ថយការរារាំងបន្ថែមទៀត។
លោកក៏បានបញ្ជាក់ឡើងវិញនូវការគាំទ្ររបស់ខ្លួនចំពោះការអំពាវនាវរបស់អ៊ុយក្រែន ក្នុងការអនុញ្ញាតឱ្យមានការវាយប្រហាររយៈពេលវែងលើគោលដៅយោធានៅក្នុងប្រទេសរុស្ស៊ី។
ការគាំទ្រពីសម្ព័ន្ធមិត្តលោកខាងលិច គឺជាគន្លឹះសម្រាប់សមត្ថភាពរបស់អ៊ុយក្រែនក្នុងការការពារខ្លួនប្រឆាំងនឹងសត្រូវធំជាង និងមានឧបករណ៍ទំនើបៗជាង ពោលគឺរុស្ស៊ី។ ទោះបីជាសហរដ្ឋអាម៉េរិកជាសម្ព័ន្ធមិត្តដ៏សំខាន់ក៏ដោយ ប៉ុន្តែលោក ត្រាំ បានរិះគន់ទំហំនៃការគាំទ្រផ្នែកយោធា និងហិរញ្ញវត្ថុរបស់ខ្លួនសម្រាប់ទីក្រុងកៀវ ហើយបានសន្យាថានឹងបញ្ចប់សង្គ្រាមឱ្យបានឆាប់រហ័ស តែមិនបានបកស្រាយច្បាស់លាស់នោះទេ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី ស្ថិតក្នុងចំណោមមេដឹកនាំដំបូងគេដែលអបអរសាទរលោក ត្រាំ ហើយបាននិយាយថា ការសន្ទនារបស់ខ្លួនជាមួយប្រធានាធិបតីជាប់ឆ្នោតរបស់សហរដ្ឋអាម៉េរិក គួរតែបន្ត។ រដ្ឋមន្ត្រីការបរទេស លោក Andrii Sybiha បានឲ្យដឹងថា រដ្ឋធានីកៀវសង្ឃឹមថា សហរដ្ឋអាម៉េរិកនឹងបន្តការដឹកនាំក្នុងការជួយសម្រេចបានសន្តិភាព ដោយបន្ថែមថា ខ្លួននឹងចាប់ផ្តើមរៀបចំកិច្ចប្រជុំនាពេលអនាគរវាងមេដឹកនាំទាំងពីរ។
លោក បូរ៉េល ដែលគ្រោងនឹងចាកចេញពីតំណែងនៅខែក្រោយ បាននិយាយថា រដ្ឋមន្ត្រីការពារជាតិសហភាពអឺរ៉ុបនឹងប្រមូលផ្តុំគ្នានៅសប្តាហ៍ក្រោយ ដើម្បីពិភាក្សាអំពីការគាំទ្រដល់អ៊ុយក្រែន ទាំងផ្នែកយោធា និងការទូត ហើយនឹងបង្កើតសំណុំរឿងសម្រាប់ការជំរុញការគាំទ្រ។ កងទ័ពអ៊ុយក្រែនកំពុងឈរជើងនៅជួរមុខ ខណៈដែលរុស្ស៊ីបានបន្តការវាយលុកជាលំដាប់ក្នុងតំបន់ Donetsk ភាគខាងកើត។ គួរបញ្ជាក់ថា កងកម្លាំងរុស្ស៊ីបច្ចុប្បន្នកាន់កាប់ប្រហែល២០ នៃទឹកដីអ៊ុយក្រែន់។
