ឯកឧត្ដម សួស ប្រាថ្នា បង្ហាញអំពីប្រវត្តិនៃការកកើត និងស្នាដៃសំខាន់ៗរបស់អគ្គនាយកដ្ឋានរដ្ឋបាល ក្រសួងមហាផ្ទៃ
ភ្នំពេញ៖ ក្នុងឱកាសអញ្ជើញផ្ដល់កិច្ចសម្ភាសន៍ ស្ដីពី «វឌ្ឍនភាពការងាររបស់ អគ្គនាយកដ្ឋានរដ្ឋបាល ក្រសួងមហាផ្ទៃ» នាថ្ងៃទី១២ ខែសីហា ឆ្នាំ២០២៤នេះ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានលើកបង្ហាញអំពីប្រវត្តិនៃការកកើត និងស្នាដៃសំខាន់ៗរបស់អគ្គនាយកដ្ឋានរដ្ឋបាល ក្រសួងមហាផ្ទៃ ។
ឯកឧត្ដម សួស ប្រាថ្នា បានមានប្រសាសន៍ថា ក្រសួងមហាផ្ទៃត្រូវបានរៀបចំនិងបង្កើតឡើងនៅឆ្នាំ១៩៩៣(អនុក្រឹត្យលេខ១៦ អនក្រ.បក ចុះថ្ងៃទី២០ ខែធ្នូ ឆ្នាំ១៩៩៣) ទន្ទឹមនេះ អគ្គនាយកដ្ឋានរដ្ឋបាលក៏ត្រូវបានបង្កើតឡើងនាឆ្នាំ១៩៩៣ផងដែរ ដែលមាននាយកដ្ឋានចំណុះចំនួន៤ គឺ ១). នាយកដ្ឋានរដ្ឋបាលទូទៅ ២). នាយកដ្ឋានកិច្ចការនយោបាយ ៣). នាយកដ្ឋានបុគ្គលិកនិងបណ្ដុះបណ្ដាលវិជ្ជាជីវៈ និង៤). នាយកដ្ឋានពន្ធនាគារ ព្រមទាំងមាននាយកដ្ឋានចំនួន៧ផ្សេងទៀត ដែលស្ថិតក្រោមឱវាទរបស់អគ្គនាយកដ្ឋានរដ្ឋបាល និងអគ្គស្នងការដ្ឋាននគរបាលជាតិ រួមមាន៖ ១).នាយកដ្ឋានផែនការសេដ្ឋកិច្ច និងហិរញ្ញវត្ថុ ២). នាយកដ្ឋានវិទ្យុទាក់ទង ៣).នាយកដ្ឋានបំភ័ន្តអក្ខរៈ ៤).នាយកដ្ឋានផ្សព្វផ្សាយអប់រំ ៥). នាយកដ្ឋាននីតិកម្ម ៦). នាយកដ្ឋានសុខាភិបាល និង៧). នាយកដ្ឋានស្ថាបនា។
ឯកឧត្ដមបញ្ជាក់ថា ចាប់តាំងពីការបង្កើតក្នុងឆ្នាំ១៩៩៣ រហូតមកដល់បច្ចុប្បន្ន អគ្គនាយកដ្ឋានរដ្ឋបាលមានប្រវត្តិកែសម្រួលរចនាសម្ព័ន្ធជាបន្តបន្ទាប់ចំនួន៨លើក ដូចខាងក្រោម៖
-លើកទី១៖ នៅឆ្នាំ២០០១ បានបង្កើតនាយកដ្ឋានរដ្ឋបាលមូលដ្ឋាន
-លើកទី២៖ នៅឆ្នាំ២០០២ បានបង្កើតលេខាធិការដ្ឋាននៃអគ្គនាយកដ្ឋានរដ្ឋបាល
-លើកទី៣៖នៅឆ្នាំ២០០៦ បានប្តូរឈ្មោះពីអគ្គនាយកដ្ឋានរដ្ឋបាល មកជាអគ្គ-នាយកដ្ឋានរដ្ឋបាលមូលដ្ឋាន ព្រមទាំងផ្ទេរនាយកដ្ឋានពន្ធនាគារបង្កើតទៅជាអគ្គនាយកដ្ឋានពន្ធនាគារ
-លើកទី៤៖ នៅឆ្នាំ២០០៧ បានផ្ទេរនាយកដ្ឋានមួយចំនួនដែលស្ថិតក្រោមរចនាសម្ព័ន្ធគ្រប់គ្រងរបស់អគ្គនាយដ្ឋានរដ្ឋបាល បង្កើតទៅជាអគ្គនាយក-ដ្ឋានភស្តុភារ និងហិរញ្ញវត្ថុ
-លើកទី៥៖ នៅឆ្នាំ២០១៣ បានផ្ទេរការងារសញ្ជាតិ ស្ថិតិ និងអត្រានុកូលដ្ឋានពីអគ្គនាយកដ្ឋានរដ្ឋបាល ទៅឳ្យស្ថិតក្រោមអគ្គនាយកដ្ឋានអត្ត-សញ្ញាណកម្មដែលជាអង្គភាពបង្កើតថ្មី
-លើកទី៦៖ នៅឆ្នាំ២០១៤ បានបង្កើតនាយកដ្ឋានថ្មីចំនួន០២គឺ នាយកដ្ឋានបណ្តុះបណ្តាល (បំបែកចេញពីនាយកដ្ឋានបុគ្គលិក និងបណ្តុះបណ្តាលវិជ្ជាជីវៈ) និងនាយកដ្ឋានមុខងារ និងធនធាន ព្រមទាំងកែសម្រួលដំឡើងលេខាធិការដ្ឋាននៃអគ្គនាយកដ្ឋានរដ្ឋបាល ទៅជានាយកដ្ឋានរដ្ឋបាលសរុប
-លើកទី៧៖នៅឆ្នាំ២០២១ បានផ្ទេរនាយកដ្ឋានបណ្តុះបណ្តាលឳ្យស្ថិតក្រោមការគ្រប់គ្រងរបស់សាលាជាតិរដ្ឋបាលមូលដ្ឋានដែលត្រូវបានដំឡើងឋានៈស្មើនឹងអគ្គនាយកដ្ឋាន និងកែសម្រួលរចនាសម្ព័ន្ធថ្មី
-លើកទី៨៖ នៅឆ្នាំ២០២៣ នាយកដ្ឋានបុគ្គលិកត្រូវបានផ្ទេរទៅឳ្យស្ថិតក្រោមរចនាសម្ព័ន្ធរបស់អគ្គនាយកដ្ឋានធនធានមនុស្ស នៃក្រសួងមហាផ្ទៃ ដែលជាអង្គភាពទើបបង្កើតថ្មី។
ឯកឧត្ដមអគ្គនាយកបន្ថែមថា ផ្អែកតាមការវិវត្តន៍ប្រែប្រួលនៃរចនាសម្ព័ន្ធ នាពេលបច្ចុប្បន្នអគ្គនាយកដ្ឋានរដ្ឋបាល ក្រសួងមហាផ្ទៃ មាននាយកដ្ឋានចំណុះចំនួន ៥ គឺ៖ ១.នាយកដ្ឋានរដ្ឋបាល សរុប, ២.នាយកដ្ឋានកិច្ចការរដ្ឋបាលរាជធានី ខណ្ឌ និងខេត្ត, ៣.នាយកដ្ឋានកិច្ចការរដ្ឋបាលក្រុង ស្រុក ឃុំ សង្កាត់, ៤.នាយកដ្ឋានមុខងារ និងធនធាន, ៥.នាយកដ្ឋានកិច្ចការសមាគម និងគណបក្សនយោបាយ ។
ឯកឧត្ដមបន្តទៀតថា ជារួម អគ្គនាយកដ្ឋានរដ្ឋបាល ក្នុងនាមជាសេនាធិការជូនក្រសួងមហាផ្ទៃ មានតួនាទីក្នុងការតាមដាន ត្រួតពិនិត្យ និងគាំទ្រដល់ការអនុវត្តគោលនយោបាយកំណែទម្រង់វិមជ្ឈការនិងវិសហមជ្ឈការ ការអនុវត្តច្បាប់រៀបចំអង្គការពាក់ព័ន្ធនឹងការគ្រប់គ្រងរដ្ឋបាលដែនដីនៅរដ្ឋបាលថ្នាក់ក្រោមជាតិ និងបន្តរួមចំណែកអនុវត្តយុទ្ធសាស្រ្តបញ្ចកោណដំណាក់កាលទី១របស់រាជរដ្ឋាភិបាល នីតិកាលទី៧នៃរដ្ឋសភា ដែលបានផ្តោតលើការពង្រឹងអភិបាលកិច្ច និងការធ្វើទំនើបកម្មស្ថាប័នឱ្យក្លាយជារដ្ឋបាលសាធារណៈទំនើប ប្រកបដោយសមត្ថភាពខ្ពស់ ខ្លាំង និងស្អាតស្អំ ដើម្បីធានា និរន្តរភាពនៃដំណើរការរដ្ឋបាលសាធារណៈ ដោយតម្កល់ផលប្រយោជន៍ជាតិ និងប្រជាជនជាធំ។
ឯកឧត្ដមអគ្គនាយកគូសបញ្ជាក់ថា ក្នុងការអនុវត្តតួនាទី ភារកិច្ចរបស់ខ្លួន ក្នុងនាមជាសេនាធិការជូនក្រសួងមហាផ្ទៃ អគ្គនាយកដ្ឋានរដ្ឋបាល បានសម្រេចបាននូវស្នាដៃធំៗជាច្រើនលើកិច្ចការគ្រប់គ្រងរដ្ឋបាលដែនដី រួមមាន៖
-បានការរៀបចំច្បាប់ និងវិសោធនកម្មច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងច្បាប់ស្តីពីការគ្រប់គ្រងរដ្ឋបាលឃុំ សង្កាត់ រួមនឹងលិខិតបទដ្ឋាននានាសម្រាប់គាំទ្រដល់រដ្ឋបាលថ្នាក់ក្រោមជាតិ
-បានសហការ សម្របសម្រួលរៀបចំបែបបទ និងនីតិវិធីប្រកាសទទួលស្គាល់ក្រុមប្រឹក្សាឃុំ សង្កាត់ចំនួន៥អាណត្តិ(ឆ្នាំ២០០២ ឆ្នាំ២០០៧ ឆ្នាំ២០១២ ឆ្នាំ២០១៧ និងឆ្នាំ២០២២ និងក្រុមប្រឹក្សារាជធានី ខេត្ត ក្រុង ស្រុក ខណ្ឌចំនួន៤អាណត្តិ(ឆ្នាំ២០០៩ ឆ្នាំ២០១៤ ឆ្នាំ២០១៩ និងឆ្នាំ២០២៤)
-បានសហការ សម្របសម្រួលជាមួយក្រសួង ស្ថាប័នពាក់ព័ន្ធ ធ្វើការកែសម្រួលឡើងវិញនូវមុខងារ និងរចនាសម្ព័ន្ធរដ្ឋបាលរាជធានី ខេត្ត ដោយបានធ្វើសមារណកម្មមន្ទីរសុខាភិបាលមកក្នុងរចនាសម្ព័ន្ធចំណុះរដ្ឋបាលរាជធានី ខេត្ត និងការធ្វើសមាហរណ កម្ម ការិយាល័យជំនាញមកក្នុងរចនាសម្ព័ន្ធរដ្ឋបាលក្រុង ស្រុក ខណ្ឌ តាមគោលការណ៍រដ្ឋបាលឯកភាព
-បានសហការ និងសម្របសម្រួលជាមួយក្រសួង ស្ថាប័នពាក់ព័ន្ធ ដើម្បីរៀបចំផ្ទេរមុខងារតាមវិស័យនានាទៅរដ្ឋបាលរាជធានី ខេត្ត និងរដ្ឋបាលក្រុង ស្រុក ខណ្ឌ ដើម្បីអនុវត្តមុខងារក្នុងការផ្តល់សេវាជូនប្រជាពលរដ្ឋ
-បានរៀបចំប្រព័ន្ធគ្រប់គ្រងបុគ្គលិក មន្រ្តីរាជការស៊ីវិលនៅរដ្ឋបាលថ្នាក់ក្រោមជាតិ
-បានសម្របសម្រួលការងារកិច្ចសហប្រត្តិបត្តិការអន្តរជាតិ ការចងសម្ព័ន្ធមេត្រីភាពរវាងរដ្ឋបាលរាជធានី ខេត្ត ជាមួយបណ្ដារដ្ឋធានី ខេត្ត ក្រុង នៃប្រទេសជាមិត្ត និងកិច្ចការគ្រប់គ្រងច្រកទ្វារព្រំដែន
-បានគាំទ្រ និងអនុ្តរាគមន៍ដល់រដ្ឋបាលថ្នាក់ក្រោមជាតិ លើការអនុវត្តគម្រោងអភិវឌ្ឍរាជធានី ខេត្ត គម្រោងមូលនិធិក្រុង ស្រុក និងគម្រោងមូលនិធិឃុំ សង្កាត់ គម្រោងសេវាសង្គម និងការតាមដាន ត្រួតពិនិត្យ វាយតម្លៃលើការអនុវត្តតួនាទីភារកិច្ចរបស់ថ្នាក់ក្រោមជាតិ ដើម្បីធានាឱ្យមានការចូលរួមទទួលខុសត្រូវ និងភាពម្ចាស់ការរបស់រដ្ឋបាលថ្នាក់ក្រោមជាតិលើការគ្រប់គ្រង ការចាត់ចែង ការផ្ដេល់សេវាសាធារណៈ និងការដោះស្រាយបញ្ហាបប្រឈមនានា ក្នុងដែនសមត្ថកិច្ចរបស់ខ្លួន ៕
