ហ្វីលីពីន សន្យាថានឹងជំរុញឱ្យក្រុមហ៊ុនអាកាសចរ CEBU PACIFIC AIRLINE ហោះហើរត្រង់មកកាន់ខេត្តសៀមរាប 

ភ្នំពេញ៖ លោកជំទាវ Flerida Ann Camille p. Mayo ឯកអគ្គរដ្ឋទូតសាធារណរដ្ឋហ្វីលីពីន ប្រចាំកម្ពុជា បានបញ្ជាក់ជាថ្មីថានឹងពិភាក្សាផ្ទាល់ជាមួយក្រុមហ៊ុន អាកាសចរ CEBU PACIFIC AIRLINE ដើម្បីសិក្សាអំពីការហោះហើរត្រង់មកកាន់ខេត្តសៀមរាប។

ការសន្យារបស់លោកជំទាវ Flerida Ann Camille p. Mayo ក្នុងឱកាសចូលជួបសម្តែងការគួរសម និងពិភាក្សាការងារជាមួយ ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប ស្តីពីការហោះហើរត្រង់ពីប្រទេសហ្វីលីពីនមកកាន់ខេត្តសៀមរាប ពេលខាងមុខឆាប់ៗនេះ។

ជាមួយគ្នានោះ ឯកឧត្តមអភិបាលខេត្ត បានស្នើសុំទៅភាគីហ្វីលីពីនឱ្យមានការភ្ជាប់ទំនាក់ទំនងសម្ព័ន្ធមេត្រីភាពរវាងខេត្តសៀមរាប ជាមួយខេត្តសេប៊ូ (CEBU) របស់ប្រទេសហ្វីលីពីន ដែលជាខេត្តមានសក្តានុពលនាំមុខផ្នែកទេសចរណ៍របស់ហ្វីលីពីន រួមជាមួយនឹងការរីកចម្រើនក្នុងវិស័យម្ហូបអាហារ ភេសជ្ជៈ និងក្រុមហ៊ុនវិនិយោគផ្សេងៗទៀតដែលអាចមកវិនិយោគនៅខេត្តសៀមរាបផ្ទាល់។

ទន្ទឹមនោះ ឯកឧត្តមអភិបាលខេត្ត ពិតជាមានសេចក្តីសោមនស្សរីករាយយ៉ាងក្រៃលែងចំពោះការលើកឡើងរបស់លោកស្រីទូត និងបន្តចូលរួមក្នុងកិច្ចសហប្រតិបត្តិការ ជំរុញក្នុងវិស័យទេសចរណ៍ វិនិយោគ និងការចងសម្ព័ន្ធមេត្រីភាពរវាងខេត្តសៀមរាប និងខេត្តសេប៊ូ ដើម្បីឱ្យចេញជាលទ្ធផលផ្លែផ្កាសម្រាប់ជាប្រយោជន៍របស់ប្រជាជនខេត្តសៀមរាប និងប្រជាជនហ្វីលីពីន។

សូមរំលឹកជូនថា សម្តេចមហាបវរធិបតីហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវ Flerida Ann Camille P. Mayo ឯកអគ្គរដ្ឋទូតហ្វីលីពីនប្រចាំកម្ពុជា កាលពីថ្ងៃទី១៦ ខែកក្កដា ឆ្នាំ២០២៤ ក៏បានពិភាក្សាគ្នាជំរុញការតភ្ជាប់ជើងហោះហើរត្រង់ឡើងវិញពីទីក្រុងសេប៊ូនៃប្រទេសហ្វីលីពីនមកកាន់ខេត្តសៀមរាប ដើម្បីជំរុញវិស័យទេសចរណ៍នេះដែរ។

ជាមួយគ្នានោះ ភាគីទាំងពីរបានពិភាក្សាលើវិស័យសេដ្ឋកិច្ច និងពាណិជ្ជកម្ម តាមរយៈការខិតខំបន្ថែមទៀតលើការជំរុញកំណើនទំហំពាណិជ្ជកម្ម, ការនាំចេញផលិតផលកសិកម្ម, ការជំរុញវិស័យទេសចរណ៍ តាមរយៈការតភ្ជាប់ជើងហោះហើរត្រង់ឡើងវិញ ពីទីក្រុងសេប៊ូ ប្រទេសហ្វីលីពីនមកកាន់ខេត្តសៀមរាប វិស័យអប់រំ និងវិស័យសំណង់ផងដែរ ៕