ក្រសួងពាណិជ្ជកម្មកម្ពុជា នឹងរៀបចំពិព័រណ៍ម្ហូបអាហារក្រុងក្វាងជូ ឆ្នាំ២០២៤ ដែលនឹងប្រព្រឹត្តទៅចាប់ពីថ្ងៃទី១៧-២០ ខែតុលា នៅមជ្ឈមណ្ឌលសន្និបាតគីមដេជុង នៅទីក្រុងក្វាងជូ នៃប្រទេសកូរ៉េ

ភ្នំពេញ៖ ក្រសួងពាណិជ្ជកម្ម នៃព្រះរាជាណាចក្រកម្ពុជា មានកិត្តិយសសូមជម្រាបជូនដំណឹងដល់លោក លោកស្រីជាអ្នកនាំចូល អ្នកផលិត អ្នកផ្តល់សេវាកម្មម្ហូបអាហារ និងសាធារណជនទូទៅឱ្យបានជ្រាបថា ទីក្រុងក្វាងជូ នឹងរៀបចំពិព័រណ៍ម្ហូបអាហារក្រុងក្វាងជូ ឆ្នាំ២០២៤ (GWANGJU FOOD FAIR 2024) ដែលនឹងប្រព្រឹត្តទៅចាប់ពីថ្ងៃទី១៧-២០ ខែតុលា ឆ្នាំ២០២៤ នៅមជ្ឈមណ្ឌលសន្និបាតគីមដេជុង ទីក្រុងក្វាងជូ នៃសាធារណរដ្ឋកូរ៉េ។

ពិព័រណ៍ម្ហូបអាហារក្វាងជូ គឺជាពិព័រណ៍ម្ហូបអាហារតែមួយគត់ និងធំជាងគេនៅក្នុងតំបន់ ហ៊ូណាំ ដែលទាក់ទងនឹងម្ហូបអាហារក្នុងស្រុក អាហារបំប៉នសុខភាព និងគ្រឿងម៉ាស៊ីនផលិតម្ហូបអាហារ។ ពាណិជ្ជករដែលចូលរួមពិព័រណ៍ខាងលើ នឹងទទួលបានអត្ថប្រយោជន៍ច្រើនក្នុងវិស័យម្ហូបអាហារនិងភេសជ្ជៈ ក៏ដូចជាឱកាសនៃការធ្វើពាណិជ្ជកម្ម ទិញលក់ផលិតផលនិងសេវាកម្ម និងចំណេះដឹងបន្ថែមស្តីពីទីផ្សារផលិតផល ប្រទេសកូរ៉េ ព្រមទាំងឱកាស នៃការបង្កើតបណ្តាញទីផ្សារអាជីវកម្ម។

គណៈកម្មការរៀបចំពិព័រណ៍ នឹងផ្តល់ជូន ការឧបត្ថម្ភពិសេសសម្រាប់អ្នកតាំងពិព័រណ៍ដូចជា៖ (១).ការបញ្ចុះតម្លៃ៥០%លើស្តង់គ្រប់ប្រភេទ, (២).សំបុត្រ យន្តហោះទៅ-មកចំនួន ១សន្លឹក (មានតម្លៃមិនលើសពី ៣៧៥ដុល្លារអាម៉េរិក), (៣).កន្លែងស្នាក់នៅចំនួន ៤យប់ និង(៤).អ្នកបកប្រែរយៈពេល ៤ថ្ងៃពេញ។

ក្រសួងពាណិជ្ជកម្ម ក្នុងនាមអ្នកសម្របសម្រួល សូមអញ្ជើញ លោក-លោកស្រី ដែលជាអ្នកនាំចូល អ្នកផលិត អ្នកផ្តល់សេវាកម្មម្ហូបអាហារ និងសាធារណជនទូទៅដែលមានចំណាប់អារម្មណ៍ចង់ចូលរួមក្នុង ព្រឹត្តិការណ៍ខាងលើ សូមបំពេញបែបបទចូលរួម រួចផ្ញើជូនអ្នករៀបចំ តាមរយៈអ៊ីម៉ែល food@foodshow.kr ឱ្យបានមុនថ្ងៃទី១៤ ខែកញ្ញា ឆ្នាំ២០២៤ ជាកំណត់។

សម្រាប់ព័ត៌មានបន្ថែម សូមទាក់ទងមកមន្ត្រីសម្រប សម្រួលតាមរយៈទូរស័ព្ទលេខ ០១៧ ២៩៦ ៩៩២ / ០៧៧ ៣៦១ ៨៣៦ ឬអ៊ីម៉ែល chousetha@gmail.com / oun.veassna@gmail.com ៕