នាយឧត្តមសេនីយ៍ ឯក មនោសែន អញ្ជើញសំណេះសំណាលជាមួយថ្នាក់ដឹកនាំ សាស្ត្រាចារ្យ គ្រូនគរបាលជាតិ និងនិស្សិត

ភ្នំពេញ៖ នៅថ្ងៃព្រហស្បតិ៍ ទី២០ ខែមិថុនា ឆ្នាំ២០២៤ ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញសំណេះសំណាលជាមួយថ្នាក់ដឹកនាំ សាស្ត្រាចារ្យ គ្រូនគរបាលជាតិ និងនិស្សិត ព្រមទាំងអញ្ជើញទទួលស្វាគមន៍ អ្នកឧកញ៉ា លាង ម៉េង សហស្ថាបនិកនិងជាប្រធានក្រុមអគ្គនាយក ក្រុមហ៊ុនខ្មែរប៊ែវើរីជេស និងលោកជំទាវ ព្រមទាំងសហការី នៅអគារសម្តេចអគ្គមហាធម្មពោធិសាល ជា ស៊ីម(អគារB)។

ក្នុងឱកាសដ៏វិសេសវិសាលនោះ អ្នកឧកញ៉ា លាង ម៉េង និងលោកជំទាវ បានប្រគល់ថវិកាចំនួន៦០ ០០០ដុល្លារ(ហុកសិបពាន់ដុល្លារ)និងភេសជ្ជៈចំនួន៧៥០កេស ជូនដល់ឯកឧត្តមនាយឧត្តមសេនីយ៍សាស្ត្រាចារ្យ ប្រធានបណ្ឌិត្យសភានគរបាលកម្ពុជា។

បន្ទាប់មក ឯកឧត្តមនាយឧត្តមសេនីយ៍សាស្ត្រាចារ្យ ប្រធាន បានសម្តែងការស្វាគមន៍ចំពោះគណៈប្រតិភូ ក្រុមហ៊ុនខ្មែរប៊ែវើរីជេស ដឹកនាំដោយ អ្នកឧកញ៉ា លាង ម៉េង សហស្ថាបនិកនិងជាប្រធានក្រុមអគ្គនាយកក្រុមហ៊ុនខ្មែរប៊ែវើរីជេស និងលោកជំទាវ ព្រមទាំងសហការី ជាពិសេស ថ្នាក់ដឹកនាំ សាស្ត្រាចារ្យ គ្រូនគរបាលជាតិ និងនិស្សិតនៃបណ្ឌិត្យសភានគរបាលកម្ពុជា។

ឯកឧត្តមនាយឧត្តមសេនីយ៍សាស្ត្រាចារ្យ ប្រធានបានមានប្រសាសន៍បន្តថា ឯកឧត្តមនិងលោកជំទាវ ព្រមទាំងថ្នាក់ដឹកនាំបណ្ឌិត្យសភា សាស្ត្រាចារ្យ គ្រូនគរបាលជាតិ មន្ត្រីនគរបាល ព្រមទាំងនិស្សិត សិស្ស សិក្ខាកាមទាំងអស់នៃបណ្ឌិត្យសភា ពិតជាមានសេចក្តីសប្បាយរីករាយយ៉ាងក្រៃលែងដែលបានទទួលស្វាគមន៍វត្តមាន អ្នកឧកញ៉ា លាង ម៉េង សហស្ថាបនិកនិងជាប្រធានក្រុមអគ្គនាយកក្រុមហ៊ុនខ្មែរប៊ែវើរីជេស និងលោកជំទាវ ព្រមទាំងសហការី នៅបណ្ឌិត្យសភា នាឱកាសនេះ ជាថ្មីម្តងទៀត ដែលលើកទី១ អ្នកឧកញ៉ានិងសហការី បានឧបត្ថម្ភសម្ភារៈនិងភេសជ្ជៈមួយចំនួនម្តងរួចហើយ»។

ឯកឧត្តមនាយឧត្តមសេនីយ៍សាស្ត្រាចារ្យ ប្រធាន បានថ្លែងបន្តថា ក្នុងនាមបណ្ឌិត្យសភានិងក្នុងនាមខ្លួនឯកឧត្តមផ្ទាល់ សូមថ្លែងអំណរគុណយ៉ាងជ្រាលជ្រៅ ចំពោះអ្នកឧកញ៉ានិងលោកជំទាវ ចំពោះទឹកចិត្តដ៏ល្អប្រពៃ ដែលបានឧបត្ថម្ភថវិកាចំនួន៦០ ០០០ដុល្លារ(ហុកសិបពាន់ដុល្លារ) បង់អង្គុយចំនួន១០០បង់ និងភេសជ្ជៈ ៧៥០
កេស។

ឯកឧត្តមនាយឧត្តមសេនីយ៍សាស្ត្រាចារ្យ ប្រធានបានបញ្ជាក់ជូនថា នេះជាលើកទី២ហើយ ដែលអ្នកឧកញ៉ា លាង ម៉េង សហស្ថាបនិកនិងជាប្រធានក្រុមអគ្គនាយកក្រុមហ៊ុនខ្មែរប៊ែវើរីជេស និងលោកជំទាវ បានឧបត្ថម្ភដល់បណ្ឌិត្យសភា។ លើកទី១ ក្នុងកំលុងពេលមុនបុណ្យចូលឆ្នាំខ្មែរ ឆ្នាំរោង អ្នកឧកញ៉ានិងលោកជំទាវ បានឧបត្ថម្ភបង់អង្គុយចំនួន១៥០បង់និងភេសជ្ជៈសរុបចំនួន៧៥០កេស»ដែរ។

បន្ទាប់ពីបញ្ចប់ពិធីសំណេះសំណាល ឯកឧត្តមនាយឧត្តមសេនីយ៍សាស្ត្រចារ្យ ប្រធានបណ្ឌិត្យសភា បានអញ្ជើញអ្នកឧកញ៉ា លាង ម៉េង និងលោកជំទាវ ព្រមទាំងសហការី ពិសាអាហារសាមគ្គី ដែលរៀបចំដោយបណ្ឌិត្យសភា ប្រកបដោយភាពសប្បាយរីករាយនិងភាតរភាព។