រដ្ឋមន្ត្រីក្រសួងអប់រំ ដឹកនាំកិច្ចប្រជុំពិនិត្យដំណើរការ ត្រៀមរៀបចំពិធីប្រគល់សញ្ញាបត្រជូនគរុនិស្សិត គរុសិស្ស និងសម្ពោធដាក់ឱ្យប្រើប្រាស់អគារអន្តេវាសិកដ្ឋានគ្រូ នៃវិទ្យាស្ថានគរុកោសល្យរាជធានីភ្នំពេញ

ភ្នំពេញ៖ នាថ្ងៃទី២ ខែកក្កដា ឆ្នាំ២០២៤ នៅវិទ្យាស្ថានគរុកោសល្យរាជធានីភ្នំពេញ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំកិច្ចប្រជុំដើម្បីពិនិត្យវឌ្ឍនភាពនៃការត្រៀមរៀបចំពិធីប្រគល់សញ្ញាបត្រជូនគរុសិស្សជំនាន់ទី៣១ គរុនិស្សិតជំនាន់ទី២ និងសម្ពោធដាក់ឱ្យប្រើប្រាស់អគារអន្តេវាសិកដ្ឋានគ្រូ នៃវិទ្យាស្ថានគរុកោសល្យរាជធានីភ្នំពេញ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំ មន្ត្រីពាក់ព័ន្ធក្រោមឱវាទ នាយក នាយករងវិទ្យាស្ថានគរុកោសល្យរាជធានីភ្នំពេញ បាត់ដំបង សរុបប្រមាណ ៣២នាក់។

កិច្ចប្រជុំនេះ ផ្តោតពិភាក្សាលើការងារត្រៀមរៀបចំស្តង់ពិព័រណ៍ស្នាដៃសិស្ស និងសមិទ្ធផលសំខាន់ៗលើផ្នែកគរុកោសល្យ ដើម្បីបង្ហាញអំពីវឌ្ឍនភាពកំណែទម្រង់វិស័យអប់រំនៅកម្ពុជាកន្លងមក ដែលក្នុងនោះរួមមានស្តង់៖ ១). ប្រព័ន្ធបណ្ដុះបណ្ដាល និងវិក្រឹតការគ្រូបង្រៀន ២). វិទ្យាស្ថានគរុកោសល្យរាជធានីភ្នំពេញ៖ ហេដ្ឋារចនាសម្ព័ន្ធឆ្លើយតបការរៀន និងបង្រៀនក្នុងសតវត្សរ៍ទី ២១ ៣). វិទ្យាស្ថានគរុកោសល្យបាត់ដំបង៖ សក្តានុពល និងកាលានុវត្តភាពនៃការបណ្តុះបណ្តាលគ្រូសតវត្សរ៍ទី ២១ ៤). វិទ្យាស្ថានជាតិអប់រំ៖ ឧត្តមភាព គុណភាព សមធម៌ សុចរិត នវានុវត្តន៍ ៥). ការអភិវឌ្ឍហេដ្ឋារចនាសម្ព័ន្ធរូបវន្ត ៦). បណ្ណាល័យគំរូ ៧). អំណាន និងគណិតវិទ្យាថ្នាក់ដំបូងជាមូលដ្ឋានគ្រឹះនៃការសិក្សា ៨). សាលារៀនជំនាន់ថ្មី៖ ផ្តល់ភាពអង់អាចដល់គ្រូបង្រៀនឆ្ពោះទៅសម្រេចបរិវត្តកម្មនៃការអប់រំ។ បន្ទាប់ពីបញ្ចប់កិច្ចប្រជុំ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី អមដំណើរដោយក្រុមការងារពាក់ព័ន្ធ បានចុះទៅពិនិត្យដំណើរការនៃការរៀបចំស្តង់ពិព័រណ៍ដោយផ្ទាល់ផងដែរ។

គួរបញ្ជាក់ដែរថា ពិធីប្រគល់សញ្ញាបត្រ និងពិធីសម្ពោធដាក់ឱ្យប្រើប្រាស់អគារអន្តេវាសិកដ្ឋានគ្រូ នឹងប្រារព្ធឡើងនៅព្រឹកថ្ងៃទី៤ ខែកក្កដា ឆ្នាំ២០២៤ ខាងមុខនេះនៅវិទ្យាស្ថានគរុកោសល្យរាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដោយក្នុងឱកាសនោះផងដែរ នឹងមានការដាក់តាំងបង្ហាញនូវស្នាដៃរបស់សិស្សនិស្សិត និងសមិទ្ធផលសំខាន់ៗក្នុងវិស័យអប់រំដែលបង្ហាញពីការឆ្លើយតបរបស់កំណែទម្រង់វិស័យអប់រំទៅនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល អាណត្តិទី៧ ដែលផ្ដោតអាទិភាពលើការអភិវឌ្ឍមូលធនមនុស្ស ឆ្ពោះទៅសម្រេចចក្ខុវិស័យកម្ពុជា ២០៥០៕