ស្រូវប្រាំងប្រមាណ ៣០០ហិកតា ក្នុងឃុំចំនួន៤ នៃស្រុកជើងព្រៃ ខេត្តកំពង់ចាម កំពុងរងផលប៉ះពាល់ដោយខ្វះទឹកស្រោចស្រព

ភ្នំពេញ៖ រដ្ឋបាលខេត្តកំពង់ចាមកាលពីថ្ងៃអង្គារបានឱ្យដឹងថា ស្រូវប្រាំងរបស់ប្រជាពលរដ្ឋប្រមាណជាង ៣០០ ហិកតា ក្នុងឃុំចំនួន៤ នៃស្រុកជើងព្រៃ កំពុងប្រឈមនឹងកូនរដូវប្រាំងដោយខ្វះទឹកក្នុងការស្រោចស្រពស្រូវប្រាំង ខណៈប្រភពទឹកមានទីតាំងនៅឆ្ងាយពីតំបន់ស្រូវលូតលាស់។

បើតាមហ្វេសប៊ុករបស់រដ្ឋបាលខេត្តកំពង់ចាមកាលពីថ្ងៃទី១៣ ខែសីហា ឆ្នាំ២០២៤ ឯកឧត្ដម អ៊ុន ចាន់ដា អភិបាលខេត្តកំពង់ចាម បានដឹកនាំក្រុមការងារ មន្ត្រីជំនាញ អាជ្ញាធរពាក់ព័ន្ធបានអញ្ជើញចុះពិនិត្យបញ្ហាកង្វះទឹករបស់ប្រជាពលរដ្ឋក្នុងឃុំចំនួន៤ នៃស្រុកជើងព្រៃដែលរួមមាន ឃុំត្រពាំងគរ ឃុំស្តើងជ័យ ឃុំសំពងជ័យ និងឃុំព្រីងជ្រុំ បានកំពុងជួបកូនរដូវប្រាំង និងខ្វះខាតទឹកស្រោចស្រពស្រូវប្រាំង ដោយសារប្រភពទឹកមានទីតាំងនៅឆ្ងាយពីតំបន់នេះ។ ក្នុងនោះ នៅឃុំទាំង៤ ក្នុងស្រុកជើងព្រៃ មានស្រែប្រាំងទំហំ ៣២៧ ហិកតា កំពុងរងផលប៉ះពាល់ដោយខ្វះទឹកស្រោចស្រព ដោយមានស្រូវប្រមាណជាង ៤០ហិកតា​ បានខូតខាត និងរងការបំផ្លាញដោយសារខ្វះទឹក និងការថែទាំ។

ជាមួយគ្នានោះ ជាដំណោះស្រាយពាក់ព័ន្ធទៅនឹងការខ្វះទឹកស្រោចស្របដំណាំស្រូវ ឯកឧត្តមអភិបាលខេត្តបានសម្រេច បើកប្រភពទឹកចេញពីតំបន់ទឹកឆាដែលជាប្រភពទឹកមួយក្នុងស្រុកព្រៃឈរ និងធ្វើការស្ដារប្រឡាយចាស់ៗ ដើម្បីសម្រួលឱ្យទឹកហូរមកដល់តំបន់ឃុំទាំង៤ ខាងលើនេះ ដើម្បីឱ្យប្រជាពលរដ្ឋបានទឹកប្រើប្រាស់ និងស្រោចស្របដំណាំបានគ្រប់គ្រាន់  ហើយចំពោះតំបន់ដែលមានស្រូវខូចខាត អាជ្ញាធរខេត្តនឹងត្រៀមស្រូវពូជសម្រាប់ផ្ដល់ជូនប្រជាពលរដ្ឋធ្វើការដាំដុះឡើងវិញផងដែរ។

គួរបញ្ជាក់ថា កាលពីអំឡុងខែមករា ឆ្នាំ២០២៤ កន្លងទៅនេះ ស្រុកជើងព្រៃ ក្នុងខេត្តកំពង់ចាមដដែល មានភូមិចំនួន៨ ដែលមានផ្ទៃដីដាំដុះស្រូវប្រមាណជាង ៩០០ ហិកតា និងស្រុកបាធាយមានចំនួន ២ឃុំ មានផ្ទៃដីដាំដុះស្រូវប្រមាណជាង ៦០០ ហិកតា ក៏បានប្រឈមនឹងការខ្វះទឹកស្រោចស្រពដំណាំដែរ៕