សម្តេចព្រះវនរ័តកិត្តិបណ្ឌិត ណយ ច្រឹក និងឯកឧត្ដម ចាយ បូរិន រដ្ឋមន្រ្តីក្រសួងធម្មការ និមន្ត-អញ្ជើញចុះជួបសំណេះសំណាលជាមួយ ព្រះមន្រ្តីសង្ឃទូទាំងខេត្តត្បូងឃ្មុំ
ភ្នំពេញ៖ នារសៀលថ្ងៃទី០២ ខែកញ្ញា ឆ្នាំ២០២៤ សម្ដេចព្រះវនរ័ត កិត្តិបណ្ឌិត ណយ ច្រឹក សម្ដេចព្រះសង្ឃនាយករងទី២ តំណាងដ៏ខ្ពង់ខ្ពស់សម្ដេចព្រះពោធិវ័ង្សកិត្តិបណ្ឌិត អំ លីមហេង សម្ដេចព្រះសង្ឃនាយកស្ដីទី និងឯកឧត្ដម ចាយ បូរិន រដ្ឋមន្រ្តីក្រសួងធម្មការ និងសាសនា បាននិមន្ត និងអញ្ជើញចុះជួបសំណេះសំណាល និងផ្ដល់ឱវាទដល់ព្រះមន្រ្តីសង្ឃ ព្រះសង្ឃ អាចារ្យ គណៈកម្មការវត្តទូទាំងខេត្តត្បូងឃ្មុំ។
ពិធីនេះមានការនិមន្តនិងអញ្ជើញចូលរួមដោយ ព្រះមន្រ្តីសង្ឃអាចារ្យ គណៈកម្មការវត្តទូទាំងខេត្តត្បូងឃ្មុំ ទូទាំងខេត្តសរុបប្រមាណ២៨២អង្គ/នាក់, ឯកឧត្ដម ប៉ែន កុសល្យ អភិបាលខេត្តត្បូងឃ្មុំ, ព្រមទាំងលោក លោកស្រី ថ្នាក់ដឹកនាំក្រសួងធម្មការនិងសាសនា ។
នាឱកាសនោះ សម្ដេចព្រះវនរ័ត កិត្តិបណ្ឌិត ណយ ច្រឹក មានព្រះថេរដីកា ក្រើនរំលឹកដល់ព្រះមន្រ្តីសង្ឃ សមណសិស្សគ្រប់អង្គ ឱ្យមានស្មារតីភ្ញាក់រលឹក ប្រកាន់ខ្ជាប់នូវការបដិបត្តិធម៌វិន័យ ខិតខំព្យាយាមសិក្សារៀនសូត្រឱ្យក្លាយជាសមណសក្យបុត្រ ដែលជាបុត្រដ៏ប្រពៃរបស់ព្រះសម្មាសម្ពុទ្ធ និងធ្វើខ្លួនឱ្យជាស្រែបុណ្យដ៏ល្អដល់ពុទ្ធបរិស័ទ ដើម្បីធានាបាននូវសណ្តាប់ធ្នាប់ របៀបរៀបរយ និងត្រូវចូលរួមលើកកម្ពស់កិត្យានុភាព តម្លៃ និងសេចក្តីថ្លៃថ្នូរ របស់ព្រះសង្ឃពុទ្ធសាសនា ព្រមទាំងរក្សាការពារ និងលើកស្ទួយព្រះពុទ្ធសាសនាដែលជាសាសនារបស់រដ្ឋឱ្យបានគង់វង្ស ស្ថិតស្ថេរចីរកាល៖
១៖ ភិក្ខុ សាមណេរត្រូវប្រកាន់ខ្ជាប់នូវគុណធម៌ និងក្រមសីលធម៌ ព្រមទាំងប្រតិបត្តិតាមត្រៃសិក្ខាគឺៈ សីល សមាធិ បញ្ញា និងមានស្មារតីសាមគ្គីរវាងព្រះសង្ឃ និងព្រះសង្ឃ ព្រះសង្ឃ និងពុទ្ធបរិស័ទ។
២៖ មុននឹងទទួលបំបួសកុលបុត្រ ព្រះឧបជ្ឈាយ៍គប្បីពិនិត្យប្រវត្តិរូប និងលិខិតបញ្ជាក់កិរិយាមារយាទ ឬបដិញ្ញាណ ដែលចេញដោយអាជ្ញាធរ ត្រូវពិនិត្យមើលឱ្យបានច្បាស់លាស់ជាមុនសិន។ (កុលបុត្រ ៣២ ជំពូក ដែលព្រះពុទ្ធទ្រង់ហាមមិនឱ្យព្រះឧបជ្ឈាយ៍បំបួស និងអភ័ព្វបុគ្គល ១១ពួក)។ មិនត្រូវបំបួសកុលបុត្រ ដែលមិនបានទទួលអប់រំនៅក្នុងធម៌វិន័យ ឲ្យបានហ្មត់ចត់ឡើយ ឬជនមានទោសថ្នាក់ គរុ លហុ និងមជ្ឈឹមក្ដី។
៣៖ ពុទ្ធិកសិក្សា ជាគ្រឹះអក្សរសាស្ត្រ នៃព្រះពុទ្ធសាសនា ដូចនេះ ព្រះមន្ត្រីសង្ឃ គណៈគ្រប់គ្រងពុទ្ធិកត្រូវសហការគ្នាឱ្យបានជិតស្និទ្ធ ព្រះគ្រូអនុគណក្រុង ស្រុក ខណ្ឌត្រូវចុះត្រួតពិនិត្យផ្ទាល់នៅតាមសាលាពុទ្ធិក។
៤៖ ភិក្ខុ សាមណេរត្រូវបំពេញករណីយកិច្ច ជាអ្នកបួសក្នុងពុទ្ធសាសនាកម្ពុជា មានការសិក្សាធម្មវិជ្ជា-លោកវិជ្ជា ការបំពេញកិច្ចវត្ត ការធ្វើកិច្ចការមនុស្សធម៌ ការអប់រំលើកកម្ពស់សីលធម៌ ចរិយាធម៌សង្គម។ ភិក្ខុ សាមណេរត្រូវគោរពតាមភិក្ខុប្បាតិមោក្ខ-សាមណេរ វិន័យ និងបទបញ្ជាផ្ទៃក្នុងរបស់វត្តនីមួយៗឱ្យបានខ្ជាប់ខ្ជួនជានិច្ច។ ភិក្ខុ សាមណេរប្រព្រឹត្តខុសធម៌វិន័យ គណៈសង្ឃវត្តត្រូវដោះស្រាយឱ្យដឹងថា ភិក្ខុ សាមណេររូបនោះ មានទោសករិតណា ហើយដាក់ទោសទៅតាមវិន័យប្បញ្ញត្តិ បើមិនទាន់ដាច់ស្រេច ត្រូវបញ្ជូនទៅថេរៈសភាសង្ឃ តាមលំដាប់ថ្នាក់ដោះស្រាយបន្ត។ ក្នុងករណី ភិក្ខុ ឬ សាមណេរប្រព្រឹត្តល្មើសពាក់ព័ន្ធនឹងច្បាប់រដ្ឋ ត្រូវដោះស្រាយតាមពុទ្ធវិន័យឱ្យដាច់ស្រេចជាមុនសិន ទើបដោះស្រាយតាមច្បាប់រដ្ឋជាក្រោយ ។
ជាមួយគ្នានោះដែរ ឯកឧត្ដម ចាយ បូរិន មានឲ្យដឹងថា «ចំពោះព្រះមន្រ្តីសង្ឃ ដែលប្រើប្រាស់បណ្តាញសង្គម សូមថ្វាយបង្គំស្នើដល់គណៈសង្ឃនាយក ពិនិត្យណែនាំជាពិសេសដល់ ភក្ខុ សាមណេរណា ដែលប្រើប្រាស់បណ្តាញសង្គម បង្ហោះវីដេអូផ្សេងៗដែលប្រាស់ចាកពីធម៌វិន័យជាព្រះសង្ឃ ដែលធ្វើប៉ះពាល់ដល់តម្លៃនៃព្រះពុទ្ធសាសនា និងជៀសវាងការចែករំលែកនូវសកម្មភាពដែលនាំឱ្យប៉ះពាល់ដល់សន្តិសុខសណ្តាប់ធ្នាប់សង្គម»។
ឯកឧត្ដមរដ្ឋមន្រ្តី បានបន្ថែមថា ព្រះសង្ឃ ឬគ្រហស្ថ គ្រប់បព្វជិតត្រូវមានវិន័យ ដូចនេះចំពោះកិច្ចការពង្រឹងនូវព្រះធម៌វិន័យដល់ ភិក្ខុ សាមណេរ ក្រសួងធម្មការនិងសាសនា សូមឯកភាពជាមួយនិងគណៈសង្ឃនាយក និងសូមថ្វាយបង្គំស្នើដល់គណៈសង្ឃនាយក ណែនាំដល់ព្រះចៅអធិការ ពង្រឹងនូវធម៌វិន័យ ដល់ភិក្ខុ សាមណេរ សមទៅនិងអភិក្រម ៥ របស់ព្រះពុទ្ធសាសនារួមមាន ៖
១៖ បព្វជ្ជា (ការបួស)
២៖ បរិយត្តិ (ការសិក្សា)
៣៖ បដិបត្តិ ( ការប្រតិបត្តិ)
៤៖ បដិវេធៈ(លទ្ធផល)
៥៖ បព្វាជនីយកម្ម (ការដាក់ទោស ឬ បញ្ចប់ភារកិច្ច) ។ ជាពិសេសមិនត្រូវធ្វើអ្វីដែលរាជរដ្ឋាភិបាលហាមឃាត់ និងបន្តថែរក្សាវត្តអារាម ឱ្យស្អាត ឱ្យស្វាង ឱ្យស្ងប់។
សម្ដេចព្រះវនរ័ត កិត្តិបណ្ឌិត និងលោករដ្ឋមន្រ្តី ក៏សូមអំពាវនាវដល់ព្រះមន្ត្រីសង្ឃ ព្រះសង្ឃគ្រប់អង្គ និងពុទ្ធបរិស័ទ ចូលរួមគាំទ្រជាមួយរាជរដ្ឋាភិបាល ចូលរួមនូវវិភាគទានស្ម័គ្រចិត្ត «មូលនិធិកសាងហេដ្ឋារចនាសម្ព័ន្ធតាមព្រំដែន» ជាមួយរាជរដ្ឋាភិបាល ដែលត្រូវបានបង្កើតឡើងដោយឈរលើបុព្វហេតុរួម នៃការកសាង និងការពារជាតិ មាតុភូមិកម្ពុជា ដើម្បីបញ្ជាក់អំពីសាមគ្គី និងស្មារតីជាតិខ្មែរតែមួយ និងដើម្បីសុខសន្តិភាព អធិបតេយ្យភាពជាតិ និងបូរណភាពទឹកដីរួមទាំងការអភិវឌ្ឍ នៅតាមតំបន់ព្រំដែនឱ្យបានកាន់តែរឹងមាំ ប្រកបដោយចីរភាព។
គួរបញ្ជាក់ផងដែរ សម្តេចព្រះវនរ័ត កិត្តិបណ្ឌិត ណយ ច្រឹក បាននិមន្តដឹកនាំព្រះមន្ត្រីសង្ឃ ព្រះសង្ឃ និងអង្គពិធីទាំងមូល បង្សុកូលឧទ្ទិសកុសលជូនចំពោះសព សម្តេចហ្វាវាំងវរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំងផងដែរ៕
