នាយករដ្ឋមន្ត្រីវៀតណាម លោក ផាម មិញជីញ ដាក់គោលដៅក្តោបតំណែងជាប្រទេសមានសេដ្ឋកិច្ចធំជាងគេទី៤ នៅអាស៊ីអាគ្នេយ៍ឆ្នាំក្រោយ
ហាណូយ៖ នៅថ្ងៃចន្ទទី២១ ខែតុលានេះនាយករដ្ឋមន្ត្រីវៀតណាម លោក ផាម មិញជីញ បានប្រាប់សភាថា ផលិតផលក្នុងស្រុកសរុបរបស់វៀតណាមត្រូវបានគេរំពឹងថានឹងកើនឡើងពី៦,៨ ទៅ៧ភាគរយនៅឆ្នាំនេះ។ បន្ថែមលើនេះ សេដ្ឋកិច្ចវៀតណាម ក៏ត្រូវបានគេរំពឹងថា នឹងមានតម្លៃ៥០០ពាន់លានដុល្លារនៅឆ្នាំក្រោយ ជាប់ចំណាត់ថ្នាក់លេខ៤ ធំជាងគេនៅអាស៊ីអាគ្នេយ៍។
លោក ជីញ បាននិយាយនៅឯការចាប់ផ្តើមនៃសម័យប្រជុំសភារយៈពេលមួយខែនៅរដ្ឋធានីហាណូយថា សេដ្ឋកិច្ចបានកើនឡើងពី៣៤៦ពាន់លានដុល្លារក្នុងឆ្នាំ២០២០ ដល់៤៣៣ពាន់លានដុល្លារកាលពីឆ្នាំមុន ហើយផលិតផលក្នុងស្រុកសរុប (GDP) ត្រូវបានកំណត់ថានឹងកើនឡើង៧ភាគរយនៅឆ្នាំនេះ ស្របពេលដែលបំណុលសាធារណៈរបស់ប្រទេស ស្ថិតនៅក្រោមការគ្រប់គ្រង និងទាបជាងកម្រិតកំណត់ដែលកំណត់ដោយរដ្ឋសភា។ លោក បន្ត ថា ចន្លោះ ឆ្នាំ២០២១ និង២០២៥ កំណើន ជា មធ្យម ប្រចាំ ឆ្នាំ ត្រូវ បាន គេ ប៉ាន់ ប្រមាណ ថា មាន៦ភាគរយ។ អត្រាកំណើនសេដ្ឋកិច្ចរបស់វៀតណាម គឺស្ថិតក្នុងចំណោមកម្រិតខ្ពស់បំផុតក្នុងតំបន់ និងសកលលោក។ ចំណាត់ថ្នាក់ របស់វៀតណាមក្នុងចំណោមបណ្តាប្រទេសជុំវិញពិភពលោក បានហក់ឡើង ពី លេខ៣៧ ដល់ លេខ៣៤ ហើយ នឹង ឡើង ដល់ លេខ៣៣នៅ ឆ្នាំ ក្រោយ។ បន្ថែមពីនោះ នាយករដ្ឋមន្ត្រីវៀតណាម បានសង្កត់ធ្ងន់ថា GDP សម្រាប់មនុស្សម្នាក់ត្រូវបានគេរំពឹងថា នឹងកើនឡើង៣១,៧ភាគរយពី៣៧២០ដុល្លារក្នុងឆ្នាំ២០២១ ដល់៤៩០០ដុល្លារក្នុងឆ្នាំ២០២៥។
សម្រាប់ឆ្នាំ២០២៥ លោក ជីញ បានប្រកាសថា វៀតណាមនឹងមានគោលដៅកំណើនពី៧ទៅ៧,៥ភាគរយ គាំទ្រដោយគោលដៅកំណើនឥណទាន១៥ភាគរយ និងការវិនិយោគសាធារណៈ រួមទាំងការចំណាយលើហេដ្ឋារចនាសម្ព័ន្ធដឹកជញ្ជូន។ លោក បន្ត ថា វៀតណាម ក៏ នឹង ព្យាយាម ទាក់ទាញ ការ វិនិយោគ ពី បរទេស និង ពង្រីក ទីផ្សារ នាំ ចេញ របស់ ខ្លួន។ ប្រទេសកុម្មុយនីស្ដនៅលើដែនដីអាស៊ីអាគ្នេយ៍មួយនេះ ជាមជ្ឈមណ្ឌលឧស្សាហកម្មក្នុងតំបន់ បានរាយការណ៍ពីកំណើនសេដ្ឋកិច្ចខ្លាំងបំផុតរបស់ខ្លួន ក្នុងរយៈពេលពីរឆ្នាំក្នុងត្រីមាសនៃខែកញ្ញា ជំរុញដោយការនាំចេញ ផលិតកម្មឧស្សាហកម្ម និងការកើនឡើងនៃការវិនិយោគពីបរទេស ទោះបីជាព្យុះទីហ្វុងយ៉ាកជី បានបង្កការខូចខាតយ៉ាងទូលំទូលាយ កាលពីខែមុនដែលអាចប៉ះពាល់ដល់កំណើននាពេលអនាគតក៏ដោយ។
លោក ជីញ បានសន្យាថា នឹងមិនមានការខ្វះខាតថាមពលនៅឆ្នាំក្រោយទេ។ នៅឆ្នាំ២០២៣ ការដាច់ចរន្តអគ្គិសនីបានប៉ះពាល់ដល់ផលិតកម្មឧស្សាហកម្ម។ លោក ក៏ បាន និយាយ ថា វៀតណាម នឹង បន្ត ការ ប្រយុទ្ធ ប្រឆាំង នឹង អំពើ ពុករលួយ និង ពង្រឹង សមត្ថភាព ការពារ ជាតិ របស់ ខ្លួន។ គួរបញ្ជាក់ថា នៅឆ្នាំ២០២៦ ដល់២០៣០ រដ្ឋាភិបាលវៀតណាមកំណត់គោលដៅកំណើន GDP ប្រចាំឆ្នាំ ៧,៥-៨,៥ ភាគរយជាមួយនឹង GDP សម្រាប់មនុស្សម្នាក់ឈានដល់៧៤០០-៧៦០០ដុល្លារនៅឆ្នាំ២០៣០។ មិនត្រឹមតែប៉ុណ្ណោះ វៀតណាមនឹងក្លាយជាប្រទេសកំពុងអភិវឌ្ឍ ដែលមានចំណូលមធ្យមកម្រិតខ្ពស់ជាមួយនឹងឧស្សាហកម្មទំនើប និងសេដ្ឋកិច្ចប្រហែល៧៨០-៨០០ពាន់លានដុល្លារ៕
