ចក្រភពអង់គ្លេស នឹងផ្តល់ប្រាក់កម្ចីដល់អ៊ុយក្រែនចំនួន ២,៩៤ពាន់លានដុល្លារ ដើម្បី ទិញ សព្វាវុធ និងកសាងហេដ្ឋារចនាសម្ព័ន្ធដែលខូចខាតឡើងវិញ

ឡុងដ៍៖ ចក្រភពអង់គ្លេស នឹងផ្តល់ប្រាក់កម្ចីដល់អ៊ុយក្រែនចំនួន ២,៩៤ពាន់លានដុល្លារ ជាផ្នែកមួយនៃប្រាក់កម្ចីដែលបានគ្រោងទុកដ៏ច្រើន ដោយបានមកពីក្រុមប្រទេសអ្នកមានទាំង៧ ក្រោយបង្កកទ្រព្យសម្បត្តិរបស់ធនាគារកណ្តាលរុស្ស៊ី ដើម្បីជួយទិញអាវុធ និងកសាងហេដ្ឋារចនាសម្ព័ន្ធដែលខូចខាតឡើងវិញ នៅក្នុងប្រទេសអ៊ុយក្រែន។

រដ្ឋមន្ត្រីការពារជាតិអង់គ្លេស លោក ចន ហាឡី បាននិយាយថា ប្រាក់ដែលផ្តល់ដោយចក្រភពអង់គ្លេស គឺសម្រាប់តែយោធាអ៊ុយក្រែនប៉ុណ្ណោះ ហើយអាចប្រើដើម្បីជួយអភិវឌ្ឍយន្តហោះគ្មានមនុស្សបើក មានសមត្ថភាពធ្វើដំណើរបានឆ្ងាយជាងមីស៊ីលរយៈចម្ងាយឆ្ងាយមួយចំនួន។

លោក ហាឡី បានលើកឡើងថា ការរួមចំណែករបស់អង់គ្លេសនៃប្រាក់កម្ចី G7 គឺជាលក្ខណៈពិសេសនៃកិច្ចពិភាក្សារវាងប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី និងនាយករដ្ឋមន្ត្រីអង់គ្លេស លោក គា ស្តាមើ (Keir Starmer) ក្នុងកិច្ចពិភាក្សានៅរាជធានីឡុងដ៍កាលពី២សប្តាហ៍មុន និងរដ្ឋមន្ត្រីការពារជាតិនៃក្រុមG7 នៅក្នុងប្រទេសអ៊ីតាលី កាលពីចុងសប្តាហ៍។

នៅពេលសួរថា តើចក្រភពអង់គ្លេសនឹងផ្តល់លុយឱ្យអ៊ុយក្រែន ប្រើប្រាស់ដើម្បីទិញមីស៊ីល Storm Shadow ផលិតដោយអង់គ្លេស ដើម្បីវាយប្រហារគោលដៅជ្រៅនៅក្នុងប្រទេសរុស្ស៊ីឬយ៉ាងណា..? លោក ហាឡី បានប្រាប់អ្នកយកព័ត៌មានថា៖«ពួកគេកំពុងអភិវឌ្ឍយ៉ាងខ្លាំងក្នុងការប្រើប្រាស់យន្តហោះគ្មានមនុស្សបើករយៈចម្ងាយឆ្ងាយ[..]»។ G7 បានប្រកាសកាលពីខែមិថុនាថា ខ្លួននឹងផ្តល់ប្រាក់កម្ចីចំនួន ៥០ពាន់លានដុល្លារ ដើម្បីជួយអ៊ុយក្រែន ដែលផ្តល់សេវាកម្មដោយប្រាក់ចំណេញបង្កើតបានប្រហែល៣០០ពាន់លានដុល្លារ នៅក្នុងទ្រព្យសម្បត្តិអធិបតេយ្យភាពរបស់រុស្ស៊ីដែលត្រូវបានបង្កកនៅលោកខាងលិច។ ទ្រព្យសកម្មត្រូវបានបង្កកភ្លាមៗបន្ទាប់ពីរុស្ស៊ីបានចាប់ផ្តើមការលុកលុយពេញលេញលើអ៊ុយក្រែនក្នុងខែកុម្ភៈ ឆ្នាំ២០២២។ យ៉ាងណា រុស្ស៊ីបានគំរាមកំហែងម្ដងហើយម្ដងទៀត ចំពោះការសងសឹកជុំវិញការប្រើប្រាស់ទ្រព្យសម្បត្តិរបស់រដ្ឋធានីមូស្គូ ដែលបានបង្កកដើម្បីផ្តល់ហិរញ្ញប្បទានដល់អ៊ុយក្រែន៕