ឧបនាយករដ្ឋមន្ត្រី ស៊ុន ចាន់ថុល ជួបពិភាក្សាការងារ និងស្ដាប់បទបង្ហាញរបស់វិស័យឯកជន លើគម្រោងផែនការរៀបចំការផ្សព្វផ្សាយសក្ដានុពលទេសចរណ៍កម្ពុជា

ភ្នំពេញ៖ នៅក្រុមប្រឹក្សាអភិវឌ្ឍន៍កម្ពុជា កាលពីថ្ងៃអង្គារ ទី៣០ ខែកក្កដា ឆ្នាំ២០២៤ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ទទួលជួបពិភាក្សាការងារជាមួយគណៈប្រតិភូដែលដឹកនាំដោយ ឯកឧត្តម អ៊ិត វិជិត នាយកប្រតិបត្តិ នៃក្រុមប្រឹក្សាភិបាលសិក្សាទីផ្សារនិងផ្សព្វផ្សាយទេសចរណ៍កម្ពុជា ដើម្បីស្ដាប់បទបង្ហាញលើគម្រោងផែនការរៀបចំការផ្សព្វផ្សាយសក្ដានុពលទេសចរណ៍កម្ពុជា។

កិច្ចប្រជុំនេះរៀបចំឡើងក្នុងគោលបំណងដើម្បីអនុញ្ញាតឱ្យវិស័យឯកជន ក្រោមការសម្របសម្រួលពីក្រុមប្រឹក្សាភិបាលសិក្សាទីផ្សារនិងផ្សព្វផ្សាយទេសចរណ៍កម្ពុជា រៀបចំធ្វើបទបង្ហាញ និងស្នើសុំអនុសាសន៍ណែនាំពី ឯកឧត្តមឧបនាយករដ្ឋមន្ត្រី ពាក់ព័ន្ធផែនការរៀបចំការផ្សព្វផ្សាយសក្ដានុពលទេសចរណ៍កម្ពុជា ដោយលោកស្រី Lim Sau Hoong ប្រធានក្រុមហ៊ុន SHAOFEN LABS PTE. LTD. របស់សិង្ហបុរី ដែលធ្លាប់មានបទពិសោធន៍ច្រើនឆ្នាំលើការងារផ្សព្វផ្សាយសក្ដានុពលក្នុងប្រទេសនានា ទាំងក្នុងតំបន់ និងពិភពលោកនាពេលកន្លងមក៕